រាជធានីភ្នំពេញ ៖ ស្ត្រីជាអ្នកម៉ាស្សាម្នាក់ ត្រូវបានស្ត្រីម៉ាស្សាដូចគ្នាប្រទះឃើញដេកស្លាប់ទាំងអាក្រាតកាយក្នុងបន្ទប់ផ្ទះម៉ាស្សាមួយកន្លែង យីហោពេញចិត្ត ស្ថិតក្នុងភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌចំការមន បង្កការភ្ញាក់ផ្អើលកាលពីវេលាម៉ោង២ រសៀលថ្ងៃទី៦ វិច្ឆិកា ។
ស្ត្រីរងគ្រោះមានឈ្មោះ ឆន ធឿន អាយុ៣៣ឆ្នាំ មុខរបរម៉ាស្សា ស្នាក់នៅកន្លែងកើតហេតុ មានស្រុកកំណើតនៅស្រុកក្រគរ ខេត្តពោធិ៍សាត់ ។ បច្ចុប្បន្នស្ត្រីរូបនេះមានកូន៣នាក់ក្នុងបន្ទុក ដែលកំពុងរស់នៅជាមួយប្តីដែលជាអ្នកចំការ នៅឯស្រុកកំណើត ។
តាមប្រភពព័ត៌មាន ពីស្ត្រី២នាក់ដែលជាអ្នកបម្រើការនៅកន្លែងកើតហេតុ បានរៀបរាប់ឱ្យដឹងថា ស្ត្រីរងគ្រោះគឺស្នាក់នៅក្នុងហាងជាអចិន្ត្រៃយ៍ ដោយឡែកនាងទាំង២នាក់ពុំស្នាក់នៅជាមួយទេ វេលាម៉ោង១ទៅ២រសៀល ទើបពួកនាងមកធ្វើការនៅចំណុចកើតហេតុ ហើយវេលាម៉ោង៩យប់ ទើបត្រឡប់ទៅផ្ទះវិញ ។
ពួកគេបន្តថា លុះមកទល់វេលារសៀលថ្ងៃកើតហេតុ ពួកនាងទាំង២នាក់បានមកដល់ ឃើញទ្វារផ្ទះត្រូវបិទតែពុំមានចាក់សោពីក្រៅនោះទេ ។ ភ្លាមៗនោះ ពួកនាងក៏ទាញទ្វារចូលទៅខាងក្នុងផ្ទះ ហើយចូលទៅមើលបន្ទប់ជាន់ក្រោម ស្រាប់តែប្រទះឃើញស្ត្រីរងគ្រោះ ដេកទាំងសម្រាតកាយ និងមានកន្សែងរឹត.ក ជាហេតុធ្វើឱ្យពួកគេភ័យស្លន់ស្លោររត់ទៅរាយការណ៍ជូននគរបាលមូលដ្ឋានឱ្យចុះអន្តរាគមន៍ ទាំងមិនដឹងថាស្ត្រីរងគ្រោះនៅរស់ ឬមួយក៏ស្លាប់ឡើយ ។
បន្ទាប់ពីមានការភ្ញាក់ផ្អើល កម្លាំងនគរបាលមូលដ្ឋាន និងខណ្ឌ រួមជាមួយសមត្ថកិច្ចជំនាញកោសល្យវិច័យបានចុះអន្តរាគមន៍ភ្លាមៗ ដើម្បីពិនិត្យទីតាំងកើតហេតុ ។ មន្ត្រីសមត្ថកិច្ចបញ្ជាក់ថា សពត្រូវស្លាប់ទាំងសម្រាតកាយ ដោយផ្នែក.កត្រូវរឹតតឹងដោយខ្សែដែកហាលសម្លៀកបំពាក់ រួមជាមួយកូនកន្សែងធំល្មមរឹតយ៉ាង ខ្លាំង ។ ជាជំហានដំបូង សមត្ថកិច្ចសន្និដ្ឋានថា ជាករណីឃាតកម្ម ដោយសង្ស័យថា ជនសង្ស័យធ្វើសកម្មភាពរំលោភហើយរឹត.កសម្លាប់បំបិទមាត់តាមក្រោយ ។
ស្ត្រីជាបងជនរងគ្រោះមានឈ្មោះ ឆន ធន អាយុ៣៧ឆ្នាំ បានប្រាប់ឱ្យដឹងថា នៅវេលាម៉ោង៩ព្រឹក ថ្ងៃខែឆ្នាំខាងលើ ស្ត្រីជាប្អូនបានទូរស័ព្ទមកខ្លួនសួរថា មកពីស្រុកកំណើតវិញ ឬនៅ .? ព្រោះគាត់ជាបងទៅលេងស្រុកតាំងពីថ្ងៃទី៣ វិច្ឆិកាមកម្ល៉េះ ។ ពេលនោះគាត់ជាបងប្រាប់ថា ចេញទៅព្រឹកនេះហើយ លុះវេលាម៉ោង២រសៀល ក៏មានទូរស័ព្ទពីសមត្ថកិច្ចប្រាប់ថា ប្អូនស្រីត្រូវគេសម្លាប់ ។
ស្ត្រីជាបងជនរងគ្រោះបន្តថា ជារៀងរាល់ថ្ងៃ គាត់និងប្អូនស្រីធ្វើការម៉ាស្សានៅទីតាំងកើតហេតុ លុះវេលាយប់ឡើង នាងទៅស្នាក់នៅផ្ទះជួលជាមួយប្តីនៅម្តុំលូ៥ ដោយឱ្យប្អូនស្រីសម្រាកតែម្នាក់ឯង បានជាង៦ខែហើយ គិតចាប់តាំងពីគេធ្វើការមក។ ស្ត្រីជាបងនិយាយថា ប្អូនស្រីរបស់គាត់ពុំធ្លាប់មានជម្លោះជាមួយបុគ្គលណានោះឡើយ។ មន្ត្រីប៉ូលិសថា តាមការសន្និដ្ឋានជំហានដំបូង គឺជាការរំលោភ រួចសម្លាប់បំបិទមាត់ ព្រោះអាចជាមនុស្សស្គាល់គ្នា។
ចែករំលែកព័តមាននេះ