ក្រុងប៉ោយប៉ែត ៖ មានករណីប៉ុនប៉ងលួចយករថយន្ត នៅចំណុចមុខសាលារៀនចិន ក្នុងភូមិគីឡូម៉ែតលេខ៤ សង្កាត់ផ្សារកណ្តាល ក្រុងប៉ោយប៉ែតកាលពីវេលាម៉ោង១និង២០នាទីយប់ ថ្ងៃទី១៨ ខែមករានេះ ។
ជងសង្ស័យឈ្មោះ សុ វណ្ណថា ភេទប្រុស អាយុ២៧ឆ្នាំ ស្នាក់នៅភូមិផ្សារកណ្តាល សង្កាត់ ក្រុងប៉ោយប៉ែត បានធ្វើសកម្មភាពយកសោម៉ូតូទៅចាក់លើទ្វារថយន្តម៉ាកធុនត្រាសេរី ២០០៨ពណ៌ស នៅពេលធ្វើសកម្មភាពម្ចាស់រថយន្តភ្ញាក់ទាន់ ហើយមានការប្រកែកគ្នារវាងម្ចាស់រថយន្ត និងជនសង្ស័យយ៉ាងយូរ ។
ម្ចាស់រថយន្តឈ្មោះទុយ មាន អាយុ៤០ឆ្នាំ រស់នៅភូមិគីឡូម៉ែតលេខ៤ បានរាយការណ៍ជូនសមត្តកិច្ច ក្រោយពីទទួលព័ត៌មាន កម្លាំងវេនប្រចាំបញ្ជាការ និងទទួលបញ្ជាពីលោកវរសេនីយ៍ឯក ធិន ស៊ិនដេត អធិការក្រុងប៉ោយប៉ែត បានចុះឃាត់ខ្លួនជនសង្ស័យយកមកអធិការដ្ឋានដើម្បីសួរនាំ ។
ក្រោយពីសាកសួរចម្លើយ និងធ្វើតេស្តទឹកនោមទើបដឹងថា ជនបង្កខាងលើប្រើប្រាស់គ្រឿងញៀន ហើយប្រហែលជាបែកថ្នាំហើយ បានជាទៅចាក់សោលួចរថយន្តនៅមុខម្ចាស់រថយន្តបែបនេះ ជាពិសេសនោះគឺខ្លួនមិនចេះបើករថយន្តទៀតផង ។ ករណីនេះកម្លាំងជំនាញកំពុងសាកសួរ និងកសាងសំណុំរឿងបន្ត ៕
ចែករំលែកព័តមាននេះ