រាជធានីភ្នំពេញ ៖ ជនសង្ស័យម្នាក់ក្នុងចំណោមជនសង្ស័យ៥នាក់ ដែលត្រូវបានសមត្ថកិច្ចខណ្ឌច្បារអំពៅបញ្ចូនខ្លួនទៅពន្ធនាគារដើម្បីឃុំខ្លួន ដែលពាក់ព័ន្ធករណីគ្រឿងញៀននោះ ស្រាប់តែបានលោតចុះពីលើរថយន្តសមត្ថកិច្ចរត់គេចបាត់ខ្លួនស្រមោល បង្កការភ្ញាក់ផ្អើល កាលពីវេលាម៉ោង១០ និង៣០នាទីព្រឹកថ្ងៃទី១៨ វិច្ឆិកា ស្ថិតនៅតាមបណ្ដោយផ្លូវ២១៧ ក្នុងភូមិប្ញស្សី១ សង្កាត់ស្ទឹងមានជ័យ៣ ខណ្ឌមានជ័យ ។
ជនសង្ស័យដែលរត់គេចខ្លួនមានឈ្មោះ តុប វុទ្ធី អាយុ៣៥ឆ្នាំ មុខរបរមិនពិតប្រាកដ ស្នាក់នៅភូមិចុងព្រែក សង្កាត់ព្រែកឯង ខណ្ឌច្បារអំពៅ ។ ជនរូបនេះ ពាក់ព័ន្ធករណីរក្សាទុក និងប្រើប្រាស់នូវសារធាតុញៀនខុសច្បាប់ ។
តាមប្រភពពីមន្ត្រីសមត្ថកិច្ចខណ្ឌច្បារអំពៅឱ្យដឹងថា នៅវេលាព្រឹកថ្ងៃខែដដែល នោះ ជនសង្ស័យទាំងអស់ ត្រូវបានសមត្ថកិច្ចបញ្ចូនខ្លួនទៅកាន់តុលាការ ដើម្បីអនុវត្តទោសទណ្ឌ ហើយត្រូវបានតុលាការចេញដីកាសម្រេចឃុំខ្លួនដាក់ពន្ធនាគារជាបណ្តោះអាសន្នហើយ ។
ក្រោយចេញដីកាឃុំខ្លួនបណ្តោះអាសន្នរួច ជនសង្ស័យទាំង៥នាក់ ត្រូវបានដឹកបញ្ជូនពីតុលាការទៅឃុំខ្លួននៅពន្ធនាគារព្រៃ.សជាបណ្តោះអាសន្ន ដោយដឹកបញ្ចូនតាមរថយន្តកូរ៉េ ។ ពេលនោះ មានសមត្ថកិច្ច២នាក់អង្គុយនៅកាប៊ីនមុខ និង២នាក់ទៀតនៅខាងក្រោយ ដើម្បីឃ្លាំមើលជនសង្ស័យ ។ ភ្លាមៗនោះ ជនសង្ស័យម្នាក់បានចាក់ប្រើកូនឈើតូចចាក់ខ្នោះដៃបានសម្រេច ក៏លោតចុះពីលើរថយន្តរត់គេចពីសមត្ថកិច្ចភ្លាម ។
មន្ត្រីសមត្ថកិច្ចបានរត់ដេញតាមជនសង្ស័យដែរ តែជនសង្ស័យបានរត់ចូលផ្លូវបេតុង
តូចៗជាច្រើន ហើយរត់គេចបាត់ស្រមោលតែម្តង ។ ក្នុងការរត់គេចនោះ កម្លាំងនគរបាលប៉ុស្តិ៍ស្ទឹងមានជ័យ៣ នគរបាលផ្នែកព្រហ្មទណ្ឌខណ្ឌមានជ័យជាច្រើននាក់ ក៏បានចុះអន្តរាគមន៍ជួយតាមរកជនសង្ស័យផងដែរ ប៉ុន្តែរកពុំឃើញសោះ ។
ជុំវិញបាតុភាពខាងលើនេះ ប្រជាពលរដ្ឋក៏ដូចជាមជ្ឈដ្ឋានទូទៅ ស្នើដល់មន្ត្រីនគរបាលមានសមត្ថកិច្ចទាំងអស់ មេត្តាបង្កើនការយកចិត្តទុកដាក់ខ្ពស់ លើការគ្រប់គ្រងអ្នកទោស ចៀសវៀងការធ្វេសប្រហែល ដែលឱ្យជនល្មើសអាចរត់រួចខ្លួន ។ ករណីនេះ មិននជាលើកទី១ឡើយ គឺកន្លងមកតែងកើតមានជារឿយៗ ព្រោះតែមន្ត្រីសមត្ថកិច្ចមិនបានយកចិត្តទុកដាក់ខ្ពស់លើជនសង្ស័យ ។
ចែករំលែកព័តមាននេះ