រាជធានីភ្នំពេញ ៖ រយៈពេលពីថ្ងៃគឺថ្ងៃទី២២-២៣ ខែមករា ឆ្នាំ២០១៨ នគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃដោយមានការសហការជាមួយមន្ត្រីកាំកុងត្រូលបានចុះអនុវត្ដតាមពាក្យបណ្ដឹងពីក្រុមហ៊ុនប៊ីចេងសញ្ញារូប«វែក» រកកន្លែងស្តុកលក់ផលិតផលប៊ីចេងរូបវែករំលោភកម្មសិទ្ធបញ្ញាជាច្រើនគីឡូផងដែរដែលមាន៣ទីតាំង ។ ក្នុងទីតាំងទី១-នៅផ្ទះលេខ១៤BEo តាមបណ្ដោយ…
រាជធានីភ្នំពេញ ៖ រយៈពេលពីថ្ងៃគឺថ្ងៃទី២២-២៣ ខែមករា ឆ្នាំ២០១៨ នគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃដោយមានការសហការជាមួយមន្ត្រីកាំកុងត្រូលបានចុះអនុវត្ដតាមពាក្យបណ្ដឹងពីក្រុមហ៊ុនប៊ីចេងសញ្ញារូប«វែក» រកកន្លែងស្តុកលក់ផលិតផលប៊ីចេងរូបវែករំលោភកម្មសិទ្ធបញ្ញាជាច្រើនគីឡូផងដែរដែលមាន៣ទីតាំង ។ ក្នុងទីតាំងទី១-នៅផ្ទះលេខ១៤BEo តាមបណ្ដោយ ផ្លូវលេខ១៤១, ទីតាំងទី២-ផ្ទះលេខ១០BEo តាមបណ្ដោយ ផ្លូវលេខ១៤១ និងទីតាំងទី៣-ផ្ទះលេខ២៣Aផ្លូវលេខ១២៥ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ ។
យោងតាមអនុសាសន៍ដឹកនាំដ៏ខ្ពង់ខ្ពស់របស់លោកនាយឧត្តមសេនីយ៍ នេត សាវឿន អគ្គស្នងការនគបាលជាតិក្រោមការបញ្ជាពីលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃឱ្យលោកឧត្តមសេនីយ៍ទោ មាស រ៉ាវុធ អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងសហការជាមួយកាំកុងត្រូលផែស្ងួតចុងទីភ្នំពេញ ដោយមានការសម្របសម្រួលពីលោក លី សុផាណា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ម្ចាស់ទីតាំងទី១-ឈ្មោះ តាំង សៀងខេង ភេទស្រី អាយុ៣០ឆ្នាំ ស្នាក់នៅ ផ្ទះលេខ១៤BEo តាមបណ្ដោយ ផ្លូវលេខ១៤១ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ សមត្ថកិច្ចរកឃើញប៊ីចេងរូបវែកដែលរំលោភកម្មសិទ្ធបញ្ញា ដោយមានប៊ីចេងក្លែងក្លាយចំនួន៨០០កញ្ចប់តូចស្មើនឹង២៧៥ គីឡូក្រាម និងសំបកខ្ចប់មួយចំនួនទៀត។
ម្ចាស់ទីតាំងទី២-ឈ្មោះ អ៊ឹង សុង ភេទប្រុស អាយុ៦៨ឆ្នាំ ស្នាក់នៅផ្ទះលេខ២៣A ផ្លូវលេខ១២៥ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ សមត្ថកិច្ចរកឃើញវត្ថុធាត់ដើមសំរាប់ធ្វើប៊ីចេងរូបវែកដែលរំលោភកម្មសិទ្ធបញ្ញា មានប៊ីចេងក្លែងក្លាយចំនួន ៥៣បេស្មើនឹង១៣៦៤គីឡូក្រាម, ប៊ីចេងមិនទាន់វេចខ្ចប់ចំនួន៧៦បេស្មើនឹង១៨៩៨គីឡូក្រាម, សំបកវេចខ្ចប់ទំងន់៩៩គីឡូក្រាម, ម៉ាស៊ីនអ៊ុតមាត់ថង់១គ្រឿង,ម៉ាស៊ីនវេចខ្ចប់១គ្រឿង ។
ម្ចាស់ទីតាំងទី៣ ផ្ទះលេខ១០A តាមបណ្ដោយ ផ្លូវលេខ១៤១ ក្នុងសង្កាត់បឹងព្រលិត ខណ្ឌ៧មករា មិនបានចូលរួមសហការចំណាត់ការរបស់សមត្ថកិច្ចឡើយ ដូច្នេះសមត្ថកិច្ចបានសំរេចចិត្តកាច់សោរផ្ទះឆែកឆេរ និងរកឃើញប៊ីចេងរូបវែកដែលរំលោភកម្មសិទ្ធបញ្ញា មានប៊ីចេងក្លែងក្លាយចំនួន១៣៩យួរក្នុងមួយយួរ១២គីឡូក្រាមស្មើនឹង១៦៦៨គីឡូក្រាម, ប៊ីចេងមិនទាន់វេចខ្ចប់ចំនួនជាង២០០បេ, សំបកវេចខ្ចប់មួយចំនួនធំ, ម៉ាស៊ីនអ៊ុតមាត់ថង់១គ្រឿង, ម៉ាស៊ីនវេចខ្ចប់១គ្រឿង ។ ដែលសរុបទាំងប៊ីចេងវិចខ្ចប់រួច និងមិនទាន់វិចខ្ចប់រួចមានចំនួនជិត៨តោនក្នុង៣ទីតាំងខាងលើ ។
លោកឧត្តមសេនីយ៍ទោ មាស រ៉ាវុធ បានឲ្យដឹងថា សមត្ថកិច្ចរបស់លោកបានអនុវត្តតាមពាក្យបណ្តឹងរបស់ក្រុមហ៊ុនប៊ីចេងសញ្ញារូបវែកដែលបានស្រាវជ្រាវរកឃើញថា មានឈ្មួញលក់ផលិតផលប៊ីចេងរូបវែកដែលរំលោភកម្មសិទ្ធបញ្ញា ដែលបម្រុងធ្វើចរាចរណ៍លើទីផ្សារមួយចំនួន ។ បច្ចុប្បន្នម្ចាស់ទីតាំងខាងលើត្រូវបានសមត្ថកិច្ចនាំខ្លួនទៅបំភ្លឺនៅនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃដើម្បីបន្តតាមនីតិវិធី ៕
ចែករំលែកព័តមាននេះ