ខេត្តបន្ទាយមានជ័យ ៖ លោកឧត្តមសេនីយ៍ទោអាត់ ខែម ស្នងការនគរបាលខេត្ត បានក្រើនរំឭកដល់កងកម្លាំងនគរបាលក្នុងការិយាល័យជំនាញ និងគ្រប់កងកម្លាំងនគរបាលស្រុក-ក្រុង ត្រូវបន្តរឹតបន្តឹង និងពង្រឹងការពារសន្តិសុខ សណ្តាប់ធ្នាប់ សុវត្ថិភាព ក្នុងមូលដ្ឋាន ។ គ្រប់គ្រង ទស្សទាយវាយតម្លៃ សភាពការណ៍ឱ្យបានច្បាស់លាស់ ពីព្រោះបើយើងមិនអាចគ្រប់គ្រងសភាពការណ៍នយោបាយបាននោះទេ វានឹងកើតឡើងដោយចៃដន្យ ។
ស៊ើបអង្កេត និងក្តាប់ពីសភាពការណ៍ និងសកម្មភាពរបស់គណបក្សប្រឆាំងដែលត្រូវតុលាការរំលាយចោល ដែលមហិច្ឆតារបស់ពួកគេមានបំណងបង្កើតបដិវត្តន៍ពណ៌ ហើយផ្តួលរលំរាជរដ្ឋាភិបាលស្របច្បាប់ ។ បើទោះបីជាក្រោយតុលាការកំពូលបានប្រកាសសាលក្រមហើយនោះ ធ្វើគណបក្សសង្គ្រោះជាតិនេះ បានកាត់ក្បាលជាកង់ៗ និងរំលាយខ្លួនក៏ដោយ ប្រសិនបើយើងបណ្តែតបណ្តោយលើសភាពការណ៍នេះ នឹងជួបបញ្ហាដូច្នេះយើងត្រូវតែចុះធ្វើការក្តាប់អំពីសកម្មភាពនេះ ឲ្យបានម៉ឹងម៉ាត់ ពិសេសគឺកងកម្លាំងវរសេនាតូចការពារព្រំដែនទាំង៤ គឺត្រូវធ្វើការត្រួតពិនិត្យតាមបន្ទាត់ ឬច្រកព្រំដែន ។
ការលើកនេះ នៅរសៀលថ្ងៃទី២៥ ខែមករា ឆ្នាំ២០១៨ ម្សិលមិញក្នុងឱកាសដែលលោកឧត្តមស្នងការ អញ្ជើញជាអធិបតីក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែមករា (គឹតពីថ្ងៃទី២០ខែធ្នូ ឆ្នាំ២០១៧ ដល់ថ្ងៃទី១៩ ខែមករា ឆ្នាំ២០១៨) និងលើកទិសដៅអនុវត្តបន្តប្រចាំខែកុម្ភៈ ឆ្នាំ២០១៨ ដោយមានអស់លោក លោកស្រី ឧត្តមសេនីយ៍ វរសេនីយ៍ ជាស្នងការរង នាយ នាយរងការិយាល័យ អធិការ អធិការរងក្រុង-ស្រុក និងមេបញ្ជាការ វរសេនាតូចការពារព្រំដែនគោកទាំង៤ផងដែរ ។
លោកឧត្តមសេនីយ៍ទោ អាត់ ខែម ក៏បានជំរុញដល់ការិយាល័យជំនាញផែននគរបាលប្រឆាំងបទល្មើសសេដ្ឋកិច្ចបន្តស្រាវជ្រាវមុខសញ្ញាជួញដូរ និងប្រើប្រាស់គ្រឿងញៀន និងត្រូវពង្រឹងពិនិត្យស៊ើបអង្កេតលើទំនិញដែលខូចគុណភាព គេចពន្ធចូលតាមច្រករបៀងព្រំដែនដោយសហការណ៍ជាមួយកម្លាំងនគរបាលការពារព្រំដែននៅទីនោះ ។
ជាមួយគ្នានោះ ការិយាល័យផែននគរបាលព្រហ្មទណ្ឌតាមមុខសញ្ញាប្រព្រឹត្តបទល្មើសព្រហ្មទណ្ឌ ដែលកំពុងគេចខ្លួន និងមុខសញ្ញាដែលមានដីកាឲ្យចាប់ខ្លួន ។ ក្នុងនោះដែរ លោកឧត្តមសេនីយ៍ស្នងការក៏បានជំរុញដល់កងកម្លាំងទាំងអស់ គឺត្រូវតែមានស្មារតីខ្ពស់ ក្នុងការបំពេញតួនាទីរបស់ខ្លួន ជាអ្នកបម្រើសេវាសន្តិសុខ សណ្តាប់ធ្នាប់ជូនប្រជាពលរដ្ឋ ។ ពិសេសនៅពេលខាងមុខនេះ និងការរៀបចំបោះឆ្នោតជ្រើសរើសព្រឹទ្ធសភា និងរដ្ឋសភា ដែលទាមទារឲ្យកងកម្លាំងនគរបាលយើង ត្រូវតែបង្កើនការយកចិត្តទុកដាក់ ការពារសន្តិសុខឲ្យបានរឹងមាំ ធ្វើឲ្យដំណើរនៃការបោះឆ្នោតប្រព្រឹត្តទៅដោយសេរី និងយុត្តិធម៌ ។
ជាមួយគ្នានោះដែរ យោងតាមរបាយការណ៍បូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែមករា ឆ្នាំ២០១៨នេះ ឃើញថាសភាពការណ៍បទល្មើសព្រហ្មទណ្ឌកើតមានចំនួន៩លើក លើ៨លើក កើនឡើង១លើក ក្នុងនោះបទល្មើសឧក្រិដ្ឋកើតមាន២លើក លើ២លើក (រំលោភសេពសន្ថវៈ និងប៉ុនប៉ងរំលោភ) ។ បទល្មើសឧក្រិដ្ឋ កើតមាន៧លើក លើ៦ (អំពើលួច៥លើក, ហិង្សាដោយចេតនា១, ហិង្សាក្នុងគ្រួសារ១លើក) ។ គ្រោះថ្នាក់ចរាចរកើតឡើង១១លើក លើ១១លើក ស្លាប់មនុស្ស៩នាក់ លើ៤នាក់, របួសធ្ងន់៥នាក់ លើ៩នាក់ និងស្រាល៦នាក់ លើ៨នាក់ រួមទាំងយានយន្តគ្រប់ប្រភេទខូចធ្ងន់ និងស្រាលមួយចំនួនផងដែរ ៕
ចែករំលែកព័តមាននេះ