ប្រជាពលរដ្ឋក្នុងរាជធានីភ្នំពេញ3ភាគរយមិនមានអគ្គិសនីប្រើប្រាស់

ថ្ងៃទី ២៦ ខែ មករា ឆ្នាំ ២០១៨
ម៉ោង ១៥:៣៥
គង់ ម៉ាលីន
,សុវណ្ណណែត

រាជធានីភ្នំពេញ ៖ យោងតាមលទ្ធផលនៃការចុះអង្កេតរបស់ក្រុមសិក្សាក្នុងក្របខ័ណ្ឌគម្រោងវាយតម្លៃការផ្គត់ផ្គង់អគ្គិសនីនៅកម្ពុជារបស់ធនាគារពិភពលោក នៅឆ្នាំ២០១៧ថ្មីៗនេះបានសន្និដ្ឋានថា មានលំនៅឋានចំនួន ៧១,៥% បានទទួលការផ្គត់ផ្គង់អគ្គិសនីរួចហើយដោយឡែក នៅក្នុងទឹកដីរាជធានីភ្នំពេញ លំនៅឋានប្រជាពលរដ្ឋប្រមាណ៣% មិនទាន់មានអគ្គិសនីប្រើប្រាស់នៅឡើយទេ ខណៈនៅបណ្ដាខេត្តនានា ផ្ទះប្រជាពលរដ្ឋ៣០%មិនទាន់មានអគ្គិសនីប្រើប្រាស់ ។

លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានឲ្យដឹងថា គោលនយោបាយរបស់រាជរដ្ឋាភិបាល គឺជំរុញវិស័យឯកជនឱ្យជួយវិនិយោគលើហេដ្ឋារចនាសម្ព័ន្ធចែកចាយអគ្គិសនីតាមភូមិ-ឃុំនានា ដើម្បីឱ្យភូមិ-ឃុំទាំងអស់ឆាប់មានអគ្គិសនីប្រើប្រាស់ មិនចាំបាច់ចាំដល់ពេលសហគ្រាសរដ្ឋមានលទ្ធភាព ដែលមានរយៈពេលយូរឆ្នាំបន្តទៀតឡើយ ។

លោករដ្ឋមន្ត្រីមានប្រសាសន៍ថា ៖« តាមទំហំនៃទុនវិនិយោគដែលត្រូវការ ប្រសិនបើទុកឱ្យសហគ្រាសរដ្ឋ ឬអគ្គិសនីកម្ពុជាអភិវឌ្ឍន៍បន្តិចម្ដងៗទៅតាមលទ្ធភាពថវិកាដែលរាជរដ្ឋាភិបាលកៀរគរបាន គឺត្រូវការពេលវេលា២០ទៅ៣០ឆ្នាំទៀត លើសពីរយៈពេលដែលអនុវត្តបច្ចុប្បន្ន ដែលនេះគឺជាការខាតបង់មួយដ៏ធំធេងរបស់កម្ពុជា » ។

លោកបន្តថា តាមស្ថិតិជាក់ស្ដែងដែលគ្រប់គ្រងដោយអាជ្ញាធរអគ្គិសនីកម្ពុជាឃើញថា ក្នុងឆ្នាំ២០១៧ ការភ្ជាប់ចរន្តឱ្យប្រើប្រាស់អគ្គិសនីគ្រប់ប្រភេទ ធ្វើបាន២៥ម៉ឺនទីតាំងបន្ថែមទៀត ដែលធ្វើឱ្យទីតាំងមានអគ្គិសនីប្រើប្រាស់សរុបកើនឡើងដល់២.៤០៩.៩០៧ទីតាំង ក្នុងនោះមានលំនៅឋានចំនួន២.៣១៥.៩៣០កន្លែង, អាជីវកម្ម ឧស្សាហកម្ម និងរដ្ឋបាល មាន៨៩.១០៨កន្លែង និងទីតាំងជាស្ថាប័នរដ្ឋមានចំនួន៥.៨៦៩កន្លែង ។

យ៉ាងណាមិញ កំណើននៃការវិនិយោគវិស័យថាមពលអគ្គិសនីប្រទេសកម្ពុជាកាន់តែមានឯករាជ្យភាព ហើយការពង្រីកបណ្តាញផ្គត់ផ្គង់ថាមពលអគ្គិសនីកម្ពុជាសម្រេចបានលឿនជាងការរំពឹងទុក ។

ប្រធានអាជ្ញាធរអគ្គិសនីកម្ពុជា លោក ទិ នរិន្ទ បានលើកឡើងក្នុងសន្និបាតបូកសរុបការងារបញ្ចប់ឆ្នាំ២០១៧ និងលើកទិសដៅការងារសម្រាប់ឆ្នាំ២០១៨ របស់អាជ្ញាធរអគ្គិសនីកម្ពុជា កាលពីថ្ងៃទី២៤ មករាថា ក្នុងរយៈពេល១ឆ្នាំ ឬ២ឆ្នាំទៀតពេលដែលកម្ពុជាមានលទ្ធភាពផ្គត់ផ្គង់ថាមពលដោយខ្លួនឯងបាន១០០% កម្ពុជានឹងផ្លាស់ប្ដូរការពឹងផ្អែកថាមពលអគ្គិសនីពីប្រទេសជិតខាង មកជាការធ្វើពាណិជ្ជកម្មវិញ ។ លោកបន្តថា ការកែប្រែពីការពឹងផ្អែកលើគេ ទៅជាការធ្វើពាណិជ្ជកម្មថាមពលអគ្គិសនីជាមួយប្រទេសជិតខាង មានន័យថា ប្រទេសកម្ពុជាមានជម្រើសទិញ ឬមិនទិញថាមពលអគ្គិសនី បើសិនជាវាមានតម្លៃថ្លៃ ឬថោក ។

លោកបន្ថែមថា ក្នុងឆ្នាំ២០១៧ កម្លាំងថាមពលអគ្គិសនីដែលផលិតក្នុងស្រុក បានកើនឡើងដល់៨១,៤% បើធៀបនឹង៧៧,៩%កាលពីឆ្នាំ២០១៦ ហើយកម្លាំងថាមពលអគ្គិសនីដែលទិញពីប្រទេសជិតខាងវិញបានធ្លាក់ចុះពី២២%នៅឆ្នាំ២០១៦ មកត្រឹមតែ១៨,៦%នៅឆ្នាំ២០១៧ ។

លោក ស៊ុយ សែម បានលើកឡើងថា កម្ពុជាបានរីកចម្រើនថាមពលអគ្គិសនីយ៉ាងឆាប់រហ័ស ជាពិសេស កម្ពុជាបានដើរ លឿនជាងការសិក្សារបស់ធនាគារពិភព
លោក ។ ក្រុមអ្នកសិក្សាក្នុងក្របខ័ណ្ឌគម្រោងធនាគារពិភពលោកកាលពីឆ្នាំ២០០៦បានសិក្សាថា នៅឆ្នាំ២០២០ ភូមិទាំងអស់នៅកម្ពុជា នឹងមានអគ្គិសនីប្រើប្រាស់ពីប្រភពអគ្គិសនីផ្សេងៗ និងដល់ឆ្នាំ២០៣០ យ៉ាងហោចណាស់ ៧០%នៃលំនៅឋានទាំងអស់នៅកម្ពុជា នឹងមានអគ្គិសនីមានគុណភាពដូចអគ្គិសនីពីបណ្ដាញជាតិ ប៉ុន្តែកម្ពុជាបានវិវត្តន៍មុនការទស្សន៍ទាយ ដោយត្រឹមចុងឆ្នាំ២០១៧ ការផ្គត់ផ្គង់ថាមពលអគ្គិសនី បានគ្របដណ្ដប់លើភូមិចំនួន៨១,៦%នៃភូមិទាំងអស់ និងបានផ្គត់ផ្គង់ដល់លំនៅឋានចំនួន៦៨,៦៤%នៃលំនៅឋានទាំងអស់នៅកម្ពុជា ។

លោករដ្ឋមន្ត្រីបន្តទៀតថា ៖« យ៉ាងហោចណាស់ ៩៨%នៃភូមិទាំងអស់នៅកម្ពុជានឹងមានអគ្គិសនីប្រើប្រាស់នៅចុងឆ្នាំ២០២០ ចេញពីប្រភពអគ្គិសនីរបស់បណ្ដាញជាតិ ដែលមានតម្លៃទាបសមរម្យ អនុគ្រោះថ្លៃ មានស្ថិរភាពនិងគុណភាព » ។ លោកបន្តថា នៅឆ្នាំ២០២០ខាងមុខ យ៉ាងហោចណាស់ក៏មានលំនៅឋានជាង៨៥% អាចទទួលបានការភ្ជាប់ចរន្តអគ្គិសនីដើម្បីប្រើប្រាស់ផងដែរ » ៕