ខេត្តកំពត ៖ បច្ចុប្បន្ន សត្វកុកជាច្រើន ត្រូវអ្នកស្រុកឃើញចុះរកស៊ីចំណីទាំងហ្វូងៗ នៅក្នុងឃុំត្នោតចុងស្រង់ និងឃុំព្រៃទន្លេ ស្រុកបន្ទាយមាស ។ សត្វកុកទាំងនោះមានប្រយោជន៍សម្រាប់ប្រជាពលរដ្ឋ ដោយពួកវាស៊ីខ្យងក្រហមដែលកាត់ស្រូវរបស់ពួកគាត់ ។
ទន្ទឹមពេលប្រជាពលរដ្ឋនៅឃុំព្រៃទន្លេ និងឃុំត្នោតចុងស្រង់ កំពុងព្រួយបារម្ភពីរឿងខ្យងក្រហមជាច្រើនកាត់បំផ្លាញស្រូវ ស្រាប់តែមានកុកជាច្រើនក្បាលមកចាប់ខ្យងទាំងនេះស៊ីជាចំណី ។
កុកទាំងនោះត្រូវអ្នកជំនាញប្រាប់ថា ជាប្រភេទកុកចង្កៀលខ្យង ។ឃុំព្រៃទន្លេ និងឃុំត្នោតចុងស្រង់ មានភូមិសាស្ត្រជាប់នឹងប្រទេសវៀតណាម ។ បើតាមលោកស្វាយ ហៀម មេឃុំព្រៃទន្លេ ប្រាប់ថា ហ្វូងសត្វកុកទាំងនោះ មានជម្រកនៅប្រទេសវៀតណាម ប៉ុន្តែពេលព្រឹក ពួកវាហើរចុះពាសពេញដីរកចំណីនៅភូមិសាស្ត្រឃុំព្រៃទន្លេ និងឃុំផ្សេងៗទៀត លុះពេលល្ងាចហើេរទៅកន្លែងដើមវិញ ។
លោកមេឃុំ ប្រាប់ទៀតថា បន្ទាប់ពីមានហ្វូងកុកនេះហើរមករកចំណីនៅឃុំព្រៃទន្លេ ស្រាប់តែបាត់ខ្យងក្រហម ឬគេហៅថាខ្យងថៃ ព្រោះពួកវាស៊ីខ្យងជាចំណី ។ពលរដ្ឋឈ្មោះសួន អេម ភេទស្រី នៅភូមិព្រៃទន្លេ ប្រាប់ថា អំឡុងពេល២ទៅ៣ឆ្នាំចុងក្រោយនេះ ពលរដ្ឋនៅភូមិព្រៃទន្លេធ្វើស្រែក្នុងរដូវវស្សាម្តងៗ តែងតែព្រួយបារម្ភ ដោយសារតែកើតមានខ្យងក្រហម ឬគេហៅថាខ្យងថៃ កាត់បំផ្លាញស្រូវនៅក្នុងស្រែ រហូតដល់មានអ្នកខ្លះជួលគេឱ្យដើររើសខ្យងក្រហមចេញពីក្នុងស្រែទៀតផង ។ នៅឆ្នាំនេះខណៈកំពុងតែមានកង្វល់រឿងខ្យងក្រហមកាត់ស្រូវ ស្រាប់តែមានហ្វូងកុកចុះមកស៊ី ស្ទើរតែអស់ផុតពូជ ។
ពលរដ្ឋម្នាក់ទៀត ឈ្មោះលេង ផាត ភេទប្រុស អាយុ៤៥ឆ្នាំ នៅភូមិព្រៃទន្លេ និយាយថា ហ្វូងសត្វកុកនេះហើរពីប្រទេសវៀតណាម រកស៊ីចំណីនៅក្នុងឃុំព្រៃទន្លេ ។ ពួកវាស៊ីខ្យងក្រហម ដែលមានពងស្អេកស្កះនៅលើភ្លឺស្រែ ឬនៅលើដើមរុក្ខជាតិតូចៗនៅក្នុងទឹក ប៉ុន្តែឥឡូវនេះមិនមានខ្យងក្រហមទៀតទេ ។លោកសេង គឹមហ៊ត ប្រធានគម្រោងអភិរក្សសត្វក្រៀល មានប្រសាសន៍ថា ហ្វូងសត្វកុក ដែលជួយបំផ្លាញខ្យងក្រហមនេះ គឺកុកចង្កៀលខ្យង ជាប្រភេទសត្វស៊ីខ្យងជាចំណី ។ លោកធ្លាប់ទទួលដំណឹងថា មានខ្យងក្រហមកាត់សន្ទូងអ្នកស្រុក តែក្រោយមកមានសត្វចង្កៀលខ្យងស៊ីជាចំណីអស់ពីក្នុងស្រែ ។
លោកប្រធានគម្រោងអភិរក្សសត្វក្រៀល មានប្រសាសន៍កាលពីថ្ងៃអាទិត្យ ទី២១ តុលា ថា ប៉ែកខាងកើតខេត្តកំពត ពិតជាអស់ខ្យងក្រហមមែន ប៉ុន្តែខេត្តតាកែវកំពុងកើតមានខ្យងក្រហមច្រើនសម្បើមគួរឱ្យបារម្ភ ព្រោះខ្យងក្រហមនេះគ្មានប្រយោជន៍អ្វីដល់ប្រជាពលរដ្ឋទេ ផ្ទុយទៅវិញវាកាត់បំផ្លាញស្រូវរបស់ពួកគាត់ ៕
ចែករំលែកព័តមាននេះ