រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ (គ.ជ.ប) បានឲ្យដឹងថា ពេលនេះស្ថាប័ន គ.ជ.ប បាននិងកំពុងពិភាក្សាលើច្បាប់ចំនួន៤ ដែលត្រូវបានព្រះមហាក្សត្រឡាយព្រះហត្ថលេខាដាក់ឱ្យប្រើប្រាស់ពាក់ព័ន្ធនឹងការបែងចែកអាសនៈគណបក្សនយោបាយណាមួយដែលត្រូវរំលាយ។
លោក ហង្ស ពុទ្ធា អ្នកនាំពាក្យ និងជាសមាជិក គ.ជ.ប បានឲ្យដឹងនៅថ្ងៃទៅទី ១វិច្ឆិកា ថា គ.ជ.ប បានទទួលបានសេចក្តីវិសោធនកម្មច្បាប់ទាំង៤ ទាក់ទងនឹងការបែងចែកអាសនៈរបស់គណបក្សនយោបាយណាមួយ (គណបក្សសង្គ្រោះជាតិ) នៅពេលត្រូវបានតុលាការកំពូលសម្រេចរំលាយរួចហើយ។
លោក ហង្ស ពុទ្ធា បានបញ្ជាក់ឲ្យដឹងថា៖ «យើងកំពុងតែពិភាក្សាគ្នា ដើម្បីបញ្ចូលសេចក្តីវិសោធនកម្មច្បាប់ទាំងនេះ ក្នុងនីតិវិធីរបស់ គ.ជ.ប ដែលត្រូវធ្វើ ហើយធ្វើដែល គ.ជ.ប ត្រូវធ្វើអ្វីដែលច្បាប់បានកំណត់នោះទេ »។
លោកបានបន្ថែមថា៖ «រាល់អ្វីដែល គ.ជ.ប ធ្វើនោះត្រូវបានកំណត់ដោយច្បាប់ជានិច្ច ហើយពេលនេះយើងកំពុងធ្វើការពិភាក្សាគ្នារឿងបែងចែកអាសនៈនេះ»។ យ៉ាងណាក្តីអ្នកនាំពាក្យរូបនេះ មិនធ្វើអត្ថាធិប្បាយពាក់ព័ន្ធនឹងការបែងចែកអាសនៈរបស់គណបក្សសង្គ្រោះជាតិ នៅពេលរំលាយដោយអំណាចតុលាកំពូលយ៉ាងណានោះទេ ដោយបានអះអាងកំពុងស្ថិតក្នុងដំណាក់កាលពិភាក្សាគ្នា ។
អ្នកនាំពាក្យ គ.ជ.ប ក៏បានលើកឡើងថា គ.ជ.ប មិនធ្វើការអត្ថាធិប្បាយណាមួយពាក់ព័ន្ធបញ្ហានយោបាយនោះទេ គឺ គ.ជ.ប ធ្វើអ្វីទៅតាមច្បាប់ចែងប៉ុណ្ណោះ ។ ដូច្នេះសុំកុំទាញស្ថាប័ន គ.ជ.ប ចូលក្នុងរឿងនយោបាយ៕
ចែករំលែកព័តមាននេះ