អន្តរជាតិ ៖ ស្តេចមានព្រះរាជទ្រព្យច្រើនបំផុតទាំង៥អង្គនៅអាស៊ី មានព្រះរាជទ្រព្យរបូកបញ្ចូលមានប្រមាណ ១០៨ពាន់លានដុល្លារអាម៉េរិក ដោយនៅក្នុងនោះ ព្រះមហាក្សត្រប្រទេសថៃ Maha Vajiralongkorn និងស្តេចស៊ុលតង់ Hassanal Bolkiah នៃប្រទេសប្រ៊ុយណេ ពោរពេញទៅដោយភាពលេចធ្លោខ្លាំងក្នុងចំណោមព្រះមហាក្សត្រនៅអាស៊ី។
ប្រភពពីគេហទំព័រ The Business Standard បានបង្ហាញថា ព្រះមហាក្សត្រថៃ Maha Vajiralongkorn ស្ថិតនៅកំពូលបញ្ជីជាមួយនឹងព្រះរាជទ្រព្យត្រូវបានប៉ាន់ស្មានមានចំនួន ៤៣ពាន់លានដុល្លារអាម៉េរិក។ ព្រះរាជទ្រព្យដ៏ធំរបស់ព្រះអង្គភាគច្រើនបានមកពីអចលនទ្រព្យ ដែលបង្កើតបានជាចំណែកដ៏ធំបំផុតនៃព្រះរាជទ្រព្យសរុបរបស់ទ្រង់។ យោងតាមទស្សនាវដ្ដី Fortune បានរាយការណ៍ថា ព្រះអង្គបានកាន់កាប់ដីធ្លីយ៉ាងហោចណាស់ ៦៥.៦គីឡូម៉ែត្រការ៉េនៅទូទាំងប្រទេសថៃ រួមទាំងតំបន់មានតម្លៃខ្ពស់នៅទីក្រុងបាងកក តម្លៃប្រហែល ៣០ពាន់លានដុល្លារ។
លើសពីនេះ ព្រះអង្គទទួលបានអត្ថប្រយោជន៍ពីប្រភពចំណូលចម្រុះ ដោយកាន់កាប់ភាគហ៊ុនសំខាន់ៗនៅក្នុងអង្គភាពហិរញ្ញវត្ថុ និងឧស្សាហកម្មសំខាន់ៗមួយចំនួនរបស់ប្រទេសថៃ។ នេះរួមបញ្ចូលទាំងភាគហ៊ុន ២៣% នៅក្នុងក្រុមហ៊ុនផ្តល់ប្រាក់កម្ចីធំទី២របស់ថៃ គឺធនាគារ Siam Commercial Bank និងភាគហ៊ុន ៣៣% នៅក្នុងក្រុមហ៊ុនSiam Cement Group ដែលជាក្រុមហ៊ុនឧស្សាហកម្មឈានមុខគេរបស់ប្រទេសថៃ ដែលមានតម្លៃប្រហែល ៩ពាន់លានដុល្លារ។ ការប្រមូលគ្រឿងប្រណីតម្លៃថ្លៃៗរបស់ព្រះអង្គក៏មានយន្តហោះ ៣៨គ្រឿង យានជំនិះប្រណីតៗ ៣០០គ្រឿង ទូកជាង ៥០ គ្រឿង និងពេជ្រ និងត្បូងដ៏មានតម្លៃជាច្រើនផងដែរ។
ស្តេចស៊ុលតង់ Hassanal Bolkiah នៃប្រទេសប្រ៊ុយណេ ស្ថិតនៅចំណាត់ថ្នាក់លេខ២ ជាមួយនឹងព្រះរាជទ្រព្យត្រូវបានរាយការណ៍ដោយទស្សនាវដ្តី Time ថាមានចំនួនប្រហែល ២៨ពាន់លានដុល្លារអាម៉េរិក។
យោងតាមប្រភពពីវេទិកាព័ត៌មានរថយន្ត CarBuzz បានរាយការណ៍ថា របៀបរស់នៅដ៏សម្បូរបែបរបស់ទ្រង់រួមមានទាំងការប្រមូលទិញរថយន្តគួរឱ្យកត់សម្គាល់ដែលមានតម្លៃសរុប ៥ពាន់លានដុល្លារ ដោយនៅក្នុងចំណោមរថយន្តកំពូលប្រណីត Rolls-Royces ប្រមាណ ៦០០គ្រឿង រថយន្តស្ព័រ Ferraris ចំនួន ៤៥០គ្រឿង និង Bentley ចំនួន ៣៨០គ្រឿង ដូចដែលត្រូវបានរាយការណ៍កាសែត The Sun។
លើសពីនេះ ស្តេចស៊ុលតង់ និងគ្រួសាររាជវង្សទ្រង់រស់នៅក្នុងព្រះរាជវាំង Istana Nurul Iman ដ៏ធំបំផុតរបស់ពិភពលោក ដែលមានបន្ទប់ចំនួន ១,៧៨៨បន្ទប់ ដែលបញ្ចប់ការសាងសង់កាលពីឆ្នាំ ១៩៨៤ នៅក្នុងតម្លៃ ១.៥ពាន់លានដុល្លារ។
ព្រះអង្គម្ចាស់ Salman នៃប្រទេសអារ៉ាប៊ីសាអូឌីត គឺជាស្តេចមានព្រះរាជទ្រព្យច្រើនលំដាប់ទី ៣ នៅអាស៊ី ដោយសារព័ត៌មានអាជីវកម្មអាមេរិក CNBC បានរាយការណ៍ថា ព្រះរាជទ្រព្យរបស់ទ្រង់មានចំនួន ១៧ពាន់លានដុល្លារ។
ចាប់តាំងពីភារកិច្ចដឹកនាំប្រទេសជាច្រើនបានផ្ទេរទៅកាន់ព្រះរាជបុត្ររបស់ព្រះអង្គម្ចាស់នោះ គឺព្រះអង្គម្ចាស់ Mohammed Bin Salman មានប្រព័ន្ធផ្សព្វផ្សាយតិចណាស់ ដែលផ្តោតលើរបៀបរស់នៅផ្ទាល់ព្រះកាយរបស់ស្តេច Salman ។
ចំណាត់ថ្នាក់ទី ៤ គឺព្រះអង្គម្ចាស់ Sheikh Mohammed bin Rashid Al Maktoum នៃទីក្រុងឌូបៃ (Dubai) ប្រទេសអារ៉ាប់រួម ដែលមានព្រះរាជទ្រព្យត្រូវបានប៉ាន់ស្មានចន្លោះពី ១៤ ទៅ ១៨ពាន់លានដុល្លារ។ នេះបើយោងតាមកាសែត Hindustan Times ។
ប្រភពពី Financial Times បានរាយការណ៍ថា ព្រះអង្គម្ចាស់ Sheikh Mohammed មានភាពល្បីល្បាញដោយសារព្រះរាជគំនិតផ្តួចផ្តើមរបស់ព្រះអង្គបានដាក់ទីក្រុងឌូបៃក្លាយជាមជ្ឈមណ្ឌលពិភពលោក រួមទាំងការមើលការខុសត្រូវលើការអភិវឌ្ឍគម្រោងនានាដូចជា Palm Islands សណ្ឋាគារ Burj Al Arab ក៏ដូចជាអគារ Burj Khalifa ដែលជាអគារខ្ពស់ជាងគេនៅលើពិភពលោក។ ព្រះអង្គក៏ត្រូវបានគេស្គាល់យ៉ាងច្បាស់ផងដែរ សម្រាប់ការចាប់អារម្មណ៍របស់ទ្រង់នៅក្នុងៃសកម្មភាពជំនាញលើការជិះសេះ និងកំណាព្យអារ៉ាប់ដោយរំលេចចំណាប់អារម្មណ៍ខុសៗគ្នារបស់ទ្រង់។
ដោយឡែក ព្រះអង្គម្ចាស់ Sheikh Tamim bin Hamad Al Thani នៃប្រទេសកាតា ឈរនៅចំណាត់ថ្នាក់លេខ៥ ជាមួយនឹងព្រះរាជទ្រព្យត្រូវបានប៉ាន់ស្មានចំនួន ២ពាន់លានដុល្លារអាម៉េរិក ដូចដែលកាសែត The Sun បានរបាយការណ៍។
ប្រភពដដែលបានរាយការណ៍ថា ការវិនិយោគរបស់ព្រះអង្គ និងគ្រួសាររាជវង្សទ្រង់ នៅក្នុងអចលនទ្រព្យសំខាន់ៗទូទាំងពិភពលោករួមមាន ទីតាំងសំខាន់ៗដូចជា London’s Shard, Olympic Village និង New York’s Empire State Building។ ព្រះអង្គក៏បានទិញយកក្លិបបាល់ទាត់ Paris Saint-Germain នៅក្នុងឆ្នាំ ២០១១ ផងដែរ តាមរយៈក្រុមហ៊ុន Qatar Sports Investments ។ (ប្រភព ៖ VnExpress)
ចែករំលែកព័តមាននេះ