ខេត្តបន្ទាយមានជ័យ ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តបានឃាត់រថយន្ត១គ្រឿងដឹកសាច់មានខូចគុណភាពជិត១តោននៅវេលាម៉ោង១២ និង៤០នាទី ថ្ងៃទី២០ ខែវិច្ឆិកា ឆ្នាំ២០១៧ នៅតាមបណ្តោយផ្លូវជាតិលេខ៥ ស្ថិតក្នុងភូមិ.សង្កាត់ទឹកថ្លា ក្រុងសិរីសោភ័ណ។ លោកវរៈសេនីយ៍ត្រី ម៉ី បូរ៉ាន់ នាយផ្នែកនៃការិយាល័យប្រឆាំងបទល្មើសសេដ្ឋកិច្ចខេត្តបន្ទាយមានជ័យបានប្រាប់ថា៖ ម្ចាស់រថយន្តដែលដឹកសាច់មាន់ខូចគុណភាពមានឈ្មោះ ហួត សំបូរ ភេទប្រុស អាយុ២៤ឆ្នាំ រស់នៅភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ។
លោកបានបញ្ជាក់ថា៖ ដោយមានការណែនាំពីលោក សួន បវរ អភិបាលខេត្តបន្ទាយមានជ័យ និងដាក់វិធានការពីលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ហើយកម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានបានធ្វើការស្រាវជ្រាវ និងកំណត់មុខសញ្ញាបានឃាត់រថយន្ត១គ្រឿង ម៉ាកហ៊ីយ៉ាន់ដាយ កូរ៉េ ទម្ងន់២តោនកន្លះ ដែលពាក់ស្លាកលេខ បន្ទាយមានជ័យ 3A.1191 ដឹកសាច់មាន់ខូចគុណភាពចំនួន១០០ថង់ ស្មើទម្ងន់៨៥០គីឡូក្រាម ដែលមានទ្រូងមាន់ ភ្លៅមាន់ កោះមាន់ ថ្លើមមាន់ ជើងមាន់។
លោកវរៈសេនីយ៍ត្រី រស់ អៀម នាយរងការិយាល័យការិយាល័យប្រឆាំងបទល្មើសសេដ្ឋកិច្ចខេត្តបានបញ្ជាក់ថា៖ ក្រោយពេលឃាត់រថយន្តដឹកសាច់មានល្មើស និងច្បាប់ហើយបានបញ្ជូនមកការិយាល័យប្រឆាំងបទល្មើសសេដ្ឋកិច្ចខេត្តបាននាំយកមកធ្វើការសាកសួរបានឆ្លើយសារភាពថាសាច់មាន់ខូចគុណភាពនេះនាំចូលពីប្រទសថៃតាមច្រករបៀងអូរបីជាន់ ស្រុកអូរជ្រៅ ដែលបង់ជូនកម្លាំងយោធាច្រករបៀងអូរបីជាន់១ឡាន៤ម៉ឺនរៀល ហើយគោលបំណងដឹកទៅខេត្តបាត់ដំបងដាក់តាមភោជនីយដ្ឋាន ដែលស៊ីឈ្នួលដឹក១គីឡូក្រាមតម្លៃ៤បាត ស្មើ៤.០០០រៀលហើយពេលដឹកចេញតាមផ្លូវត្រូវកម្លាំងនគរបាលចាប់បានព្រមទាំងវត្ថុតាង។ លោកបានបញ្ជាក់ថា៖ កម្លាំងជំនាញពាក់ព័ន្ធយកទៅដុតកម្ទេចចោល ហើយរថយន្តដែលដឹកសាច់មាន់ និងអ្នកបើកបរត្រូវបានបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការតាមច្បាប់៕
ចែករំលែកព័តមាននេះ