«Daily Mail»កាលពីថ្ងៃទី៩ មករា ២០១៨ ផ្សាយពីរឿងរ៉ាវរបស់អ្នកទោសស្លាប់ហើយរស់ឡើងវិញ ក្រោយពីឆ្មាំគុកយល់ច្រឡំថា បានស្លាប់ និងយកសពទៅធ្វើកោសល្យវិច័យ ប៉ុន្តែអ្នកទោសបែរជាដកដង្ហើម ខណៈពេលគ្រូពេទ្យត្រៀមវះកាត់សព ។
ហេតុការណ៍ដ៏រន្ធត់នោះកើតឡើងនៅថ្ងៃទី៧ មករា ២០១៨ នៅពន្ធនាគារ «អាស្ទូរៀស»ក្បែរក្រុងអូវីអាដូ ភាគខាងជើងប្រទេសអេស្ប៉ាញ ។ អ្នកទោសរូបនោះឈ្មោះ Gonzalo Montoya Jimenez អាយុ២៩ឆ្នាំ ដោយនៅព្រឹកថ្ងៃកើតហេតុបានអង្គុយសណ្តំនៅលើកៅអីក្នុងបន្ទប់ឃុំឃាំងក្រោយពីមិនព្រមទទួលការហៅឈ្មោះពីឆ្មាំគុក ។
ក្រោយមករូបគេត្រូវបានច្រកចូលក្នុងថង់រក្សាសព និងនាំទៅមជ្ឈមណ្ឌលធ្វើកោសល្យវិច័យនៅក្រុងនោះក្រោយពីបញ្ជាក់ ថាបានស្លាប់នៅក្នុងបន្ទប់ឃុំឃាំង ។
អ្នកនាំពាក្យពន្ធនាគារអេស្ប៉ាញបញ្ជាក់ប្រាប់ក្រុមគ្រួសាររបស់អ្នកទោសថា Gonzaloបានស្លាប់ដោយមានការបញ្ជាក់ពីវេជ្ជបណ្ឌិត២នាក់ ។ ក្រៅពីនេះផ្នែកកោសល្យវិច័យនៅក្នុងគុកក៏បញ្ជាក់ថា បានស្លាប់ដូចគ្នាដែរ ។
ប៉ូលិសបញ្ជាក់ថា ជាដំបូងបានទទួលដំណឹងពីអ្នកប្រចាំការនៅគុកថា អ្នកទោសបានស្លាប់ ដោយសពត្រូវបញ្ជូនទៅធ្វើកោសល្យវិច័យដោយគ្មានសមត្ថកិច្ចប៉ូលិសអមដំណើរទេ ។ លុះក្រោយមកទទួលការទាក់ទងជាលើកទី២ ឱ្យទៅមន្ទីរពេទ្យចាំការពារអ្នកទោស ខណៈពេលរូបគេកំពុងសម្រាកព្យាបាលនៅមន្ទីរពេទ្យ ហើយមានអារម្មណ៍ភិតភ័យដែលអ្នកទោសបានដឹងខ្លួនឡើងវិញ ។
អ្នកនាំពាក្យនៅមន្ទីរពេទ្យបញ្ជាក់ថា អ្នកទោសGonzaloព្យាបាលនៅបន្ទប់សង្គ្រោះបន្ទាន់ ប៉ុន្តែមិនអាចផ្តល់ការយល់ឃើញពីអាការជំងឺបានទេ ហើយបងប្អូនគេដែលបានទៅសួរសុខទុក្ខខឹងគ្រប់គ្នា ។
ពន្ធនាគារអាស្ទូរៀសកំពុងស៊ើបអង្កេតរកមូលហេតុពីកំហុសឆ្គងរបស់សមត្ថកិច្ចនៅក្នុង
គុក ៕
ចែករំលែកព័តមាននេះ