រាជធានីភ្នំពេញ ៖ ប្រជាពលរដ្ឋប្រមាណជិត១០០គ្រួសាររស់នៅក្នុងភូមិត្រពាំងសំព័រ និងភូមិជម្រៅ សង្កាត់គោករការ ខណ្ឌព្រែកព្នៅ បានទទួចសុំឱ្យអាជ្ញាធរជួយអន្តរាគមន៍តបណ្តាញទឹក និងភ្លើងរដ្ឋបានប្រើប្រាស់បន្ទាប់ពីពួកគេបានផ្តិតមេដៃស្នើសុំជាច្រើនលើកតាំងពីពាក់កណ្តាលឆ្នាំ២០១៥បានស្ងាត់ឈឹងរហូតមក ។ លោក…
រាជធានីភ្នំពេញ ៖ ប្រជាពលរដ្ឋប្រមាណជិត១០០គ្រួសាររស់នៅក្នុងភូមិត្រពាំងសំព័រ និងភូមិជម្រៅ សង្កាត់គោករការ ខណ្ឌព្រែកព្នៅ បានទទួចសុំឱ្យអាជ្ញាធរជួយអន្តរាគមន៍តបណ្តាញទឹក និងភ្លើងរដ្ឋបានប្រើប្រាស់បន្ទាប់ពីពួកគេបានផ្តិតមេដៃស្នើសុំជាច្រើនលើកតាំងពីពាក់កណ្តាលឆ្នាំ២០១៥បានស្ងាត់ឈឹងរហូតមក ។
លោក ពួក ម៉ៃ បានឱ្យដឹងទៀតថា កាលពីពាក់កណ្តាលឆ្នាំ២០១៥ពួកគាត់រួមទាំងប្រជាពលរដ្ឋបានផ្តិតដៃស្នើសុំ ទឹកស្អាត ដែលកាលនោះមានប្រជាពលរដ្ឋតែចំនួន១០គ្រួសារបាននាំគ្នាផ្តិតមេដៃអមជាមួយលិខិតបញ្ជាក់ពី លោក សាំង ស៊ីន ចៅសង្កាត់គោករការ និងលោក សុខ សម្បត្តិ អភិបាលខណ្ឌព្រែកព្នៅ ហើយក្រោយមកត្រូវបានខាងរដ្ឋាករទឹកឱ្យលិខិតដោយសន្យាថា ចុះមកតបណ្តាញនៅខែមករា ឆ្នាំ២០១៧ ហើយស្ងាត់រហូតមក ។ នៅពេលនោះនៅតំបន់នោះក្នុងភូមិត្រពាំងសំព័រ និងភូមិជម្រៅ មានប្រជាពលរដ្ឋមករស់នៅប្រមាណជិត១០០គ្រួសារហើយ ។
លោក រិន តារា អាយុ៤៦ឆ្នាំជាគ្រូបង្រៀនមានលំនៅក្នុងភូមិជម្រៅបានឱ្យដឹងថា គាត់បានមករស់នៅក្នុងភូមិនេះរយៈពេល២ឆ្នាំមកហើយដោយមានការលំបាកជាខ្លាំង ដោយទឹកតពីឯកជនក្នុងមួយម៉ែត្រគូបតម្លៃ៣ពាន់រៀល ហើយគាត់បំពាក់ទុយោខ្លួនឯងអស់ប្រមាណ២៥០ដុល្លារ ។ រីឯភ្លើងវិញក្នុង១គីឡូវ៉ាត់២៥០០រៀលដោយតខ្សែបណ្តាក់គ្នា ។ ដោយសារតែភ្លើងថ្លៃជារៀងរាល់ថ្ងៃគាត់បានហាមកូនមិនឱ្យមើលទូរទស្សន៍នោះទេ ។
លោកគ្រូបង្រៀនរូបនោះបានឱ្យដឹងទៀតថា រយៈពេលប្រមាណ២ឆ្នាំហើយគាត់ និងប្រជាពលរដ្ឋនោះក្នុងភូមិប្រមាណជាង៧០គ្រួសារបាននាំគ្នាផ្តិតមេដៃ២លើកមកហើយ ស្នើសុំទឹក ភ្លើង តែបាត់ដំណឹងរហូតមក ។ ចំណែកដីក្រុមហ៊ុនឯកជនពុះឡូតិ៍លក់នៅខាងលិចអត់សូវមានផ្ទះផងគេមានទឹក ភ្លើង រដ្ឋប្រើទៅវិញ ។
ប្រជាពលរដ្ឋក៏បានសំណូមពរដល់លោកអគ្គនាយករដ្ឋាការស្វយ័ត្នក៏ដូចជាអគ្គនាយកក្រុមហ៊ុន អគ្គីសនីកម្ពុជា មេត្តាជួយតបណ្តាញអគ្គីសនី និងទឹកស្អាត ដើម្បីឱ្យប្រជាពលរដ្ឋបានប្រើប្រាស់ទៅតាមតម្រូវការផង ៕
ចែករំលែកព័តមាននេះ