មហាសេដ្ឋីចិនម្នាក់ដែលបា.ត់ខ្លួនយ៉ាងចម្លែក លាលែងពីតួនាទីទាំងអស់នៅក្រុមហ៊ុនរបស់គាត់
ប្រទេសចិន ៖ មហាសេដ្ឋីដ៏ល្បីនៅក្នុងវិស័យធនាគាររបស់ប្រទេសចិន លោក Bao Fan ដែលបាត់មុខ
ប្រទេសចិន ៖ មហាសេដ្ឋីដ៏ល្បីនៅក្នុងវិស័យធនាគាររបស់ប្រទេសចិន លោក Bao Fan ដែលបាត់មុខដោយចម្លែកជិត១ឆ្នាំ បានលាលែងពីតួនាទីទាំងអស់នៅក្រុមហ៊ុនរបស់គាត់គឺក្រុមហ៊ុន China Renaissance ។ នេះបើយោងតាមប្រភពពី BBC ចេញផ្សាយកាលពីថ្ងៃទី៣ ខែកុម្ភៈ ឆ្នាំ២០២៤ កន្លងទៅ។
China Renaissance ក្រុមហ៊ុនធនាគារឯកជនដ៏ធំបំផុតមួយនៅប្រទេសចិន ជំនាញខាងវិនិយោគវិស័យបច្ចេកវិទ្យាទំនើបជាន់ខ្ពស់ ដែលមានមូលដ្ឋាននៅទីក្រុងប៉េកាំង បានបញ្ជាក់ក្នុងសេចក្តីថ្លែងការណ៍មួយថា លោក Bao Fan បានសម្រេចចុះចេញពីតំណែងទាំងអស់លើហេតុផលសុខភាព និងចំណាយពេលវេលាបន្ថែមទៀតជាមួយគ្រួសាររបស់គាត់។
ការបាត់ខ្លួនភ្លាមៗ ដែលមិនអាចពន្យល់បានរបស់លោក Bao Fan កាលពីខែកុម្ភៈ ឆ្នាំមុន បានធ្វើឱ្យសហគមន៍អាជីវកម្ម និងវិនិយោគរបស់ប្រទេសចិនមានការភ្ញាក់ផ្អើលយ៉ាងខ្លាំង ហើយប៉ុន្មានថ្ងៃក្រោយមក ក្រុមហ៊ុន China Renaissance បានប្រកាសថា គាត់កំពុងសហការជាមួយអាជ្ញាធរសម្រាប់ការស៊ើបអង្កេត។
ក្រុមហ៊ុនបានបញ្ជាក់បន្ថែមថា លោក Bao Fan មិនមានការខ្វែងគំនិតជាមួយក្រុមប្រឹក្សាភិបាលនោះទេ ហើយក៏គ្មានបញ្ហាអ្វីផ្សេងទៀតដែលទាក់ទងនឹងការលាលែងពីតំណែងរបស់គាត់ ដែលត្រូវការឱ្យមានការយកចិត្តទុកដាក់ពីបណ្តាម្ចាស់ភាគហ៊ុនផងដែរ។ ទោះយ៉ាងណា រហូតមកទល់ពេលនេះ គ្មានការផ្តល់ព័ត៌មានលម្អិតណាមួយថា លោក Bao Fan ដែលជាធនាគារិកដ៏ល្បីបំផុតម្នាក់របស់ប្រទេសចិន និងមានបញ្ជីអតិថិជនរួមបញ្ចូលក្រុមហ៊ុនបច្ចេកវិទ្យាយក្ស Tencent, Alibaba និង Baidu កំពុងស្ថិតនៅទីណានោះទេ។
កាលពីខែកុម្ភៈ ឆ្នាំមុន ក្រុមហ៊ុន China Renaissance បានប្រកាសថា «ក្រុមប្រឹក្សាភិបាលបានដឹងថា បច្ចុប្បន្នលោក Bao កំពុងសហការក្នុងការស៊ើបអង្កេតមួយដែលត្រូវបានអនុវត្តដោយអាជ្ញាធរមួយចំនួនរបស់ចិន។ ក្រុមហ៊ុននឹងសហការយ៉ាងត្រឹមត្រូវ និងជួយជាមួយនឹងសំណើស្របច្បាប់ណាមួយពីអាជ្ញាធរចិន ដែលពាក់ព័ន្ធ ប្រសិនបើ និងនៅពេលណាដែលត្រូវបានអនុវត្ត»។
សេចក្តីប្រកាសនៅដើមខែកុម្ភៈ ឆ្នាំនេះ គឺជាលើកដំបូងរបស់ China Renaissance សម្រាប់ការផ្តល់ហេតុផលលើការបាត់ខ្លួនស្ថាបនិករបស់ពួកគេ។ ការបាត់ខ្លួនរបស់លោក Bao Fan ដែលទ្រព្យសម្បត្តិប្រមាណ ១.៧ពាន់លានដុល្លារអាមេរិក បានកើតឡើងប្រឆាំងនឹងបញ្ហាផ្ទៃក្នុងនៃការបង្ក្រាបបណ្តាក្រុមហ៊ុនបច្ចេកវិទ្យាឈានមុខដោយអាជ្ញាធរចិន។ ជាក់ស្តែងនៅចុងឆ្នាំ ២០២០ ស្ថាបនិកក្រុមហ៊ុន Alibaba លោក Jack Ma ក៏បានបាត់ខ្លួនពីសាធារណៈអស់រយៈពេល៣ខែផងដែរ បន្ទាប់ពីបានបញ្ចេញមតិរិះគន់ទៅលើនិយតករទីផ្សារចិន៕ (ប្រភព ៖ BBC)
ចែករំលែកព័តមាននេះ