ខេត្តកណ្តាល ៖ ប្រជាពលរដ្ឋរស់នៅភូមិកណ្តាល ឃុំខ្ពបអាទាវ និងភូមិព្រែកតូច ស្រុកលើកដែក ខេត្តកណ្តាលនៅតែកំពុងមានការព្រួយបារម្ភយ៉ាងខ្លាំងពីគ្រោះបាក់ច្រាំងទន្លេមេគង្គក្រោម ខណៈដែលដីច្រាំងទន្លេបានបាក់រអិលធ្លាក់ចូលទៅក្នុងទឹកជាបន្តបន្ទាប់មានប្រវែងប្រហែល១០០ម៉ែត្រ រាលដាលដល់ផ្លូវ និងរហូតមានស្នាមប្រេះមកដល់ពាក់កណ្តាលផ្លូវលេខ១៤…
ខេត្តកណ្តាល ៖ ប្រជាពលរដ្ឋរស់នៅភូមិកណ្តាល ឃុំខ្ពបអាទាវ និងភូមិព្រែកតូច ស្រុកលើកដែក ខេត្តកណ្តាលនៅតែកំពុងមានការព្រួយបារម្ភយ៉ាងខ្លាំងពីគ្រោះបាក់ច្រាំងទន្លេមេគង្គក្រោម ខណៈដែលដីច្រាំងទន្លេបានបាក់រអិលធ្លាក់ចូលទៅក្នុងទឹកជាបន្តបន្ទាប់មានប្រវែងប្រហែល១០០ម៉ែត្រ រាលដាលដល់ផ្លូវ និងរហូតមានស្នាមប្រេះមកដល់ពាក់កណ្តាលផ្លូវលេខ១៤ ដែលអាចសន្និដ្ឋាន បានថានឹងអាចបាក់ដាច់អស់មួយចំហៀងផ្លូវទៀតទៅថ្ងៃមុខ បើសិនជាអាជ្ញាធរមន្ត្រីជំនាញមិនមានវិធានការទប់ស្កាត់។ បញ្ហានេះប្រជាពលរដ្ឋជាច្រើនគ្រួសាររស់នៅភូមិកណ្តាល ឃុំខ្ពបអាទាវ បាននឹងកំពុងរកជាងមករុះរើ និងរំកិលថយក្រោយព្រោះខ្លាចបាក់រាលដាលដល់ផ្ទះរបស់ពួកគាត់ដោយមិនដឹងខ្លួន ខ្លាចមានគ្រោះថ្នាក់។ មិនតែប៉ុណ្ណោះសូម្បីតែអ្នកធ្វើដំណើរឆ្លងកាត់ក៏មានការព្រួយបារម្ភពីគ្រោះបាក់ដីច្រាំងទន្លេនេះផងដែរ ខណៈដែលពួកគាត់ធ្វើដំណើរឆ្លងកាត់ឃើញមានស្នាមប្រេះនោះ។
ដោយឡែកពលរដ្ឋនៅក្នុងភូមិព្រែកតូច ឃុំព្រែកទន្លាប់ក៏មានការព្រួយបារម្ភពីគ្រោះបាក់ស្រុតច្រាំងទន្លេនេះដែរ ដោយបានបាក់ម្តងបន្តិចៗរហូតដល់ដាច់ថ្នល់កៅស៊ូលេខ១៤ និងអាចប្រឈមបាក់មកដល់ដីលំនៅដ្ឋាន និងដីចម្ការរបស់ពួកគាត់នៅខាងលិចថ្នល់ទៀតជាក់ជាមិនខាន បើសិនជាគ្មានការទប់ស្កាត់ពីសំណាក់មន្ត្រីជំនាញនោះទេ។ ប្រជាពលរដ្ឋស្រុកលើកដែកបន្តថា កន្លងមកពួកគាត់ឃើញតែមន្ត្រីជំនាញចុះមកពិនិត្យមើលថតផ្តិតយកតែរូបភាពទៅបាត់ឈឹងមិនឃើញទប់ស្តាត់អ្វីសោះ ហើយគ្រោះបាក់ច្រាំងទន្លេចេះតែបាក់ស្រុតម្តងបន្តិចៗកាន់តែធ្វើឲ្យពួកគាត់មានការព្រួយបារម្ភខ្លាំងទៅ។ ដូច្នេះប្រជាពលរដ្ឋក៏ដូចជាអ្នកធ្វើដំណើរបានសូមសំណូមពរដល់មន្ត្រីជំនាញធ្វើយ៉ាងណាជួយទប់ស្កាត់កុំឲ្យមានការបាក់ដីច្រាំងទន្លេនេះបន្តទៀត ព្រោះគ្រោះបាក់ដីច្រាំងទន្លេនេះបានវាយប្រហារកាត់ផ្តាច់កំណាត់ផ្លូវជាតិលេខ១៤ទាំង២កន្លែងនេះ រយៈពេលយូរឆ្នាំហើយធ្វើឲ្យពលរដ្ឋរងគ្រោះរាប់រយគ្រួសារបង្ខំចិត្តរុះរើផ្ទះសម្បែងដោយសារគ្រោះបាក់ដីច្រាំងទន្លេជាបន្តបន្ទាប់ ខ្លះរត់ទៅសុំដីបងប្អូន និងអ្នកជិតខាង ឬដីសាធារណៈតាមមាត់ព្រែក ទន្លេ សង់កូនខ្ទមប្រក់ដែកសង្ក័សី និងប្រក់តង់ទៅតាមលទ្ធភាពស្នាក់នៅបណ្តោះអាសន្នសិន។
ឥឡូវនេះកំណាត់ផ្លូវលេខ១៤នៅចម្ងាយពីកន្លែងដែលបាក់ដាច់កន្លងទៅនោះប្រហែលជាង១០០ម៉ែត្រក៏ចាប់ផ្តើមប្រេះដល់ពាក់កណ្តាលផ្លូវប្រហែលជិត៥០ម៉ែត្រ។ មូលហេតុដែលប្រេះនេះគឺបណ្តាលមកពីដីច្រាំងទន្លេនៅចំណុចនោះបានបាក់ជាបន្តបន្ទាប់រាលដាលដល់ផ្លូវជាតិទើបធ្វើឲ្យកំណាត់ផ្លូវនៅចំណុចនោះមានស្នាមប្រេះដូច្នេះ។ ពាក់ព័ន្ធបញ្ហាគ្រោះធម្មជាតិបាក់ច្រាំងទន្លេនៅក្នុងស្រុកលើកដែកនេះកន្លងមកអាជ្ញាធរស្រុក លោក នូវ សំណាង អភិបាលស្រុកក៏ធ្លាប់បានប្រាប់ភ្នាក់ងារយើងថា បានទប់ស្កាត់ដែរ តែទប់មិនជាប់ដោយសារចរន្តទឹកហូរបុកខ្លាំងនារដូវទឹកដំឡើង។ ហើយក៏មានមន្ត្រីជំនាញធ្លាប់ចុះមកពិនិត្យជាបន្តបន្ទាប់ផងដែរ៕
https://youtu.be/4Q19dey4fbE
ចែករំលែកព័តមាននេះ