ទីក្រុងបាងកក៖ បន្ទាប់ពីតុលាការធម្មនុញ្ញថៃដកតំណែងលោកស្រីផែថងថានជាស្ថាពរ ក្រុមអ្នកវិភាគសម្លឹងឃើញបុគ្គលសំខាន់ៗមួយចំនួនដែលអាចនឹងបញ្ជូនឈ្មោះទៅសភាដើម្បីបោះឆ្នោតផ្ដល់សេចក្ដីទុកចិត្តក្លាយជានាយករដ្ឋមន្ត្រីថ្មី។ តាមពិត អាចមានសេណារីយោច្រើនជាបន្តទៀតនៅក្នុងនយោបាយថៃ។ ឥឡូវនេះ ថៃកំពុងតែប្រញឹកដៃក្នុងការជ្រើសរើសនាយករដ្ឋមន្ត្រីថ្មីទោះបីដោយវិធីណាក៏ដោយ។ យោងតាមរដ្ឋធម្មនុញ្ញថៃ សភាត្រូវកោះប្រជុំឲ្យបានឆាប់បំផុតតាមដែលអាចធ្វើទៅបាន។
ប្រធានរដ្ឋសភាត្រូវកំណត់ពេលវេលាដើម្បីបោះឆ្នោតជ្រើសរើសនាយករដ្ឋមន្ត្រីថ្មីនៅពេលតំណែងនាយករដ្ឋមន្ត្រីទំនេរជាស្ថាពរ។ ប៉ុន្តែរដ្ឋធម្មនុញ្ញមិនបានចែងឱ្យបានច្បាស់ថាតើត្រូវជ្រើសរើសនាយករដ្ឋមន្ត្រីឱ្យបានយ៉ាងយូរត្រឹមរយៈពេលប៉ុន្មានថ្ងៃ ឬប៉ុន្មានខែទេ។ តទៅនេះជាបញ្ជីឈ្មោះបេក្ខជននាយករដ្ឋមន្ត្រីដែលបញ្ជូនទៅគណៈកម្មការរៀបចំការបោះឆ្នោតកាលពីឆ្នាំ២០២៣។ មានតែបេក្ខជនទាំងនោះទេដែលមានសិទ្ធិបញ្ជូនបេក្ខភាពទៅឱ្យសភាអនុម័ត។ នេះបើយោងទៅតាមផ្លូវច្បាប់។ ដូច្នេះ មានន័យថាមិនអាចជ្រើសរើសបេក្ខជនក្រៅពីនោះបានឡើយ។
បេក្ខជនទាំងនោះរួមមាន
១- លោកឆៃកាសឺម នីតិសិរី ជាបេក្ខជនមកពីគណបក្សភឿថៃ។ លោកមានអាយុ៧៧ឆ្នាំ ជាអតីតរដ្ឋមន្ត្រីក្រសួងយុត្តិធម៌ និងជាបេក្ខជនទីបីរបស់គណបក្សនេះ។ លោកជាជម្រើសចុងក្រោយរបស់គណបក្សភឿថៃ។ មានពាក្យចចាមអារ៉ាមខ្សិបខ្សៀវគ្នាថាលោកឆៃកាសឺមមិនដឹងថាអាចកាន់តំណែងនេះបានដែរឬទេព្រោះគាត់មានបញ្ហាសុខភាព។ កាលពីពេលឃោសនាបោះឆ្នោតឆ្នាំ២០២៣ លោកមានបញ្ហាដាច់សរសៃឈាមខួរក្បាល។ ប៉ុន្តែក្រោយមក លោកអះអាងថាមានសុខភាពល្អគ្រប់គ្រាន់អាចកាន់តំណែងនាយករដ្ឋមន្ត្រីបាន។
២-លោកភីរ៉ាផាន (Pirapan) ជាបេក្ខជនរបស់គណបក្សរួមថៃសាងជាតិ (United Thai Nation Party) ដែលជាគណបក្សធំលំដាប់ទី២នៅក្នុងរដ្ឋាភិបាលចម្រុះ។ លោកជារដ្ឋមន្ត្រីក្រសួងថាមពល និងជាឧបនាយករដ្ឋមន្ត្រីនៅក្នុងរដ្ឋាភិបាលចម្រុះ។ លោកក៏ជាប្រធានគណបក្សផងដែរ។
៣-លោកអនុទីន (Anutin Charnvirakul) មកពីគណបក្សភូមិចៃថៃ។ លោកធ្លាប់ជារដ្ឋមន្ត្រីក្រសួងមហាផ្ទៃនៅក្នុងរដ្ឋាភិបាលចម្រុះជាមួយលោកស្រីផែថងថានមុនពេលលោកស្រីត្រូវតុលាការព្យួរតំណែងកាលពីដើមខែកក្កដា។ ប៉ុន្តែការដែលគណបក្សរបស់លោកចូលរួមនៅក្នុងរដ្ឋាភិបាលចម្រុះជាមួយគណបក្សភឿថៃដែលជាគណបក្សមានជំហរនយោបាយផ្ទុយគ្នាធ្វើឱ្យភូមិចៃថៃធ្លាក់ប្រជាប្រិយភាព។ ដូច្នេះ លោកអនុទីន និងគណបក្សរបស់លោកក៏សម្រេចចិត្តធ្វើជាគណបក្សប្រឆាំងវិញ។
៤-លោកប្រាយុទ្ធចាន់អូចា ជាបេក្ខជនមកពីគណបក្សរួមថៃសាងជាតិ។ លោកធ្លាប់ជាអគ្គបញ្ជាការកងទ័ព និងជានាយករដ្ឋមន្ត្រីថៃក្រោយការធ្វើរដ្ឋប្រហារឆ្នាំ២០១៤។ ប៉ុន្តែជីវិតនយោបាយរបស់លោកហាក់ដូចជាឈានដល់ដំណាក់កាលព្រះសុរិយារៀបអស្ដង្គតទៅហើយ។ បច្ចុប្បន្ននេះ លោកជាសមាជិកក្រុមប្រឹក្សាព្រះរាជបល្ល័ង្គ។ មានមតិខ្លះខ្សិបខ្សៀវគ្នាថាលោកប្រាយុទ្ធនៅតែមានឱកាសវិលមកកាន់អំណាចវិញ។ ឧបមាថាលោកប្រាយុទ្ធក្លាយជានាយករដ្ឋមន្ត្រីនាពេលខាងមុខនេះ លោកអាចកាន់អំណាចបានត្រឹមតែ២ឆ្នាំទៀតប៉ុណ្ណោះដោយយោងតាមរដ្ឋធម្មនុញ្ញឆ្នាំ២០២២ដែលចែងថា «នាយករដ្ឋមន្ត្រីអាចកាន់អំណាចយ៉ាងយូរបំផុតរយៈពេល៨ឆ្នាំ»។ កាលពីអាណត្តិមុន គាត់កាន់អំណាច៦ឆ្នាំរួចទៅហើយ។ គេគិតថាលោកប្រាយុទ្ធកាន់អំណាចបានត្រឹមតែ២ឆ្នាំក៏បានដែរ។ ទម្រាំដល់ឆ្នាំ២០២៧សមល្មមនឹងប្រទេសថៃរៀបចំការបោះឆ្នោតនៅអាណត្តិថ្មីបើសិនរដ្ឋសភាមិនត្រូវបានរំលាយមុននោះទេ។
តើប្រទេសថៃអាចនឹងមាននាយករដ្ឋមន្ត្រីថ្មីនៅពេលណា? សូមរំលឹកថាកាលពីឆ្នាំ២០២៤ នៅពេលលោកសេដ្ឋា ថាក់វិស៊ីនត្រូវតុលាការធម្មនុញ្ញដកតំណែង (ពីបទតែងតាំងមន្ត្រីធ្លាប់មានទោសពៃរ៍ឱ្យធ្វើជាសមាជិកគណៈរដ្ឋមន្ត្រី) គណបក្សនយោបាយនៅក្នុងរដ្ឋាភិបាលចម្រុះប្រើពេលតែមួយថ្ងៃប៉ុណ្ណោះបានឯកភាពគ្នាបញ្ជូនឈ្មោះលោកស្រីផែថងថានទៅឱ្យសភាអនុម័ត។ បន្ទាប់ពីតុលាការដកតំណែងលោកសេដ្ឋា៧២ម៉ោង លោកស្រីផែថងថានត្រូវសភាបោះឆ្នោតតែងតាំងជានាយករដ្ឋមន្ត្រីខាងលើនេះជាការដកស្រង់ប្រភពឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ