ខេត្តសៀមរាប ៖ បើតាមមន្ត្រីអាជ្ញាធរជាតិអប្សរា បានបង្ហាញថា «សមរាត្រី» ឬព្រះអាទិត្យចំកំពូលប្រាសាទអង្គរវត្តនារដូវវស្សា រយៈពេល៣ថ្ងៃ ចាប់ពីថ្ងៃទី២១-២៣ ខែកញ្ញា ឆ្នាំ២០២៥នេះ…
ខេត្តសៀមរាប ៖ បើតាមមន្ត្រីអាជ្ញាធរជាតិអប្សរា បានបង្ហាញថា «សមរាត្រី» ឬព្រះអាទិត្យចំកំពូលប្រាសាទអង្គរវត្តនារដូវវស្សា រយៈពេល៣ថ្ងៃ ចាប់ពីថ្ងៃទី២១-២៣ ខែកញ្ញា ឆ្នាំ២០២៥នេះ បានទាក់ទាញអ្នកទេសចរចម្រុះជាតិសាសន៍ប្រមាណ៣៦៣០០នាក់ ទោះព្រឹត្តិការណ៍លើកនេះមិនឃើញពន្លឺព្រះអាទិត្យច្បាស់ ដោយសារអាកាសធាតុមិនល្អក៏ដោយ ។ នេះបើយោងតាមផេកមន្ទីរព័ត៌មានខេត្តសៀមរាបបានផ្សាយនាព្រឹកថ្ងៃទី២៤ ខែកញ្ញានេះ ។
លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌អង្គរ នៃអាជ្ញាធរជាតិអប្សរា បានឱ្យដឹងថា ក្នុងចំណោមភ្ញៀវទេសចរប្រមាណ៣៦ ៣០០នាក់ខាងលើ មានភ្ញៀវទេសចរអន្ដរជាតិ ២៥៧៦នាក់ និងភ្ញៀវទេសចរជាតិប្រមាណ៣៣ ៧៤០នាក់ ។
លោក សេង សុធារ៉ា បានឱ្យដឹងទៀតថា ក្នុងរយៈពេល៣ថ្ងៃនៃព្រឹត្តិការណ៍សមរាត្រីឆ្នាំនេះ មិនឃើញថ្ងៃរះចំកំពូលប្រាសាទអង្គរ ច្បាស់ក្ដី ប៉ុន្តែអ្នកទេសចរបង្ហាញការពេញចិត្ត និងសប្បាយរីករាយ ចំពោះការចូលរួមក្នុងព្រឹត្តិការណ៍ដ៏អស្ចារ្យប្រចាំឆ្នាំ ដែលនៅលើពិភពលោកមិនអាចប្រៀបផ្ទឹមបានជាមួយវប្បធម៌របស់ខ្មែរ ។ ពួកគាត់មានមោទនភាពដែលភ្ញៀវទេសចរយ៉ាងច្រើនកុះករបានមកទស្សនាព្រឹត្តិការណ៍សមរាត្រីនេះ ខ្លះបានអង្គុយរង់ចាំនៅបរិវេណច្រាំងកសិន្ធុខាងមុខប្រាសាទ ខ្លះចូលមកអង្គុយត្រៀបត្រានៅបណ្ណាល័យ និងខ្លះទៀតឈររង់ចាំនៅលើរានហាល ក្បែរស្រះទឹកខាងជើង និងខាងត្បូងនៃប្រាសាទ ដើម្បីទស្សនាទិដ្ឋភាព និងផ្ដិតយករូបភាពដ៏អស្ចារ្យថ្ងៃរះនៅប្រាសាទអង្គរវត្ត ៕
ចែករំលែកព័តមាននេះ