រាជធានីភ្នំពេញ ៖ រដ្ឋមន្ត្រីក្រសួងទេសចរណ៍អះអាងថា ព្រះរាជពិធីបុណ្យអុំទូក អកអំបុក និងសំពះព្រះខែឆ្នាំនេះ បានរៀបចំប្រព្រឹត្តិទៅបានយ៉ាងរលូន និងល្អជាងឆ្នាំមុនៗ ដោយមានប្រជាពលរដ្ឋមកពីគ្រប់ទិសទីចូលរួម មានទឹកមុខសប្បាយរីករាយ និងមានភ្ញៀវទេសចរណ៍បរទេសចូលរួមយ៉ាងច្រើនកុះករ។
លោក ថោង ខុន បានមានប្រសាសន៍នៅថ្ងៃទី៥ វិច្ឆិកានេះថា «ទិដ្ឋភាពរួមជាទូទៅក្នុងរយៈពេល៣ថ្ងៃនៃព្រះរាជពិធីបុណ្យប្រពៃណីដ៏ធំមួយនេះ មានភ្ញៀវអន្តរជាតិចូលរួមប្រមាណជាងមួយម៉ឺនបួនពាន់នាក់ ។ ពួកគាត់មានទឹកមុខសប្បាយរីករាយ និងមានបរិយាកាសសន្តិភាព មានការយោគយល់សាមគ្គីគ្នា ពោលគឺសប្បាយរីករាយជាមួយបរិយាកាសស្រុកទេសមានស្ថេរភាព មានសន្តិភាពពេញលេញ និងមានឱកាសអភិវឌ្ឍន៍រីកចំរើនលើគ្រប់វិស័យដូចពេលនេះ»។
លោករដ្ឋមន្ត្រីបន្តថា ការរៀបចំឆ្នាំនេះមានភាពប្លែកៗ បើទោះជាមានទូកត្រឹមតែ២៧០ទូក កើនឡើង២០ទូក បើប្រៀបធៀបទៅនឹងឆ្នាំ២០១៦ ប៉ុន្តែបច្ចេកទេសនៃការរៀបចំប្រណាំងបានល្អ ហើយការរៀបចំទទួលកីឡាករការស្នាក់នៅ ហូបចុកក៏បានល្អ មានរបៀបរៀបរយ សណ្តាប់ធ្នាប់ សុវត្ថិភាព និងសន្តិសុខ គឺល្អបំផុត មានការគាំទ្រពីសាធារណជន។ ដោយឡែកសម្រាប់ការទទួលភ្ញៀវជាតិ និងអន្តរជាតិមិនមានការកកស្ទះណែនណាន់ដូចពេលមុនៗឡើយ ចំពោះភ្ញៀវអន្តរជាតិបានរៀបចំវេទិកាទទួលជាពិសេសឱ្យទស្សនាពិធីអុំទូក ដោយមានបកប្រែជា៤ភាសា និងបំរើភេសជ្ជៈដោយឥតគិតថ្លៃទៀតផង ។ ភ្ញៀវអន្តរជាតិដែលបានចូលរួមមាន៖ ចិន កូរ៉េ ឥណ្ឌា អង់គ្លេស អាមេរិកាំង ច្រើនជាងគេគឺបារាំង។
លោករដ្ឋមន្ត្រីបញ្ជាក់ថា តាមរយៈបុណ្យវប្បធម៌ និងជាប្រពៃណីមួយនេះ ក៏ជាសមិទ្ធផលទេសចរណ៍មួយដ៏ល្អ ដែលបានបង្ហាញដល់ភ្ញៀវទេសចរណ៍អន្តរជាតិទូទាំងពិភពលោកឱ្យបានស្គាល់កម្ពុជាកាន់តែច្បាស់ថែមទៀត បន្ថែមពីលើកិច្ចខិតខំផ្សព្វផ្សាយតាមប្រព័ន្ធព័ត៌មានជាតិ និងអន្តរជាតិនាពេលកន្លងមក និងជួយបង្កើនចំនួនទេសចរមកកាន់កម្ពុជាថែមទៀតផង។
គួរបញ្ជាក់ផងដែរថា សម្រាប់វិស័យទេសចរណ៍កម្ពុជា ក្នុងរយៈពេល៨ខែដើមឆ្នាំ២០១៧ កម្ពុជាទទួលបានទេសចរអន្តរជាតិប្រមាណ ៣,៥៣៦.៥៣០នាក់ កើនឡើង ១១.៨% ៕
ចែករំលែកព័តមាននេះ