រាជធានីភ្នំពេញ ៖ ស្ត្រីម្នាក់រងរបួសធ្ងន់ធ្ងរ រលាកពាសអស់ពេញផ្ទៃមុខ និងដៃទាំងសងខាង ដោយសារតែបុរសជាប្តីចុង បានយកទឹកអាស៊ីតទៅជះស្រោចលើខ្លួន ក្រោយស្ត្រីរូបនេះ បានសុំចែកផ្លូវ តែត្រូវប្តីមិនព្រម…
រាជធានីភ្នំពេញ ៖ ស្ត្រីម្នាក់រងរបួសធ្ងន់ធ្ងរ រលាកពាសអស់ពេញផ្ទៃមុខ និងដៃទាំងសងខាង ដោយសារតែបុរសជាប្តីចុង បានយកទឹកអាស៊ីតទៅជះស្រោចលើខ្លួន ក្រោយស្ត្រីរូបនេះ បានសុំចែកផ្លូវ តែត្រូវប្តីមិនព្រម ។ ហេតុការណ៍ដ៏រន្ធត់នេះ កើតឡងកាលពី
វេលាល្ងាចថ្ងៃទី១៤ វិច្ឆិកា ស្ថិតនៅចំណុចតាមបណ្តោយផ្លូវបេតុងមួយកន្លែង ក្នុងភូមិថ្មី សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
ជនសង្ស័យជាប្តីខាងលើ ឈ្មោះ ខៀវ វិសិដ្ឋសត្យា ស្នាក់នៅក្នុងភូមិថ្មី សង្កាត់ស្ទឹងមានជ័យ១ ខណ្ឌមានជ័យ ។ ដោយឡែក ស្ត្រីរងគ្រោះជាប្រពន្ធមានឈ្មោះឌឿន សុនណារ៉ា អាយុ៤៧ឆ្នាំ ស្នាក់នៅក្នុងភូមិថ្មី សង្កាត់ស្ទឹងមានជ័យ១ ខណ្ឌមានជ័យ ។
តាមប្រភពឱ្យដឹងថា ប្តី-ប្រពន្ធមួយគូរនេះ គឺជាប្តីចុងនិងប្រពន្ធចុង ពោលគឺបុរសជាប្តីមានប្រពន្ធដើម មានកូន៤នាក់ក្នុងបន្ទុក មកស្រលាញ់ស្ត្រីមេម៉ាយ កូន៤ដូចគ្នា ដោយបានរួមរស់នៅជាមួយគ្នា៤ឆ្នាំកន្លងមកហើយ ។ ហើយការរួមរស់នៅជាមួយគ្នារវាងអ្នកទាំង២ គឺពុំមានរៀបអាពាហ៍ពិពាហ៍ត្រឹមត្រូវ តាមប្រពៃណីឡើយ ដោយសារតែបុរសជាប្តីមិនទាន់លែងប្រពន្ធដើម ។
ប្រភពបន្តថា មួយរយៈក្រោយមក ស្ត្រីជាប្រពន្ធចុងបានសុំបុរសជាប្តីចុងបែកគ្នាជាច្រើនលើកច្រើនសារមកហើយ ដោយសារតែស៊ូទ្រាំនឹងការតាមរករឿងពីសំណាក់ប្រពន្ធដើមរបស់បុរសជាប្តីញឹកញាប់មិនបាន តែត្រូវប្តីបដិសេធ និងមិនព្រមចាកចេញពីជីវិតនាងឡើយ ។ លុះវេលាថ្ងៃទី១២ វិច្ឆិកាស្ត្រីរងគ្រោះជាប្រពន្ធចុងបានដេញជនសង្ស័យ ឱ្យចាកចេញពីផ្ទះ ហើយប្តីក៏ព្រមចាកចេញតាមសម្រួល ។ រហូតមកទល់ល្ងាចថ្ងៃទី១៤ បុរសជាប្តីបានជិះម៉ូតូមកស្ទាក់ចាំនៅខាងមុខផ្ទះស្ត្រីរងគ្រោះ លុះនាងចេញមក ជនសង្ស័យ ក៏ធ្វើសកម្មភាពជះទឹកអាស៊ីតលើស្ត្រីជាប្រពន្ធចុង បណ្តាលអោយរងរបួសធ្ងន់ ហើយបុរសជាប្តីជិះម៉ូតូរត់គេចបាត់ស្រមោលតែម្តង ។
ក្រោយការគេចខ្លួន២ថ្ងៃ នៅព្រឹកថ្ងៃ១៥ វិច្ឆិកា នេះ ជនសង្ស័យបានទៅមើលស្ត្រីរងគ្រោះដល់មន្ទីរពេទ្យលោកសង្ឃ ក៏ត្រូវកម្លាំងនគរបាលចុះទៅចាប់ខ្លួនដល់ទីនោះបានភ្លាមៗតែម្តង ។ ចំពោះមុខសមត្ថកិច្ច ជនសង្ស័យបដិសេធថា ខ្លួនមិនបានប្រព្រឹត្តិដូចការចោទប្រកាន់នោះទេ ប៉ុន្តែយ៉ាងណាមិញ សមត្ថកិច្ចនៅតែបន្តនីវិធី ព្រោះដោយយោងតាមចម្លើយឆ្លើយសារភាពរបស់ជនរងគ្រោះ ដែលបានឃើញបុរសជាប្តីជាអ្នកប្រព្រឹត្តិ និងភស្តុតាងទឹកអាស៊ីតនៅជាប់លើម៉ូតូរបស់ជនសង្ស័យផងនោះ ៕
ចែករំលែកព័តមាននេះ