Bitcoin ជាអ្វី ? ហេតុអ្វីធនាគារជាតិប្រកាសមិនទទួល ស្គាល់ ?
- ភ្នំពេញ
រាជធានីភ្នំពេញ ៖ ថ្មីៗនេះ ធនាគារជាតិនៃកម្ពុជាបានប្រកាសមិនទទួលស្គាល់ និងមិនទទួលខុសត្រូវទាំងឡាយណា ទៅការចាយវាយកាក់អេឡិចត្រូនិក ឬហៅថា Bitcoin នេះទេ ខណៈ…
រាជធានីភ្នំពេញ ៖ ថ្មីៗនេះ ធនាគារជាតិនៃកម្ពុជាបានប្រកាសមិនទទួលស្គាល់ និងមិនទទួលខុសត្រូវទាំងឡាយណា ទៅការចាយវាយកាក់អេឡិចត្រូនិក ឬហៅថា Bitcoin នេះទេ ខណៈ Bitcoin បានមកដល់កម្ពុជាក្នុងរយៈពេលខ្លីប៉ុណ្ណោះ ។ តើ Bitcoin ជាអ្វី ? ហើយវាបង្កើតឡើងដោយអ្នកណា និងមានប្រភពមកពីណា ? ថ្ងៃនេះ កោះសន្តិភាពសូមលើកយកពីប្រវត្តិ Bitcoin មកចែកជូនប្រិយមិត្តអ្នកអានទាំងអស់ឲ្យបានជ្រាប និងជាសារមួយជួយដាស់តឿនបន្ថែមទៀតដល់ពលរដ្ឋ ជាពិសេសអាជីវករ និងពាណិជ្ជករទាំងឡាយ ។
Bitcoin គឺជារូបិយប័ណ្ណប្រភេទថ្មី ដែលបង្កើតឡើងនៅឆ្នាំ២០០៩ ដោយជនមិនស្គាល់មុខម្នាក់ប្រើឈ្មោះក្លែងក្លាយថា Satoshi Nakamoto ។ ការចរាចររូបិយប័ណ្ណមួយនេះ គ្មានប្រភពច្បាស់លាស់ទេ ពោលគឺគ្មានធនាគារណាមួយទទួលស្គាល់ឡើយ ។ វាមិនតម្រូវឲ្យបង់ប្រាក់បន្ថែមសម្រាប់ការចាយវាយ និងមិនតម្រូវឲ្យប្រើឈ្មោះពិតប្រាកដចំពោះអ្នកប្រើប្រាស់រូបិយប័ណ្ណមួយប្រភេទនេះដែរ ។ សព្វថ្ងៃនេះ មានពាណិជ្ជករជាច្រើនកំពុងប្រើប្រាស់រូបិយប័ណ្ណ Bitcoin នៅក្នុងការងាររបស់ពួកគេ ។
Bitcoin ត្រូវបានគេប្រើដើម្បីទិញអីវ៉ាន់អនាមិក ឬហៅថា អីវ៉ាន់អនឡាញ ។ លើសពីនេះទៀត ការចំណាយជាលក្ខណៈអន្តរជាតិមួយនេះមានភាពងាយស្រួល និងចំណាយតិច ពីព្រោះ Bitcoin មិនមែនជាកម្មសិទ្ធិរបស់ប្រទេសណាមួយឡើយ ។ អាជីវកម្មខ្នាតតូចមួយចំនួនចូលចិត្តប្រើប្រាស់ Bitcoin ដោយសារតែវាមិនតម្រូវឲ្យមានការចំណាយប្រចាំថ្ងៃ ដូចកាតឥណទាន ។ មនុស្សមួយចំនួនទិញ Bitcoin ទុកជាការវិនិយោគ ដោយសង្ឃឹមថា ពួកគេនឹងបានចំណេញនៅថ្ងៃក្រោយ ។
លោក លឹម សុជាតិ ជំនាញបច្ចេកវិទ្យា និងអេឡិចត្រូនិកមួយរូបនៅកម្ពុជា បានឲ្យដឹងថា ការលេងរូបិយប័ណ្ណ Bitcoin មានន័យថា គេយកលុយទៅទិញ Bitcoin ដើម្បីសន្សំទុក ហើយនៅពេល Bitcoin ឡើងថ្លៃ គេលក់វិញដើម្បីបានលុយ ។
លោកថា ៖« ដំបូងៗ វាមិនមែនជាបញ្ហាទេ ពេលយើងយកលុយទិញ Bitcoin ហើយយើង លក់ យើងនឹងបានលុយចូលទៅក្នុងគណនីធនាគារ រួចយើងអាចដកយកលុយវិញបាន តែយើងមិនដឹងថា Bitcoin ដែលយើងទិញពីគេហើយ ស្រាប់តែមិនមានអ្នក ទិញ តើយើងយក Bitcoin នោះទៅប្តូរយកលុយវិញនៅទីណា ព្រោះធនាគារអត់ទទួល ស្គាល់បែបនេះ ។ នេះហើយជាហានិភ័យសម្រាប់អ្នកជួញដូរ Bitcoin គ្រប់គ្នា » ។
លោកបន្តថា នៅក្នុងរយៈពេលចុងក្រោយនេះ Bitcoin ទូទាំងពិភពលោក បានឡើងថ្លៃគួរឲ្យកត់សម្គាល់ ជាហេតុធ្វើឲ្យមានការចាប់អារម្មណ៍ខ្លាំងពីជំនួញតាមអនឡាញ ព្រោះគេគិតថា ទិញហើយ ពួកគេនឹងអាចរកប្រាក់ចំណេញវិញបាននៅពេល Bitcoin ឡើង ថ្លៃ ។ លោកថា ៖« កាលពីដំបូងឡើយ Bitcoin មានតម្លៃត្រឹមតែ២ឬ៣ដុល្លារអាមេរិកប៉ុណ្ណោះក្នុង១ឯកតា តែរហូតដល់ពេលនេះ វាមានតម្លៃជិត១ម៉ឺនដុល្លារក្នុង១ឯកតា ហើយការឡើងថ្លៃនេះ ធ្វើឲ្យអ្នកជំនួញអនឡាញជាច្រើនកំពុងតែចាប់អារម្មណ៍ និងចង់បណ្ដាក់ទុនលើការវិនិយោគរូបិយប័ណ្ណប្រភេទនេះ » ។
លោកជំទាវ ជា សិរី អគ្គនាយកធនាគារជាតិនៃកម្ពុជា បានឲ្យដឹងថា នៅកម្ពុជាមានក្រុម ហ៊ុនមួយបោះពុម្ពកាក់អេឡិចត្រូនិក ហើយគេរៀបចំសិក្ខាសាលាផ្សព្វផ្សាយ និងបញ្ចុះ បញ្ចូលដល់អាជីវករឲ្យទទួលកាក់អេឡិចត្រូនិកនោះសម្រាប់ការទូទាត់ជំនួសប្រាក់ ហើយក៏បានប្រាប់ឈ្មោះធនាគារនេះ ធនាគារនោះ ដើម្បីប្តូរយកសាច់ប្រាក់ ។ គេថែមទាំងប្រាប់ថា យកកាក់នេះទុក វាចំណេញនៅពេលដែលកាក់នោះឡើងថ្លៃ ពេលនេះ មួយឡើងជាពីរជាបី អីចឹង បើយកសាច់ប្រាក់ គឺនៅតែដដែល ។ តែធនាគារជាតិ សូមប្រកាសមិនទទួលស្គាល់កាក់នោះជាដាច់ខាត ។
លោកជំទាវបន្តថា ៖« បើសិនជាករណីយកកាក់នោះទៅប្តូរពីធនាគារពាណិជ្ជផ្សេងៗ គេមិនទទួល កុំបន្ទោសធនាគារជាតិ ព្រោះយើងបានជម្រាបម្ដងរួចហើយថា យើងមិនទទួលស្គាល់រូបិយប័ណ្ណដែលចេញពីក្រុមហ៊ុននានាឡើយ » ។
មិនត្រឹមតែធនាគារជាតិនៃកម្ពុជានោះទេ កាលពីសប្ដាហ៍មុន និងនៅថ្ងៃទី៥ ធ្នូ កន្លងមក ធនាគារកណ្ដាលចិន និងធនាគារកណ្ដាលឥណ្ឌា ក៏បានព្រមានអ្នកវិនិយោគដែលកំពុងលេង ឬភ្នាល់ Bitcoin និងរូបិយប័ណ្ឌអេឡិចត្រូនិកដទៃទៀតដែរ ។
យោងតាមគេហទំព័រ QUARTZ ចេញផ្សាយនៅថ្ងៃទី៦ ធ្នូ ម្សិលមិញ លោក ប៉ាន គ័ងសៀង (Pan Gongsheng) ទេសាភិបាលរងធនាគារប្រជាជនចិន បាននិយាយនៅឯព្រឹត្តិការណ៍មួយក្នុងក្រុងសៀងហៃថា ៖« ថ្ងៃណាមួយ អ្នកនឹងឃើញ Bitcoin បាត់រូបរាង និងឃ្លាតឆ្ងាយពីអ្នក » ។
ចំណែកធនាគារកណ្ដាលរបស់ឥណ្ឌា កាលពីថ្ងៃទី៥ ធ្នូ ក៏បានចេញផ្សាយពីការហាមប្រាមនេះផងដែរ ដោយក្នុងនោះ ធនាគារបានក្រើនរំលឹកពីការព្រមានជាលើកទី៣ បន្ទាប់ពីការព្រមានលើកទី១ កាលពីខែធ្នូ ឆ្នាំ២០១៣ និងលើកទី២ កាលពីខែកុម្ភៈឆ្នាំនេះ ទៅដល់អ្នកប្រើប្រាស់, ពាណិជ្ជករ និងអ្នកកំពុងកាន់កាប់ភាគហ៊ុនទាំងអស់ដែលកំពុងតែពាក់ព័ន្ធនឹងBitcoins ត្រូវមានការទទួលខុសត្រូវលើហានិភ័យដោយខ្លួនឯង ៕
ចែករំលែកព័តមាននេះ