ការសម្ភាស គឺជារឿងដែលអ្នកណាៗក៏ត្រូវតែឆ្លងកាត់មកទាំងអស់ ប៉ុន្តែការសម្ភាសចូលធ្វើការ វាពិបាកជាងការសម្ភាសផ្សេងៗទៀតព្រោះថា ការសម្ភាសការងារសម័យនេះ គេនឹងមើលពីលទ្ធផលការសិក្សា ឬបទពិសោធន៍ការងារភ្ជាប់មកជាមួយប៉ុណ្ណោះ ។ ស្ថាប័ន ឬក្រុមហ៊ុនបច្ចុប្បន្ន…
ការសម្ភាស គឺជារឿងដែលអ្នកណាៗក៏ត្រូវតែឆ្លងកាត់មកទាំងអស់ ប៉ុន្តែការសម្ភាសចូលធ្វើការ វាពិបាកជាងការសម្ភាសផ្សេងៗទៀតព្រោះថា ការសម្ភាសការងារសម័យនេះ គេនឹងមើលពីលទ្ធផលការសិក្សា ឬបទពិសោធន៍ការងារភ្ជាប់មកជាមួយប៉ុណ្ណោះ ។
ស្ថាប័ន ឬក្រុមហ៊ុនបច្ចុប្បន្ន សម្លឹងមើលអ្នកដែលមានគុណសម្បត្តិស័ក្តិសម មានទស្សនគតិស្របជាមួយក្រុមហ៊ុន ព្រមទាំងធ្វើការរួមជាមួយអ្នកដទៃបាន ហើយអ្វីសំខាន់ គឺស្គាល់ពីចំណុចខ្លាំង និងចំណុចខ្សោយរបស់ខ្លួន ហើយព្រមកែតម្រង់ខ្លួនឯងឲ្យល្អប្រសើរឡើង ។
១-ការណែនាំខ្លួន ៖
ជាមូលដ្ឋានគ្រឹះដែលបេក្ខជនគ្រប់រូបត្រូវធ្វើការណែនាំខ្លួន ដូចជា ឈ្មោះ អាយុ ឪពុកម្តាយ មានបងប្អូនប៉ុន្មាននាក់ និងរៀនចប់មហាវិទ្យាល័យអ្វី ។ វាមិនមែនជារឿងខុសទេ ប៉ុន្តែកុំភ្លេចថា នៅពេលគ្រប់គ្នាជួបនឹងសំណួរនេះ យើងនឹងឆ្លើយតបដូចម្តេចដើម្បីឲ្យទាក់ទាញ និងខុសប្លែកពីបេក្ខជនដទៃ ។
ដូច្នេះ អ្វីគួរធ្វើ គឺការណែនាំខ្លួនឲ្យក្រុមហ៊ុននោះឃើញថា យើងជាបេក្ខជនល្អបំផុត ស័ក្តិសមជាមួយតំណែងខាងលើយ៉ាងណា រួមទាំងលើកឧទាហរណ៍ អធិប្បាយឲ្យក្រុមហ៊ុនមើលឃើញរូបភាពហើយចាប់អារម្មណ៍មកលើយើងកាន់តែខ្លាំងឡើង ។
ចំណុចសំខាន់ គួរនិយាយឲ្យងាយយល់ ជាទូទៅ គួរប្រើពេលក្នុងការណែនាំខ្លួនមិនលើសពី២នាទី ។
២-អំពីក្រុមហ៊ុន ៖
សំណួរពាក់ព័ន្ធនឹងក្រុមហ៊ុន បេក្ខជនជាច្រើនរូបនឹងចាប់ផ្តើមចាប់អារម្មណ៍លម្អិត និងស៊ីជម្រៅលើក្រុមហ៊ុន នៅពេលដែលពួកគេត្រូវក្រុមហ៊ុនហៅមកសម្ភាសន៍ប៉ុណ្ណោះ ប៉ុន្តែយើងគួរតែស្វែងរកព័ត៌មានរបស់ក្រុមហ៊ុនទុក។ វានឹងធ្វើឲ្យយើងមានប្រៀបក្នុងការឆ្លើយតបសំណួរសម្ភាសន៍ការងារ ដូចជា ទំហំក្រុមហ៊ុន គម្រោងការងារ វប្បធម៌គ្រប់គ្រងការងារ ផលិតផល សេវាកម្មផ្សេងៗ និងអ្វីដែលក្រុមហ៊ុនធ្វើ ដើម្បីបង្ហាញឲ្យឃើញថា យើងជាមនុស្សយកចិត្តទុកដាក់ល្អិតល្អន់ ខ្នះខ្នែងជាមួយការងារ និងពិតជាចង់ធ្វើការជាមួយក្រុមហ៊ុន ។
៣-សំណួរស៊ីជម្រៅលើការងារ ៖
ជាច្រើនលើកដែលក្រុមហ៊ុនជួបថា បេក្ខជនភាគច្រើននឹងឆ្លើយតបថា ពួកគេបានដឹងព័ត៌មានពីការងារនិងអាចធ្វើបាន ប៉ុន្តែនៅពេលសួរលម្អិត ស៊ីជម្រៅនោះ ពួកគេបែរជាឆ្លើយតបបានតែចោះៗប៉ុណ្ណោះ ហើយមិនអាចឆ្លើយតបលម្អិតលើការងារ ឬបញ្ជាក់ពីការងារបានច្បាស់លាស់ទេ ។ អ្វីគួរធ្វើ គឺគួរសិក្សាព័ត៌មាន និងអានលម្អិតពីមុខតំណែងការងារដែលយើងដាក់ពាក្យ ព្រមទាំងឈ្វេងយល់ឲ្យល្អបំផុត ។
៤-កុំកុហក ៖
បើមានអារម្មណ៍មិនប្រាកដចិត្ត ឬមិនធ្លាប់ធ្វើមកពីមុនទេ ក៏ប្រាប់ទៅអ្នកសម្ភាសន៍ខាងក្រុមហ៊ុនត្រង់ៗ ហើយយើងត្រូវបង្ហាញក្រុមហ៊ុនពីការខំតាំងចិត្តរបស់យើងក្នុងការបំពេញមុខងារនេះ ដោយប្រាប់ថា យើងត្រៀមនឹងរៀនសូត្រ និងអភិវឌ្ឍន៍ជំនាញដែលនៅខ្វះខាត ឬបទពិសោធន៍ការងារកន្លងមក ដោយអាចយកទៅអនុវត្តជាមួយមុខតំណែងនេះរបៀបណា ។
៥-សំណួរពាក់ព័ន្ធនឹងកំហុសឆ្គងដែលបានកើតឡើង ៖
ជាទូទៅ បេក្ខជនជាច្រើនតែងប្រាប់ពីលទ្ធផលដែលធ្លាប់កើតឡើងថា យ៉ាងដូចម្តេច ប៉ុន្តែការពិត គោលបំណងនៃសំណួរនេះ គឺក្រុមហ៊ុនចង់ជ្រាបថា តើបេក្ខជនបានរៀនសូត្រអ្វីខ្លះពីហេតុការណ៍កើតឡើង អាចឆ្លងកាត់បញ្ហាទាំងនោះបានយ៉ាងដូចម្តេច ព្រមទាំងអភិវឌ្ឍន៍កែតម្រូវ និងអាចយកបទពិសោធន៍ខុសនេះទៅបង្រៀនអ្នកដទៃបែបណាខ្លះ ។ សំណួរនេះនឹងធ្វើឲ្យក្រុមហ៊ុនស្គាល់ពីបេក្ខជនខ្លាំងឡើង មិនថាជាវិធីការទទួលយកស្ថានការណ៍កើតឡើងផ្សេងៗ រហូតដល់គំនិតរបស់បេក្ខជនផងដែរ ។
បើយើងរៀនសូត្រ និងត្រៀមខ្លួនបានល្អ វានឹងជួយបន្ថែមទំនុកចិត្តក្នុងការសម្ភាសការងារខ្លាំងឡើង និងជួយឲ្យមានឱកាសបានរួមការងារជាមួយក្រុមហ៊ុនដែលយើងសុបិន ព្រោះការងារល្អៗ មិនមែនរកបានដោយងាយៗទេ ។ បើយើងជួបមុខតំណែងពេញចិត្ត និង ស័ក្តិសមជាមួយខ្លួនឯងហើយនោះ ក៏កុំបណ្តោយឲ្យវារបូតពីដៃ ៕
ចែករំលែកព័តមាននេះ