រាជធានីភ្នំពេញ ៖ បុរសម្នាក់ជិះម៉ូតូពីភ្នំពេញទៅស្រុកកំណើតដើម្បីធ្វើសំបុត្រកំណើតឲ្យកូន ជាអកុលដល់ពាក់កណ្ដាលផ្លូវ ស្រាប់តែរថយន្តមិនស្គាល់ម៉ាក់បើកទៅបុកចំពីមុខពេញទំហឹង បណ្ដាលឲ្យបុរសរូបនោះរយះដៃជើងខ្ទាំទ្រូងស្លាប់នៅកន្លែងកើតហេតុ ចំណែករថយន្តបង្កបានបើករត់គេចខ្លួនបាត់ស្រមោល ហេតុការណ៍នេះបានកើតឡើងនៅវេលាម៉ោង០៩និង៣០នាទីយប់ ថ្ងៃទី០៣ ខែធ្នូ…
រាជធានីភ្នំពេញ ៖ បុរសម្នាក់ជិះម៉ូតូពីភ្នំពេញទៅស្រុកកំណើតដើម្បីធ្វើសំបុត្រកំណើតឲ្យកូន ជាអកុលដល់ពាក់កណ្ដាលផ្លូវ ស្រាប់តែរថយន្តមិនស្គាល់ម៉ាក់បើកទៅបុកចំពីមុខពេញទំហឹង បណ្ដាលឲ្យបុរសរូបនោះរយះដៃជើងខ្ទាំទ្រូងស្លាប់នៅកន្លែងកើតហេតុ ចំណែករថយន្តបង្កបានបើករត់គេចខ្លួនបាត់ស្រមោល ហេតុការណ៍នេះបានកើតឡើងនៅវេលាម៉ោង០៩និង៣០នាទីយប់ ថ្ងៃទី០៣ ខែធ្នូ ឆ្នាំ២០១៧ នៅលើស្ពាន៧មករា ផ្លូវជាតិលេខ៣ ភូមិក្រាំងពង្រ សង្កាត់ក្រាំងពង្រ ខណ្ឌដង្កោ ។
សពជនរងគ្រោះមានឈ្មោះ ហេង សារ៉ុត ភេទប្រុស អាយុ៣៥ឆ្នាំ មុខរបរកម្មកររោងចក្រស្នាក់នៅផ្ទះជួលម្តុំផ្សារបែកចាន ស្រុកអង្គស្នួល ខេត្តកណ្ដាល មានស្រុកកំណើតនៅភូមិត្រាំងកំណប់ ឃុំដំបូកខ្ពស់ ស្រុកអង្គរជ័យ ខេត្តកំពត ។
តាមប្រភព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសខាងលើមិនដឹងថាគោលបំណងទៅណានោះទេ គឺបានជិះម៉ូតូម៉ាកស៊ុយសុគីស្មាសរ៉េវ៉ូ ពណ៌ខ្មៅ ពាក់ស្លាកលេខ កំពង់ឆ្នាំ ១A-៤០៧១ បានធ្វើដំណើរតាមផ្លូវជាតិលេខ៣ ក្នុងទិសដៅជើងទៅត្បូង ខណៈមកដល់ចំណុចកើតហេតុ លើស្ពាន៧មករា ដែលជាផ្លូវកោង ហើយងងឹតទៀតនោះ ធ្វើឲ្យម៉ូតូបើកចូលទៅផ្លូវរបស់គេ ស្របពេលនោះដែរ ក៏ស្រាប់តែរថយន្តប្រភេទបែនដឹកដីមួយគ្រឿង មិនចាំម៉ាក បានបើកធ្វើដំណើរតាមជាតិលេខ៣ ក្នុងទិសដៅបញ្ច្រាសគ្នាពីត្បូងទៅជើងក្នុងល្បឿនលឿន បានជ្រុលទៅបុកចំពីមុខពេញទំហឹង បណ្ដាលឲ្យអ្នកបើកម៉ូតូរងរបួសរយះដៃរយះជើង មុខ និងខ្ទាំទ្រូង ស្លាប់នៅកន្លែងតែម្តង ចំណែកម៉ូតូវិញរងការខូចខាតខ្ទេចខ្ទីផ្នែកខាងមុខ ។ ដោយឡែករថយន្តបង្កវិញ នៅពេលដែលឃើញហេតុការណ៍បែបនេះ បានបន្ថែមល្បឿនរត់គេចខ្លួនបាត់ស្រមោល ។
ក្នុងហេតុការណ៍នេះដែរ មានបងប្អូនរបស់ជនរងគ្រោះបានទៅកន្លែងកើតហេតុ និងបាននិយាយថា ជនរងគ្រោះខាងគឺបានជិះម៉ូតូចេញពីភ្នំពេញគោលបំណងត្រលប់ទៅស្រុកកំណើត ដើម្បីធ្វើសំបុត្រកំណើតឲ្យកូន ដែលទើបនឹងកើតបានមួយខែ តែជាអកុសលក៏ជួបគ្រោះថ្នាក់បែបនេះទៅ ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញបានចុះទៅដល់កន្លែងកើតហេតុ រួចហើយបានធ្វើលិខិតប្រគល់សពជនរងគ្រោះឲ្យបងប្អូនសាច់ញាតិយកធ្វើបុណ្យនៅស្រុកកំណើតខេត្តកំពត ចំណែកម៉ូតូវិញត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌដង្កោ ដើម្បីរងចាំប្រគល់ឲ្យសាច់ញាតិរបស់ជនរងគ្រោះវិញ ៕
ចែករំលែកព័តមាននេះ