បន្ទាយមានជ័យ ៖ មានរឿងចម្លែកខុសធម្មតាមួយ សពពលករខ្មែរម្នាក់ ក្រោយពីភាគីថៃបញ្ជូនឲ្យសាច់ញាតិតាមច្រកទ្វារអន្តរជាតិប៉ោយប៉ែត ដែលបានស្លាប់ដោយសាគ្រោះថ្នាក់ចរាចរណ៍ជិះកង់ឆ្លងផ្លូវត្រូវរថយន្តបុកនៅខេត្តឈុនបូរី ប្រទេសថៃ សាច់ញាតិជួលរថយន្តកាមរីដឹកដាក់ក្នុងគូទរថយន្តខុសពីធម្មតា។ ជនរងគ្រោះឈ្មោះ ភាន ប្លុង ភេទប្រុស អាយុ៤៤ឆ្នាំ ជាកម្មករធ្វើការនៅខេត្តឈុនបូរី ហើយមានទីលំនៅភូមិរវៀង ឃុំខ្វាវ ស្រុកជីក្រែងខេត្តសៀមរាប។
សាច់ញាតិប្រាប់ថា ជនរងគ្រោះជួបឧប្បត្តិហេតុគ្រោះថ្នាក់ចរាចរណ៍ពេលជិះកង់ឆ្លងផ្លូវ ត្រូវរថយន្តបុកស្លាប់កាលពីរសៀល ថ្ងៃទី៦ មករា ២០១៨។ អ្វីដែលចម្លែកគឺខណៈដែលសពត្រូវភាគីថៃដឹកមកប្រគល់ឲ្យក្រុមសាច់ញាតិ បានជួលរថយន្តកាមរីមួយគ្រឿងដើម្បីដឹកសពទាំងមឈូសយកទៅស្រុកកំណើត ប៉ុន្តែដោយសារថយន្តកាមរីនោះមិនអាចដឹកទាំងមឈូសបានក្រុមសាច់ញាតិ និងអ្នកបូជាសពនៅវត្តបាលិលេយ្យនៅក្រុងប៉ោយប៉ែត រកវិធីម៉ាស្សាសពបត់ជើងបញ្ឈរជង្គង់ធ្វើយ៉ាងណាអាចដាក់សពបញ្ចូលគូទរថយន្តបាន។ គួរបញ្ជាក់ថា កន្លងមកក៏មានសពពលករម្នាក់ត្រូវសាច់ញាតិជួលរថយន្តដឹកទៅស្រុកកំណើតដូចគ្នា ប៉ុន្តែកាលនោះគេដាក់មឈូសពីលើគូទរថយន្តខុសពីកាដឹកសពលើកនេះគឺគ្មានអ្នកដឹងឡើយ៕
ចែករំលែកព័តមាននេះ