ប្រទេសថៃ ៖ តុលាការធម្មនុញ្ញថៃបានចេញកាលពីថ្ងៃទី២៩សីហាសាលដីកាដកតំណែង នាយករដ្ឋមន្ត្រីលោកស្រីផែថងថានសីុណាវ៉ាត្រា ដែលត្រូវព្យួរតំណែងចាប់តាំងពីខែកក្កដាមក ដោយសារការគ្រប់គ្រងភាពតានតឹង រវាងថៃនិងកម្ពុជា។ ចៅក្រមទាំង៩រូបរបស់តុលាការធម្មនុញ្ញថៃចាប់ផ្ដើម ពិភាក្សាគ្នាពីម៉ោង១០ព្រឹកមក ហើយចេញសេចក្ដីសម្រេចរង្វង់ម៉ោង៣រសៀល…
ប្រទេសថៃ ៖ តុលាការធម្មនុញ្ញថៃបានចេញកាលពីថ្ងៃទី២៩សីហាសាលដីកាដកតំណែង នាយករដ្ឋមន្ត្រីលោកស្រីផែថងថានសីុណាវ៉ាត្រា ដែលត្រូវព្យួរតំណែងចាប់តាំងពីខែកក្កដាមក ដោយសារការគ្រប់គ្រងភាពតានតឹង រវាងថៃនិងកម្ពុជា។
ចៅក្រមទាំង៩រូបរបស់តុលាការធម្មនុញ្ញថៃចាប់ផ្ដើម ពិភាក្សាគ្នាពីម៉ោង១០ព្រឹកមក ហើយចេញសេចក្ដីសម្រេចរង្វង់ម៉ោង៣រសៀល ១សប្ដាហ៍បន្ទាប់ពីឪពុកលោកស្រីលោកថាក់សីុនសីុណាវ៉ាត្រា ត្រូវបានតុលាការថៃមួយដកការចោទប្រកាន់ពីបទ ប្រមាថព្រះមហាក្សត្រ ដែលអាចមានទោសជាប់ពន្ធនាគារដល់១៥ឆ្នាំ។
ការដកតំណែងលោកស្រីផែថងថាននាំឲ្យលោកស្រីក្លាយជានាយករដ្ឋមន្ត្រីថៃទី៣នៃត្រកូលសីុណាត្រា ត្រូវដកចេញពីតំណែងបន្ទាប់ពីឪពុកលោកស្រីនិងម្ដាយមីងលោកស្រីយីងឡាក់ដែលអ្នកទាំង២ដកតំណែងដោយសាររដ្ឋប្រហារយោធា។ តុលាការធម្មនុញ្ញថៃ បានដកតំណែងនាយរដ្ឋមន្ត្រីមុនលោកស្រីគឺលោកសេដ្ឋាថាវីសីុនរួចហើយកាលពី១ឆ្នាំមុន។
ចាប់តាំងពី២០ឆ្នាំមកហើយនយោបាយថៃកំណត់តាមរយៈការតស៊ូដណ្ដើមអំណាចគ្នា រវាងខ្សែសីុណាវ៉ាត្រា និងពួកអភិរក្សនិយមដែលចាត់ទុកត្រកូលសីុណាវ៉ាត្រាថា ជាការគំរាមកំហែងដល់សង្គមដែលជាប្រពៃណីស្ថិតក្រោមអំណាចស្ដេច។ ការដកតំណែងលោកស្រីផែថងថាន ប្រទេសថៃអាចប្រឈមមុខនឹងការស្ទះខាងនយោបាយ ព្រោះតែហាក់គ្មានបេក្ខជនណាមួយដែលសក្ដិសមលើកជានាយករដ្ឋមន្ត្រី។ គណបក្សភឿថៃដឹកនាំជាមួយក្រុមចម្រុះដែលផុយស្រួយមួយនិងគ្មានលំនឹងក្នុងសភា។
យោងតាមរដ្ឋធម្មនុញ្ញថៃថា មានតែអ្នកដែលឈរឈ្មោះជាផ្លូវការជាបេក្ខជននាយករដ្ឋមន្ត្រីក្នុងការបោះឆ្នោតទូទៅឆ្នាំ២០២៣ទេ ដែលអាចជ្រើសតាំងជានាយករដ្ឋមន្ត្រីបាន។ ប៉ុន្តែក្នុងចំណោមមនុស្ស៩នាក់ដែលពីដំបូងស្នើដោយបណ្ដាគណបក្សនយោបាយសំខាន់ៗ កាលពីឆ្នាំ២០២៣ ៤រូបមិនអាចឈរឈ្មោះបានរួចហើយចំណែក៥រូបទៀតត្រូវប្រឆាំងដោយសារហេតុផលនានាដែរ។
ការរៀបចំការបោះឆ្នោតថ្មីហាក់ដូចជាដំណោះស្រាយមួយ តែវាមិនច្បាស់ថាតើនាយករដ្ឋមន្ត្រូស្ដីទីបច្ចុប្បន្នអាចកោះធ្វើការបោះឆ្នោតមួយបាន ឬក៏មានតែនាយករដ្ឋមន្ត្រីមួយរូបដែលសភាអនុម័ត ទើបមានសីទ្ធិរៀបចំការបោះឆ្នោតនោះ៕
ចែករំលែកព័តមាននេះ