រាជធានីភ្នំពេញ ៖ កាលពីថ្ងៃសៅរ៍ទី៦ និងអាទិត្យទី៧ មករា កីឡាករជើងខ្លាំងកម្ពុជា៣រូបត្រូវគេឃើញឡើងសង្វៀនទូរទស្សន៍អាស៊ីអាគ្នេយ៍រួមគ្នា ដោយការប្រដាល់របស់ពួកគេបានធ្វើឱ្យមានការតាមដានយ៉ាងខ្លាំងពីសំណាក់អ្នកស្នេហាវិស័យប្រដាល់ ក្នុងពេលដែលម្នាក់ៗសុទ្ធតែត្រូវប៉ះគ្នាជាមួយកីឡាករជើងខ្លាំងដូចគ្នា ។ អ្នកទាំង៣នាក់សុទ្ធតែជាតួឯកនៅក្នុងព្រឹត្តិការណ៍ប្រដាល់អន្តរជាតិផ្សេងគ្នា ដោយលទ្ធផលដែលបានស្ដែងឡើង ក៏ខុសគ្នាផងដែរ។
កីឡាករ ឈាន ហុង ដែលត្រូវគេស្គាល់ថា ជាជើងខ្លាំងមិនធម្មតាក្នុងប្រភេទទម្ងន់៦៣,៥គីឡូក្រាម គឺជាសមាសភាពមួយរូបដែលត្រូវឡើងប្រកួតកាលពីព្រឹកថ្ងៃសៅរ៍ ទី៦ មករា នៅក្នុងព្រឹត្តិការណ៍អន្តរជាតិរបស់ទូរទស្ស៍អាស៊ីអាគ្នេយ៍ ដោយត្រូវប៉ះប្រកួតជាមួយកីឡាករ Phat Chhaydom ។
អ្នកទាំងពីរប៉ះគ្នាក្នុងនាមជាគូឯកនៅក្នុងព្រឹត្តិការណ៍ ខណៈដែលលទ្ធផលរបស់ពួកគេហាក់ធ្វើឱ្យអ្នកស្នេហាវិស័យប្រដាល់ភាគច្រើនបង្ហាញការខកចិត្ត ជាពិសេសក្នុងពេលដែលកីឡាករកម្ពុជាត្រូវគេស្គាល់ថាជាជើងខ្លាំង និងល្បីឈ្មោះមិនធម្មតា ប៉ុន្តែបែរជាមានលទ្ធផលមិនដូចបំណង ។ ត្រឹមតែទឹកទី៣ប៉ុណ្ណោះ កីឡាករ ឈាន ហុង ត្រូវបានជើងខ្លាំងមកពីប្រទេសថៃវាយឱ្យខ្ចប់នៅលើរេញ ហើយលទ្ធផលចុងក្រោយក៏បានបរាជ័យ ដោយសារតែមិនអាចបន្តការប្រកួតតាមការចង់បាន ។
ដ្បិតថា កីឡាករកម្ពុជារូបនេះ ប្រកាសថាខ្លួនមិនអាចទៅរួចជាមួយកីឡាករថៃទើបឈានដល់ការបោះបង់ការប្រកួត ប៉ុន្តែអ្នកខ្លះក៏ចោទថាលោកមានបំណងស៊ីឡាកទើបខំធ្វើជាប្រកួតមិនកើតក្នុងពេលកីឡាករថៃថែមលើស តែលទ្ធផលចុងក្រោយគឺគណៈកម្មការនៅតែសម្រេចឱ្យកីឡាករថៃជាអ្នកឈ្នះផ្ទុយពីការរំពឹងទុក ។ កីឡាករ ឈាន ហុង បានធ្វើឱ្យម្នាក់ៗខកចិត្តមិនតិចនោះទេ ក្នុងពេលដែលគេប្រកួតក្នុងអំឡុង២ទឹកដំបូងគឺមិនសូវបានល្អនោះទេ ប៉ុន្តែគ្រាន់តែឈានដល់ទឹកទី៣ភ្លាម ក៏ផ្ទុះរឿងចម្រូងចម្រាស ហើយដោយសារតែកីឡាករថៃភ្លាត់ថែមលើសពីការកំណត់ក្នុងច្បាប់របស់សហព័ន្ធផង ទើបធ្វើឱ្យជើងខ្លាំងឈាន ហុង ដែលរាងពិបាកស៊ីលើកីឡាករថៃមានបំណងចាប់កំហុស តែលទ្ធផលចុងក្រោយគឺលោកបែរជាត្រូវគេឱ្យចាញ់ដោយខ្លួនឯង។
យ៉ាងណាមិញ លោកបានបញ្ជាក់ថា មួយស្នៀតរបស់កីឡាករថៃពិតជាធ្វើឱ្យលោកបន្តតស៊ូមិនរួចពិតមែន ទើបធ្វើឱ្យលោកសម្រេចចិត្តបោះបង់ មិនមែនដូចគណៈកម្មការចោទលោកថាធ្វើពុតមិនចង់ប្រកួតបន្តទេ ។ លោកមិនត្រូវបានគណៈកម្មការប្រកាសពីការចាប់កំហុសនោះទេ តែក៏បានដាក់សំណើឱ្យលោកប្រឹងប្រកួតឱ្យបានល្អ ដើម្បីកុំឱ្យមានរឿងរិះគន់ក្រោយពេលប្រកួតចាញ់ផងដែរ ។ ឈាន ហុង ត្រូវគេដឹងថា ធ្លាប់ប្រកួត៧០លើកប្រហាក់ប្រហែលនឹងកីឡាករថៃ ដែលធ្លាប់ប្រកួតបាន៧២លើក។
មឿន សុខហ៊ុច គឺជាកីឡាករជើងខ្លាំងរបស់ប្រទេសកម្ពុជា និងជាម្ចាស់ខ្សែក្រវាត់អន្តរជាតិមួយរូបមកពីប្រទេសថៃកាលពីមុនផងដែរ ទើបរាល់ការឡើងប្រកួតរបស់កីឡាកររូបនេះរមែងមានការចាប់អារម្មណ៍ ។
លោកត្រូវគេឱ្យឡើងប្រកួតក្នុងព្រឹត្តិការណ៍អន្តរជាតិរបស់ទូរទស្សន៍អាស៊ីអាគ្នេយ៍ផងដែរ ដោយលោកជាគូឯកនៅក្នុងព្រឹត្តិការណ៍ពេលរសៀលកាលពីថ្ងៃសៅរ៍ទី៦ មករា ដោយគូប្រកួតរបស់លោកគឺកីឡាករថៃឈ្មោះ Song Yuat ខណៈដែលការប្រកួតរបស់គូនេះបានចាប់ផ្ដើមឡើងយ៉ាងទាក់ទាញតាំងពីដើមទី តែនៅចុងទឹកហាក់មានភាពរង្វើលដាក់គ្នាបន្តិច ។
នេះជាគូអន្តរជាតិធំមួយសម្រាប់ព្រឹត្តិការណ៍ប្រដាល់អន្តរជាតិពេលរសៀលថ្ងៃសៅរ៍ ដែលទូរទស្សន៍អាស៊ីអាគ្នេយ៍បានប្រកាសសម្រិតសម្រាំងនៅអំឡុងដើមខែមករា ឆ្នាំ២០១៨ ដើម្បីទាក់ទាញអ្នកទស្សនា និងអ្នកគាំទ្រឱ្យចង់តាមដាន ។ ក្នុងទឹកទី១ កីឡាករទាំង២មិនមានអ្នកណាមានប្រៀបជាងអ្នកណានោះទេ ដោយគេឃើញម្នាក់ៗប្រើពេលស្ទាបស្ទង់ដាក់គ្នាទៅវិញទៅមក មិនសូវធ្វើការវាយលុកឱ្យអស់ដៃនោះទេ ។
កីឡាករទាំងពីរ សុទ្ធតែប្រើកែង និងម៉ាត់ៗប្រដេញគ្នានៅទឹកទី២ តែគេឃើញកីឡាករកម្ពុជាចាប់ផ្ដើមនាំមុខកណ្ដាប់ដៃ និងមានប្រៀបជាង បើទោះជាក្នុងទឹកនេះកីឡាករកម្ពុជាទទួលរងកណ្ដាប់ដៃមិនធម្មតាជាច្រើនរបស់ថៃបកត្រឡប់មកវិញក្ដី ។
អ្នកទស្សនាកាន់តែមើលឃើញពីភាពតានតឹងសម្រាប់ការប្រកួតរបស់គូទាំង៣នៅពេលដំណាក់កាលវាលលុកឈានដល់ទឹកទី៣ ដែលត្រូវបានគេរាប់ថាជាទឹកពិបាកក្នុងការស្ទាបស្ទង់ ដោយសារតែកីឡាករថៃក៏បញ្ចេញភាពខ្លាំង ហើយកីឡាករកម្ពុជាក៏បង្កើនថ្វីដៃ ។ ម្ចាស់ខ្សែក្រវាត់ល្បីឈ្មោះរបស់កម្ពុជាលោក មឿន សុខហ៊ុច ធ្វើឱ្យអ្នកទស្សនាកាន់តែពេញចិត្ត ដោយសារតែគេហ៊ានស្ទុះវាយទៅលើគូប្រកួតដោយមិនខ្លាចរងរបួស ហើយធ្វើឱ្យអ្នកទស្សនាស្ទើរមិនហ៊ានធ្មេចភ្នែក ព្រោះតែជក់ចិត្ត ។
នៅទឹកទី៤ កីឡាករកម្ពុជានៅតែរក្សាលំនឹងនាំមុខ ប៉ុន្តែឈានដល់ដើមទឹកទី៥ កីឡាករកម្ពុជាត្រូវកីឡាករថៃវាយត្រូវខ្ចប់ៗវិញ ហើយនៅអំឡុងចុងទឹកគឺភាគីទាំង២ ហាក់រយាលរៀងខ្លួន ធ្វើឱ្យលោកអាជ្ញាកណ្ដាលបញ្ជាឱ្យវ៉ៃ ក៏នៅតែមិនវ៉ៃ។ មួយគូនេះបញ្ចប់ដោយកីឡាករកម្ពុជា ឈ្នះពិន្ទុ ក្នុងពេលដែលជ័យជម្នះរបស់គេ ក៏មានអ្នកទស្សនាគាំទ្រភាគច្រើនពេញចិត្ត និងសរសើរថា គេពិតជាមានថ្វីដៃមិនធម្មតាមែន ទើបអាចបំបាក់កីឡាករថៃរូបនេះ ដែលត្រូវគេស្គាល់ថាជាជើងខ្លាំងម្នាក់ ។
ទោះបីយ៉ាងណា ធៀបនឹងកម្រិតនៃការប្រកួត កីឡាករកម្ពុជាល្អជាងឆ្ងាយណាស់ ទើបជ័យជម្នះរបស់កម្ពុជាគឺគេមើលឃើញតាំងពីជំហានដំបូង ដោយមានអ្នកខ្លះបែរជារិះគន់ថាលោកមានប្រវត្តិប្រកួតល្អជាងច្រើនដង បែរជាឈ្នះកីឡាករថៃដោយពិន្ទុទាំងលំបាកនោះផង ។ កីឡាករថៃត្រូវគេប្រកាសថាទើបតែបានប្រកួត៨៥លើកប៉ុណ្ណោះ ឈ្នះ៧០លើក ក្នុងពេលដែលកីឡាករកម្ពុជា ប្រកួតបានដល់១៣៥លើក ឈ្នះ១០៨លើក។
កីឡាករជើងខ្លាំងកម្ពុជាចុងក្រោយ គឺកីឡាករ អ៊ុំ ចំរើន ដោយលោកត្រូវបានទូរទស្សន៍អាស៊ីអាគ្នេយ៍បើករេញឱ្យប្រកួតជាគូឯកនៅក្នុងព្រឹត្តិការណ៍ថ្ងៃអាទិត្យ ទី៧ មករា នៅវេលាម៉ោង២រសៀល ហើយលទ្ធផលក្រោយការប្រកួតយ៉ាងស្វិតស្វាញនៅលើសង្វៀនជាមួយកីឡាករថៃឈ្មោះ Super Chhai គឺត្រូវចាញ់កីឡាករថៃដោយពិន្ទុ ។
ការប្រកួតទាំង៥លើករបស់លោក មិនធ្វើឱ្យអ្នកទស្សនាពេញចិត្តនោះទេ ដោយសារតែលោកហាក់មិនសូវបញ្ចេញថ្វីដៃបានល្អដូចមុន ប៉ុន្តែអ្នកទស្សនាផ្សេងទៀតក៏យល់ឃើញថាបណ្ដាលមកពីគូប្រកួតរបស់លោកគឺជាជើងខ្លាំងម្នាក់ ហើយពិបាកវាយចូល ។
លោកត្រូវបានប្រកាសថាបរាជ័យទាំងមិនអស់ចិត្ត ហើយគណៈកម្មការទូរទស្សន៍អាស៊ីអាគ្នេយ៍ ក៏មានគម្រោងដាក់គូនេះឱ្យសងសឹកគ្នាជាថ្មីផងដែរ ក្នុងពេលខាងមុខដ៏ខ្លី ៕
ចែករំលែកព័តមាននេះ