រាជធានីភ្នំពេញ៖ លោក ឆៀរី ម៉ាធូ (Thierry MATHOU) ប្រធាននាយកដ្ឋានអាស៊ី និងអូសេអានីនៃក្រសួងអឺរ៉ុប និងការបរទេសបារាំង បានសម្តែងការព្រួយបារម្ភចំពោះស្ថានភាពនយោបាយផ្ទៃក្នុងកម្ពុជា ជាពិសេសនៅពេលជិតបោះឆ្នោតជ្រើសតាំងតំណាងរាស្ត្រនៅខែកក្កដា ឆ្នាំ២០១៨ខាងមុខ។
យោងតាមសេចក្តីប្រកាសព័ត៌មាននៃការបញ្ចប់ដំណើរទស្សនកិច្ចរបស់លោក ឆៀរី ម៉ាធូ នៅកម្ពុជាចុះថ្ងៃទី២៨ វិច្ឆិកា នេះ បានឲ្យដឹងថា លោកបានបំពេញទស្សនកិច្ចនៅកម្ពុជាពីថ្ងៃ ២៧-២៨ វិច្ឆិកា ហើយក្នុងដំណើរទស្សនកិច្ចនេះ លោកបានពិភាក្សាការងារជាមួយអាជ្ញាធរកម្ពុជា ព្រមទាំងតំណាងគណបក្សប្រឆាំង សង្គមស៊ីវិល និងសហគមន៍អន្តរជាតិផងដែរ។
ក្នុងកិច្ចពិភាក្សានោះបានផ្តោតជាពិសេសទៅលើទំនាក់ទំនងទ្វេភាគី និងស្ថានភាពនយោបាយនៅកម្ពុជាបច្ចុប្បន្ន ភាពយូរអង្វែង និងគុណភាពនៃទំនាក់ទំនងរវាងកម្ពុជា-បារាំង ក៏ដូចជាកិច្ចសហប្រតិបត្តិការទ្វេភាគីលើវិស័យនានា។ សេចក្តីប្រកាសព័ត៌មានបន្តថា លោក ឆៀរី ម៉ាធូ បានរំលឹកពីប្រទេសបារាំង មានការព្រួយបារម្ភស្ថានភាពនយោបាយផ្ទៃក្នុងកម្ពុជា ខណៈការបោះឆ្នោតកាន់តែខិតជិតមកដល់។
លោកឆៀរី ម៉ាធូ បញ្ជាក់ថា៖ «ការរំលាយគណបក្សសង្គ្រោះជាតិ ដែលជាគណបក្សប្រឆាំងដ៏ធំជាងគេ ការចាប់ខ្លួន និងការឃុំខ្លួនមេដឹកនាំគណបក្សនេះ រួមទាំងការហាមឃាត់សមាជិកគណបក្សចំនួន១១៨រូប ធ្វើនយោបាយរយៈពេល៥ឆ្នាំ បានចោទជាបញ្ហាដល់ដំណើរការប្រជាធិបតេយ្យនៅកម្ពុជា»។
លោកប្រធាននាយកដ្ឋានរបស់បារាំងរូបនេះ បានអំពាវនាវឲ្យអាជ្ញាធរកម្ពុជាចូលរួមសារជាថ្មី ក្នុងដំណើរការប្រជាធិបតេយ្យ ហើយអនុញ្ញាតឲ្យតំណាងគណបក្សប្រឆាំង ប្រព័ន្ធផ្សព្វផ្សាយ និងសង្គមស៊ីវិល ដំណើរការដោយគ្មានការរារាំង។ ទាក់ទិននឹងការឡើងខាងលើនេះកោះសន្តិភាពមិនអាចសុំការត្ថាធិប្បាយពីមន្ត្រីជាន់ខ្ពស់រាជរដ្ឋាភិបាលបានទេ។
ទោះយ៉ាងក្តីមន្ត្រីអ្នកនាំពាក្យគណបក្សប្រជាជនកម្ពុជាធ្លាប់បានមានប្រសាសន៍ថា «អ្វីដែលកម្ពុជាធ្វើ គឺធ្វើតាមច្បាប់»។ មន្ត្រីដដែលថា កម្ពុជាអធិបតេយ្យភាពពេញលេញមិនអាចអោយបរទេសមកត្រួតត្រាបាននោះទេ។ សម្តេចតេជោ ហ៊ុន សែន ធ្លាប់មានប្រសាសន៍ថា កម្ពុជាធ្វើតាមច្បាប់របស់ប្រទេស ហើយប្រទេសដទៃមិនអាចលូកដៃចូលកិច្ចការផ្ទៃក្នុងកម្ពុជាបានទេ។ សូមបញ្ជាក់ថា ប្រទេសបារាំងក៏ជាប្រទេសផ្តល់ជំនួយមកកម្ពុជាមួយដែរ ក្នុងចំណោមប្រទេសជាច្រើន៕
ចែករំលែកព័តមាននេះ