(អន្តរជាតិ)៖ បុរសខាងលើបានបែកគ្នាជាមួយមិត្តស្រី ព្រោះតែគាត់ឡើងគីឡូនិងមានរូបរាងមិនស្អាត អំឡុងពេលដែលកូវីដបានរាតត្បាតហើយមានការចាក់សោប្រទេសនាកំឡុងពេលនោះ។ ប៉ុន្មានឆ្នាំក្រោយមក គាត់បានតាំងចិត្តហាត់ប្រាណ និងតមអាហារ ដើម្បីស្រកបាន៦៤គីឡូក្រាម។
យោងតាមសារព័ត៌មាន New York Post លោក Nithun Puvirajasingam អាយុ២៧ឆ្នាំ បានឡើងគីឡូយ៉ាងឆាប់រហ័យ ពី១០០គីឡូ ដល់ ១៤៤គីឡូ អំឡុងពេលកូវីដ។ ហើយមិត្តស្រីរបស់គាត់ទ្រាំមិនបានពេលឃើញលោកលែងសង្ហា ហើយចុងក្រោយក៏និយាយលា។
ការងាកចេញពីអតីតគូស្នេហ៍របស់លោកបានដាស់សតិឱ្យលោក តាំងចិត្តថានឹងធ្វើឲ្យជីវិតរបស់លោកល្អប្រសើរជាងមុន ពេលបែកគ្នាភ្លាមៗលោកក៏ធ្លាប់មានគំនិតអវិជ្ជមាន ជៀសវាងការជួបជុំមិត្តភ័ក្តិ បន្ទាប់ពីខូចចិត្តអស់ពីរសប្តាហ៍ គាត់បានសម្រេចចិត្តថាគាត់ត្រូវផ្លាស់ប្តូរជីវិតរបស់គាត់។
ចាប់ពីខែកុម្ភៈ ឆ្នាំ២០២១ គាត់បានកែសម្រួលរបបអាហាររបស់គាត់បន្តិចម្តងៗ ឈប់ជក់បារី និងហាត់ប្រាណ រហូតបីឆ្នាំក្រោយមក លោកមិនត្រឹមតែមានរូបរាងស្អាតនោះទេ ថែមទាំងទទួលបានអាជ្ញាប័ណ្ណក្លាយជាគ្រូបង្វឹកហាត់ប្រាណនៅទីក្រុងឡុងដ៍ (ចក្រភពអង់គ្លេស)។
លោកបាននិយាយក្នុងបទសម្ភាសន៍មួយថា «ខ្ញុំបានស្រកទម្ងន់បន្ទាប់ពីព្យាយាមអស់រយៈពេល ៣ឆ្នាំមក ហើយមកទល់ពេលនេះខ្ញុំមិនដែលឈប់សម្រាកលើសពីមួយសប្តាហ៍ទេ។ ខ្ញុំមានអារម្មណ៍ល្អណាស់ នៅពេលមានរូបរាងសង្ហារហើយមិនអាចស្រមៃថានឹងត្រលប់ទៅរបៀបរស់នៅបែបនោះវិញទេ»។
តាមពិតទៅបុរសរូបនេះ ក៏ជាអ្នកលេងកីឡាបាល់ឱប និងទៅកន្លែងហាត់ប្រាណជាប្រចាំរហូតដល់ជំងឺរាតត្បាតរាធ្វើឱ្យគាត់ និងគ្រប់គ្នានៅជាប់ក្នុងផ្ទះ។ គាត់បាននិយាយថា៖ «ទម្ងន់ចេះតែឡើងខ្លាំងអំឡុងពេលនៅជាមួយមិត្តស្រីរបស់ខ្ញុំ ហើយទទួលទាន ផឹក និងជក់បារីច្រើន»។
ទោះជាយ៉ាងណា ក្រោយបែកគ្នាលោកក៏មិនបញ្ចេញឈ្មោះសង្សារចាស់ឡើង លោកនិយាយបែបវិជ្ជមានថា បើនាងមិនចាកចេញ លោកក៏មិនផ្លាស់ប្តូរដែរ៕
ប្រភព ៖ nypost
ចែករំលែកព័តមាននេះ