ខេត្តកណ្តាល ៖ លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានបញ្ជាឱ្យកម្លាំងការិយាលយ័ព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត ចាប់វាយខ្នោះបុរសម្នាក់ដែលហ៊ានចូលលួចអាគកកំពូលមាន់ជល់ ដែលចាប់បានថ្មីៗនេះនៅក្នុងបរិវេណស្នងការដ្ឋាននគរបាលខេត្ត ។…
ខេត្តកណ្តាល ៖ លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានបញ្ជាឱ្យកម្លាំងការិយាលយ័ព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត ចាប់វាយខ្នោះបុរសម្នាក់ដែលហ៊ានចូលលួចអាគកកំពូលមាន់ជល់ ដែលចាប់បានថ្មីៗនេះនៅក្នុងបរិវេណស្នងការដ្ឋាននគរបាលខេត្ត ។ មាន់ដែលជននេះលួច គឺជាស្តេចមាន់ជល់ដែលល្បីថាមានតម្លៃរហូតជាង១ម៉ឺនដុល្លារ ដែលជល់ឈ្នះច្រើនសង្វៀនរួចមកហើយ ស្ទើរតែរកគូប្រកួតមិនបាន ។
ការចាប់ខ្លួនជនជាប់ចោទចោរលួចអាគកដ៏មានតម្លៃនេះ ត្រូវវាយខ្នោះនៅហាងលក់បាយមួយកន្លែងនៅមាត់ស្ទឹង ភូមិតាខ្មៅ សង្កាត់តាខ្មៅ ក្រុងតាខ្មៅ ពេលថ្ងៃត្រង់ថ្ងៃទី៦ធ្នូម្សិលមិញ ។ជនសង្ស័យឈ្មោះ សុខ សៀងឡេង ភេទប្រុស អាយុជាង៣០ឆ្នាំ មានទីលំនៅភូមិព្រែករុន ឃុំព្រែកគយ ស្រុកស្អាង ។
លោកឧត្តមសេនីយ៍ទោ អ៊ាវ ចំរើន បានឱ្យដឹងថា ជនសង្ស័យខាងលើ បានលបចូលលួចមាន់ដែលជាវត្ថុតាង ក្នុងសំណុំរឿងបង្ក្រាបសង្វៀនដ៏ធំមួយ នៅភូមិអរិយក្សត្រ ស្រុកល្វាឯម កាលពីថ្ងៃទី៤ ធ្នូ ។ មាន់ជល់ដែលជាវត្ថុតាងត្រូវបានរឹបអូសពេលបង្ក្រាបនោះមានជាង១៣០ក្បាល រួមនឹងស្តេចអាគកនេះផងដែរ ។ លោកនិយាយថា ស្រាប់តែនៅយប់ថ្ងៃទី៥ ធ្នូ ជនសង្ស័យឈ្មោះ ឡេង បានបន្លំចូលទៅលួចមាន់ជាវត្ថុតាងនៅក្នុងស្នងការដ្ឋានចំនួន១ក្បាល រួចបានយកទៅលក់ឱ្យម្ចាស់មាន់ជាថៅកែកាប់ជ្រូកនៅខណ្ឌច្បារអំពៅ តម្លៃ៥០០០ដុល្លារ ។ លោកថា ដោយសារតែការស្រាវជ្រាវភ្លាមៗ សមត្ថកិច្ចប៉ូលិសក៏បានស្គាល់អត្តសញ្ញាណអ្នកលួចមាន់នេះ ទើបឈានដល់ការចាប់ខ្លួននៅវេលាថ្ងៃត្រង់ថ្ងៃទី៦ ធ្នូ នៅក្នុងហាងបាយមួយកន្លែងក្នុងក្រុងតាខ្មៅ ។
ដោយសារតែមានជនខិលខូចចូលលួចអាគកដល់ក្នុងបរិវេណនៃស្នងការដ្ឋានបែបនេះ លោកស្នងការបានដាក់បទបញ្ជាយ៉ាងម៉ឺងម៉ាត់ថា ឱ្យតែរកឃើញមន្ត្រីនគរបាលណាមួយហា៑នលួចមាន់(វត្ថុតាង) និងសមគំនិតជាមួយក្រុមបញ្ជល់មាន់ លោកនិងដកសក្តិ ហើយចាប់វាយខ្នោះ បញ្ជូនឱ្យតុលាការចាត់ការតាមនីតិវិធីមិនខាន ។ គេមិនទាន់ដឹងថា បុរសក្លាហានហ៊ានចូលលួចស្តេចមាន់តម្លៃជាង១ម៉ឺនដុល្លារនេះ នឹងត្រូវសមត្ថកិច្ចបន្តនីតិវិធីបញ្ជូនទៅតុលាការ ឬបែបណានៅឡើយទេ ។ តែតាមប្រភពថា លោកបានបញ្ជាឱ្យនគរបាលតាមចាប់ខ្លួនអ្នកទិញមាន់នេះដើម្បីចាត់ការតាមច្បាប់ដែរ ព្រោះទំនងអ្នកទិញជាអ្នកបញ្ជាឱ្យលួច ។ ដូច្នេះពួកគេប្រឈមនឹងការនាំខ្លួនឡើងតុលាការ ។
តាមប្រភពព័ត៌មានពីមន្ត្រីនគរបាលខេត្តម្នាក់ខ្សិបប្រាប់កោះសន្តិភាពថា អាគកមួយក្បាលដែលចោរលួចទៅនេះ មានតម្លៃ១២.០០០ដុល្លារអាមេរិក ជាមាន់ដែលល្បីខ្លាំងជាងគេ ធ្លាប់ជល់ឈ្នះច្រើនលើក ពិបាករកគូប្រយុទ្ធ ព្រោះដឹងតែឈ្នះ ។ លោកថា ក្នុងចំណោមអាគកជាង១០០ក្បាល ដែលចាប់បាននេះមានតម្លៃមិនក្រោម១៥ម៉ឺនដុល្លារទេ ៕
ចែករំលែកព័តមាននេះ