រាជធានីភ្នំពេញ ៖ ការបង្ហាញខ្លួនជាថ្មីរបស់កីឡាករលាភ សំណាង កាលពីថ្ងៃទី២៤ ធ្នូ នៅលើសង្វៀនទូរទស្សន៍អាស៊ីអាគ្នេយ៍ បានធ្វើឱ្យម្នាក់ៗជាពិសេសអ្នកស្នេហាវិស័យប្រដាល់មានការភ្ញាក់ផ្អើលយ៉ាងខ្លាំង ដោយសារតែកីឡាកររូបនេះបាត់មុខសូន្យឈឹងមិនក្រោម៤ឆ្នាំនោះទេ ហើយទើបតែលេចមុខជាថ្មីនៅលើសង្វៀន ។
នេះគឺជាការប្រកួតបើកឆាករបស់កីឡាកររូបនេះ បន្ទាប់ពីបាត់មុខពីសង្វៀនប្រដាល់ខណៈការបង្ហាញខ្លួនរបស់លោកក៏ធ្វើឱ្យមានការចាប់អារម្មណ៍មិនតិចនោះដែរ ដោយសារតែលោកបាត់មុខយូរក៏ពិតមែន ប៉ុន្តែនៅខ្លាំងអាចវាយផ្ដួលជើងខ្លាំងជំនាន់ថ្មីឱ្យសន្លប់មុនចប់ទឹកទី៥។
យ៉ាងហោចអ្នកស្នេហាវិស័យប្រដាល់ជាងពាក់កណ្ដាលបានបង្ហាញការចាប់អារម្មណ៍ចំពោះវត្តមានរបស់កីឡាករលាភ សំណាង ដែលធ្លាប់ត្រូវបានទទួលស្គាល់ថាជាជើងខ្លាំងមុនលោកបាត់មុខ ។ ការប្រកួតនៅក្នុងពេលនោះ គ្មានអ្នកណាមិនស្គាល់ថ្វីដៃកីឡាកររូបនេះនោះទេ ជាពិសេសក្នុងពេលដែលគេមានមុខឡើងរេញជាមួយកីឡាកររួមជំនាន់ដូចគ្នា បូករួមទាំងការប្រកួតជាលក្ខណៈជ្រើសរើសជើងឯក ឬការប្រកួតជាលក្ខណៈអន្តរជាតិ ។ លោកត្រូវបានគេដឹងថាជាកីឡាករដែលមានថ្វីដៃល្អម្នាក់ ប៉ុន្តែស្ថិតក្នុងសភាពល្បី និងមានការទទួលស្គាល់ស្រាប់តែបាត់មុខសូន្យ ដោយមានការបញ្ជាក់ថាលោកបោះបង់ការប្រកួតទាំងស្រុង ។
ក្នុងជំនួបជាថ្មីនៅលើសង្វៀនទូរទស្សន៍អាស៊ីអាគ្នេយ៍ កីឡាករ លាភ សំណាង បានអះអាងថា ក្នុងពេលលោកនៅប្រដាល់កាលពីអំឡុងពេលមុនលោកថាទទួលបានតម្លៃខ្លួនតិចតួចៗប៉ុណ្ណោះ ទើបលោកសម្រេចចិត្តលាឈប់ការប្រដាល់ហើយរត់ទៅស៊ីឈ្នួលនៅក្នុងប្រទេសថៃ ដោយក្នុងរយៈពេលប្រមាណជា៤ឆ្នាំក្នុងពេលបាត់មុខនោះ លោកទៅធ្វើការជាកម្មករសំណង់ផង ជាកម្មករលីសែង និងធ្វើការរោងចក្រផង ដោយខ្សែជីវិតគឺដ្បិតថាទទួលបានប្រាក់ប្រចាំខែ ប៉ុន្តែការរស់នៅក៏មិនល្អប៉ុន្មានដែរ ។ជាពិសេសក្នុងពេលដែលលោកមានជំងឺម្ដងៗ ហើយត្រូវយកលុយដែលប្រឹងរកបាននោះមកមើលខ្លួន ។
លោកថា រយៈពេលច្រើនឆ្នាំនៅក្នុងប្រទេសថៃ លោកមិនខុសពីកម្មករដែលបានតែមួយរស់ៗប៉ុណ្ណោះ ទើបលោកសម្រេចចិត្តឈប់ធ្វើការហើយត្រូវត្រឡប់មកកម្ពុជាវិញ ដោយប្រកាសវិលចូលការប្រដាល់ជាថ្មីនោះផង បន្ទាប់ពីបានកត់សម្គាល់ថា ការប្រដាល់នាពេលចុងក្រោយទទួលបានតម្លៃខ្លួនល្អប្រសើរ គឺមិនដូចក្នុងពេលលោកនៅប្រឡូក ។
លោកបានចូលជ្រកក្នុងក្លិបកងពលតូចលេខ៧០ ហើយក្រោមការហ្វឹកហាត់ជាថ្មីបានមួយរយៈក៏ត្រូវប្រធានក្លិបដាក់ឱ្យប្រកួតកាលពីថ្ងៃទី២៤ ធ្នូ នៅលើសង្វៀនទូរទស្សន៍អាស៊ីអាគ្នេយ៍ ដោយត្រូវប្រកួតជាមួយកីឡាករមានថ្វីដៃវ័យក្មេងគឺកីឡាករ ពុទ្ធ ម៉ាណូយ ។ លោកថា ការប្រកួតជាលើកដំបូងនោះលោកមិនសូវមានទំនុកចិត្តក្នុងការយកឈ្នះប៉ុន្មានទេ ដោយសារតែលោកខានប្រដាល់យូរ អាចស្ពឹកដៃស្ពឹកជើងមិនសូវស្វាហាប់ដូចអំឡុងជាង៤ឆ្នាំមុនពេលលោកបាត់មុខទៅធ្វើកូនគូលីនៅក្នុងប្រទេសថៃ ។
លោកបង្ហាញអារម្មណ៍សប្បាយចិត្តក្នុងពេលដែលការតាំងចិត្តរបស់លោកហុចផលវិជ្ជមាន ព្រោះតែការប្រកួតដែលបានបង្ហាញមុខនេះ លោកអាចទទួលជ័យជម្នះ។ ក្នុងនោះលោកថា នោះក៏ជាចលករជួយឱ្យលោកកាន់តែមានមហិច្ឆតាចង់ឡើងប្រកួតឱ្យបានញឹកញាប់ដូចដើមជាថ្មីផងដែរ ដើម្បីឱ្យលោកទទួលបានប្រាក់ចំណូលច្រើនគួរសម ក្រោយការបញ្ចប់ការងារនៅក្នុងប្រទេសថៃ ។ លោកថា ក្រោយឈប់ធ្វើការនៅក្នុងប្រទេសថៃ លោកសម្លឹងឃើញតែការប្រដាល់ប៉ុណ្ណោះ ចំណែកការងារផ្សេងៗនៅមិនទាន់ច្បាស់ថាធ្វើអ្វីនោះទេ ដោយសារតែលោកមិនសូវមានចំណេះដឹងច្រើនដើម្បីស្វែងរកការងារល្អ ។
យ៉ាងណាក៏ដោយ លោកថាការងារអ្វីក៏លោកនឹងឆ្លៀតពេលធ្វើនោះដែរ គឺមិនប្រកាន់ខ្លួនទេ ឱ្យតែការងារនោះអាចឱ្យលោកដកឃ្លាទៅហ្វឹកហាត់ដើម្បីឡើងរេញយកលុយបាន ។ លោកថា ខ្លួននៅតែមានស្ថានភាពរស់នៅលំបាក ហើយការប្រដាល់លើកនេះបើលោកឡើងរេញទទួលការបរាជ័យផ្ទួនៗក៏លោកមិនត្រាំត្រែងឱ្យមានការរិះគន់នោះទេ ទើបលោកចំណាយពេលច្រើនក្នុងមួយរយៈចុងក្រោយ ដើម្បីទទួលការប្រដាល់ដោយទំនុកចិត្តដើម្បីកសាងកេរ្តិ៍ឈ្មោះជាថ្មី ។ លោកសម្ដែងការសប្បាយចិត្តដែលមានអ្នកគាំទ្រភាគច្រើននៅតែស្គាល់ស្នាដៃរបស់លោក ហើយមានការគាំទ្របន្ទាប់ពីលោកវាយឈ្នះគូប្រកួតកាលពីថ្ងៃអាទិត្យម្សិលម្ង៉ៃនោះ។
ងាកទៅកាន់ការប្រកួតនាថ្ងៃបើកឆាកក្នុងអាជីពជាថ្មីនោះវិញ គេសង្កេតឃើញថា កីឡាករ លាភ សំណាង ដ្បិតថាខានប្រដាល់ជាង៤ឆ្នាំ ប៉ុន្តែថ្វីដៃសម្រាប់ការប្រកួតរបស់គេទទួលបានការចាប់អារម្មណ៍មិនតិចនោះទេ រហូតដល់ថ្នាក់ធ្វើឱ្យកីឡាករ ពុទ្ធ ម៉ាណូយ ដែលជាជើងខ្លាំងមកពីក្លិបពុទ្ធសិរីវង្សខណ្ឌពោធិសែនជ័យ ដួលក្រោកលែងរួចតែម្ដង ជាពិសេសលើបច្ចេកទេសវាយម៉ាត់ និងកែង។
កីឡាករជើងចាស់រូបនេះ នៅតែមានសមត្ថភាពខ្ពស់បើទោះជាការវាយលុករបស់គេបើធៀបនឹងរយៈពេលមុនបាត់មុខ គឺរាងធ្លាក់ដៃបន្តិច។ ពេញមួយទឹកទី២ និងទឹកទី៣ គេឃើញកីឡាករបង្គោលខៀវរូបនេះទទួលជោគជ័យហួសពីការស្មាន ដោយសារតែអាចរកឃើញចំណុចខ្សោយរបស់គូប្រកួត ហើយវាយត្រូវខ្ចប់ៗធ្វើឱ្យកីឡាករ ពុទ្ធ ម៉ាណូយ ទ្រមខ្លួន រហូតរកកន្លែងតបតលែងឃើញ ។ ចំហាយប្រកួតល្អក្នុងអំឡុង២ទឹកនេះហើយ ដែលក្នុងទឹកទី៤ក៏ធ្វើឱ្យកីឡាករ ពុទ្ធ ម៉ាណូយ ឈានដល់សន្លប់ និងរាប់ដល់១០តែម្ដង បន្ទាប់ពីកែង និងម៉ាត់របស់កីឡាករជើងចាស់រូបនេះ វាយត្រូវកន្លែងសំខាន់ផ្ទួនៗ ។
អាជ្ញាកណ្ដាលសម្រេចបញ្ឈប់ការប្រកួតភ្លាមៗបន្ទាប់ពីឃើញកីឡាករបង្គោលក្រហមតស៊ូលែងរួច និងដោយកត់សម្គាល់ឃើញកីឡាករលាភ សំណាង ឡើងសន្ទុះល្អពេញទំហឹងក្នុងរយៈពេល៣ទឹកចុងក្រោយនោះផង ។ កីឡាករដែលធ្លាប់ឃុំគ្រងតំណែងជើងខ្លាំងរូបនេះមានអារម្មណ៍សប្បាយរីករាយយ៉ាងខ្លាំង បន្ទាប់ពីប្រកាសថាបានឈ្នះគូប្រកួត ក្នុងពេលដែលលោកទើបតែឡើងប្រកួតជាលើកទី១ក្រោយការបាត់មុខ ។
យ៉ាងណាមិញ អ្នកគាំទ្រមិនច្រើនប៉ុន្មានទេ បានផ្ដល់ប្រាក់ធីបដល់លោកនៅពេលកីឡាកររូបនេះដើរក្រឡឹងសង្វៀនក្រោយប្រកាសថាឈ្នះ បើទោះជាមានអ្នកគាំទ្រម្នាក់ស្រែកថាផ្ដល់លុយលើកទឹកចិត្តដល់គាត់ខ្លះទៅ គាត់ខានប្រដាល់យូរហើយ ឱ្យគាត់មានកម្លាំងចិត្តទទួលយកការប្រកួតទៀត ។ កីឡាកររូបនេះ ត្រូវបានលោកញាណ សុធី អ្នករៀបចំការប្រកួតប្រកាសថា នឹងដាក់ឱ្យប្រកួតបានច្រើនដើម្បីឱ្យលោករស់ដៃរស់ជើង កុំឱ្យស្ពឹកស្រពន់ក្រោយការប្រកាសឡើងរេញ ។
លោកថា សមត្ថភាពកីឡាកររូបនេះនៅតែល្អដដែលទេ ទើបលោកសម្រេចចិត្តបន្តឱ្យឡើងប្រកួតនៅលើសង្វៀនទូរទស្សន៍អាស៊ីអាគ្នេយ៍ក្នុងពេលបន្តបន្ទាប់ ៕
ចែករំលែកព័តមាននេះ