សាច់គោដែលមានគុណភាពខ្ពស់របស់ជប៉ុន ដែលគេស្គាល់ថាសាច់គោកូបេ ត្រូវបាននាំចេញទៅកាន់អាមេរិកជាលើកដំបូងកាលពីថ្ងៃព្រហស្បតិ៍ ដោយអង្គការទីផ្សារសាច់គោដែលមានមូលដ្ឋាននៅទីក្រុងកូបេភាគខាងលិចប្រទេសជប៉ុន ។សមាគមលើកកម្ពស់ការចែកចាយ និងទីផ្សារសាច់គោកូបេឱ្យដឹងថា យន្តហោះបានដឹកសាច់សុទ្ធ សាច់ចំឡក និងផ្នែកជាច្រើនទៀតពីគោចំនួន៥ក្បាល ចេញដំណើរពីអាកាសយានដ្ឋានហានេដា ទីក្រុងតូក្យូ ។ សមាគមនេះបន្តថា បន្ទាប់ពីការត្រួតពិនិត្យនៅកន្លែងត្រួតពិនិត្យរួចរាល់នៅខេត្តកាហ្គោស៊ីម៉ាភាគនិរតីប្រទេសជប៉ុន សាច់គោទាំងនោះត្រូវបាននាំចេញទៅកាន់ឃ្លាំងស្តុកសាច់គោនៅទីក្រុងសាន់ហ្រ្វាន់ស៊ីស្កូ សហរដ្ឋអាមេរិក ។
អ្នកនាំពាក្យសមាគមបានប្រាប់ទីភ្នាក់ងារព័ត៌មានបរទេសថា អាមេរិក គឺជាប្រទេសនាំចូលសាច់គោទី៣របស់ជប៉ុន បន្ទាប់ពីម៉ាកាវ និងហុងកុង ។ សាច់គោកូបេនេះ គឺសំដៅលើសាច់គោពូជតាជីម៉ា គីយូ (Tajima Gyu) ដែលកើតនិងធំលូតលាត់នៅក្នុងកសិដ្ឋានពិសេសមួយនៅខេត្តហ៊ីយ៉ូកូ នៅភាគខាងលិចជប៉ុន ។ ស្លាកសញ្ញានេះប្រើបានតែសម្រាប់សាច់គោដែលបំពេញតាមលក្ខណៈវិនិច្ឆ័យរបស់សមាគមនេះតែប៉ុណ្ណោះ ៕
ចែករំលែកព័តមាននេះ