១-បឹងតូបា (Toba Lake)
បឹងតូបា ជាបឹងដ៏ស្រស់ស្អាតមួយស្ថិតនៅលើកោះសូ៊ម៉ាត្រា ។ វាជាបឹងបន្ទុះភ្នំភ្លើងមានបណ្តោយ១០០គីឡូម៉ែត្រ និងទទឹង៣០គីឡូម៉ែត្រ ។ ដោយបង្កើតឡើងដោយសារបន្ទុះភ្នំភ្លើងដ៏ធំប្រមាណជា៧០.០០០ឆ្នាំកន្លងទៅហើយនោះ វាជាបឹងបន្ទុះភ្នំភ្លើងមានរាងជាខ្ទះត្នោតធំបំផុតនៅលើផែនដី ។
តាមការប៉ាន់ស្មានបែបពន្ធុវិទ្យាបង្ហាញថា មានមនុស្សតិចតួចណាស់ដែលនៅរស់រានមានជីវិតនៅក្នុងវិនាសកម្មនៅលើកោះនេះ ។ នៅកណ្តាលកោះស៊ូម៉ាត្រា មានកោះមួយទៀតឈ្មោះថា Pulau Samosir ជាកោះដែលធំនៅលើកោះស៊ូមាត្រានេះ និងមានបឹង២ ។ ក្រៅពីទស្សនាកម្សាន្តបឹងនៅលើកោះនេះ ភ្ញៀវទេសចរក៏អាចសម្រាក និងហែលទឹកក្តៅឧណ្ហៗយ៉ាងសប្បាយ ។
២-ឧទ្យានជាតិ Tanjung Putting
ឧទ្យានជាតិ Tanjung Putting មានទីតាំងស្ថិតនៅលើកោះបណេអូ (Borneo) នៅក្នុងខេត្តកាលីម៉ាន់តាន់ ភាគកណ្តាលប្រទេសឥណ្ឌូណេសីុ។ ឧទ្យាននេះ គឺជាគោលដៅទេសចរណ៍ធម្មជាតិដ៏ពេញនិយម មានក្រុមហ៊ុនទេសចរណ៍ក្នុងស្រុកជាច្រើនផ្តល់ដំណើរកម្សាន្តជិះទូករយៈពេលច្រើនថ្ងៃដើម្បីមើលទេសភាព សត្វព្រៃ និងទៅកម្សាន្តមជ្ឈមណ្ឌលស្រាវជ្រាវ ។
សត្វព្រៃនៅក្នុងឧទ្យាននោះមានដូចជា សត្វទោច ស្វា ខ្លារខិន ខ្លាឃ្មុំ ពស់ថ្លាន់ ក្រពើ និងសត្វស្វាដែលល្បីបំផុត គឺស្វាអ៊ូរ៉ង់អ៊ូតង់ ។ ប៉ុន្តែជាអកុសលព្រៃនេះទទួលរងការកាប់បំផ្លាញខុសច្បាប់ និងឈូសឆាយដីធ្វើកសិកម្ម ។
៣-ជ្រលងភ្នំ Baliem
ជ្រលងភ្នំ Baliem ស្ថិតនៅតំបន់ខ្ពង់រាបភាគខាងលិចប្រទេសហ្គីណេ ប្រសិនបើយើងក្រឡេកមើលមួយភ្លែតហាក់បីដូចជាស្ថិតក្នុងពិភពយុគសម័យថ្មរំលីង ។ ជ្រលងភ្នំនេះ មិនត្រូវបានគេស្គាល់រហូតដល់ឆ្នាំ១៩៣៨ នៅពេលមានការសិក្សាស្វែងយល់តាមរយៈរូបថតពីលើអាកាសហើយបានរកឃើញផ្ទៃដីកសិកម្មដ៏ធំ ។ នៅជ្រលងភ្នំនេះ គេអាចធ្វើដំណើរចេញពីចំណុចវ៉ាមេណា (Wamena) ដើម្បីបានទស្សនាជ្រលងភ្នំដ៏ស្រស់ត្រកាលនេះ មានដូចជាទឹកស្ទឹងហូរលឺសូរគ្រាំៗ ភូមិជនជាតិភាគតិច និងគយគន់ទំនៀមទម្លាប់ដែលមិនធ្លាប់ជួបនៃប្រជាជនដានី (Dani)។
៤-ភ្នំប្រូម៉ូ (Bromo)
ភ្នំ Gunning Bromo គឺជាភ្នំភ្លើងមួយដែលសកម្មបំផុតនៅឥណ្ឌូណេសីុ និងជាផ្នែកមួយនៃប្រជុំភ្នំ Tengger នៅកោះជ្វាភាគខាងកើត ។ ភ្នំនេះមានកម្ពស់២.៣២៩ម៉ែត្រ មិនមែនជាភ្នំដែលខ្ពស់ជាងគេនោះទេក្នុងចំណោមប្រជុំភ្នំនៅទីនោះ ប៉ុន្តែជាភ្នំដែលល្បីល្បាញជាងគេ ។ តំបន់នោះជាតំបន់ដែលភ្ញៀវទេសចរចូលចិត្តទៅទស្សនាកម្សាន្តបំផុតនៅឥណ្ឌូណេសីុ និងកោះជ្វា។ ប្រសិនបើគេមើលពីចម្ងាយទៅភ្នំនោះហាក់បីដូចជាភ្នំនៅឋានសួគ៌ ព្រោះមានពពកវិលជុំវិញឃើញតែកំពូលលឹមៗ ។
៥-តំបន់ភ្នំប៊ូណាឃែន (Bunaken)
តំបន់នេះស្ថិតនៅខាងជើងកោះស៊ូឡាវ៉េសីុ (Sulawesi) ហើយវាជាតំបន់សម្រាប់ហែលទឹកលេងកម្សាន្ត និងមុជទឹកកម្សាន្តមើលបាតសមុទ្រ។ កោះនេះជាផ្នែកមួយនៃឧទ្យានវារីជាតិប៊ូណាឃែន ដែលនៅទីនោះភ្ញៀវទេសចរអាចឃើញ៧០%នៃប្រភេទមច្ឆាច្រើនប្រភេទដែលរស់នៅក្នុងមហាសមុទ្រប៉ាសីុហ្វិក ។ ពេលវេលាដែលល្អបំផុតក្នុងការមុជទឹកលេងកម្សាន្តនៅក្នុងតំបន់នេះ គឺចន្លោះពីខែមេសាដល់វិច្ឆិកា ។
៦-តំបន់ភ្នំ Torajaland
តំបន់ភ្នំ Torajaland ជាតំបន់ភ្នំមួយនៃកោះស៊ូឡាវ៉េសីុភាគខាងត្បូង ដែលជាដែនដីរបស់ប្រជាជន Toraja ។ តំបន់នេះល្បីល្បាញដោយសារផ្ទះប្រជាជននៅទីនេះសង់មានលក្ខណៈប្លែកពីគេ គឺដំបូលមានរាងកោងស្រួច ឬហៅថា Tongkonan ។ តាមទំនៀមទម្លាប់ប្រសិនបើមាននរណាម្នាក់ស្លាប់សាកសពត្រូវរក្សាទុកជាទូទៅច្រើនថ្ងៃ រហូតចាំដល់រៀបចំពិធីបុណ្យសពមួយពិតប្រាកដដដែលប្រារព្ធធ្វើច្រើនថ្ងៃ ។ សាកសពជាទូទៅត្រូវបានគេកប់ក្នុងរូងតូចៗ ឬក្នុងប្រហោងឈើ ។
៧-កោះជីលី (Gili Island)
កោះជីលី ជាកោះមួយដែលក្នុងចំណោមប្រជុំកោះបីតូចៗមានដូចជា Gili Trawangan, Gili Meno, Gili Air ។ នៅលើកោះនេះមានតំបន់មួយហៅ លុមបុក (Lombok) ដែលជាទីដៅទេសចរណ៍ដ៏ស្រស់បំព្រង ។ ប្រសិនបើភ្ញៀវទេសចរបានទៅដល់ទីនោះហើយច្បាស់ជាជាប់ចិត្តមិនចង់ចេញឡើយ ដោយហេតុថា នៅទីនោះពុំមានសំឡេងរថយន្ត ម៉ូតូ រំខានទេ ។
៨-ឧទ្យានជាតិកូមូ៉ដូ (Komodo National Park)
ឧទ្យាជាតិកូម៉ូដូ មានទីតាំងស្ថិតនៅលើកោះ Lesser Sunda ដែលរួមមានកោះធំៗបី គឺកោះកូម៉ូដូ កោះប៉ាដា កោះរីនកាស និងកូនកោះតូចៗផ្សេងទៀត ។ កោះនោះត្រូវបានដាក់ឈ្មោះតាមសត្វនាគកូម៉ូដូ គឺជាសត្វនាគដែលមានខ្លួនធំប្រវែងដល់ទៅ៣ម៉ែត្រ ឬលើសពីនេះ និងមានទម្ងន់ជាង៧០គីឡូក្រាម ។ ទោះបីជានាគកូម៉ូដូសីុ សាកសពសត្វដែលងាប់ក៏ដោយក៏វាជាសត្វដែលសីុសត្វដទៃជាអាហារគួរឱ្យខ្លាច ព្រមទាំងចាប់សត្វបក្សីជាអាហារដែរ តែវាកម្រសីុមនុស្សណាស់ ។
៩-ប្រាសាទបូរ៉ូប៊ូឌួ
ប្រាសាទបូរ៉ូប៊ូឌួ មានទីតាំងស្ថិតនៅចម្ងាយ៤០គីឡូម៉ែត្រភាគពាយ័ព្យកោះជ្វានៃប្រទេសឥណ្ឌូណេសីុ ។ ប្រាសាទនេះ គឺជាកន្លែងឧទ្ទិសដល់ព្រះពុទ្ធសាសនាដ៏ធំ និងល្បីជាងគេបំផុតនៅលើពិភពលោក ។ ប្រាសាទនោះត្រូវកសាងឡើងអស់រយៈពេលប្រហែលជា៥៧ឆ្នាំ ក្នុងចន្លោះសតវត្សរ៍ទី៨ និងទី៩ បានបោះបង់ចោលនៅក្នុងសតវត្សរ៍ទី១៤ ដោយមិនដឹងពីមូលហេតុ ។
១០-កោះបាលី
កោះបាលី ជាកោះមួយក្នុងចំណោមកោះដែលមានប្រជាប្រិយភាពបំផុតនៅលើពិភពលោក និងជាកោះដែលល្បីល្បាញបំផុតរបស់ឥណ្ឌូណេសីុ ។ កោះបាលីនេះមានទេសភាពស្រស់ស្អាតបំផុត មានឆ្នេរខ្សាច់លាតសន្ធឹងសក្បុស ព្រមជាមួយវាលស្រែរបស់កសិករចម្រុះពណ៌ខ្វាត់ខ្វែងគ្នា ។ ភ្ញៀវទេសចរដែលទៅដល់កោះបាលី នឹងបានគយគន់នូវវប្បធម៌របស់សាសនាហិណ្ឌូ ៕
ចែករំលែកព័តមាននេះ