ខេត្តប៉ៃលិន ៖ បើអ្នកទេសចរជិះម៉ូតូតាមផ្លូវក្រវាត់ព្រំដែន ចាប់ពីភូមិផ្សារព្រំ ឃុំស្ទឹងកាច់ ស្រុកសាលាក្រៅ ឆ្ពោះទៅទិសខាងត្បូង គេនឹងសង្កេតឃើញព្រៃភ្នំ និងព្រៃដែលដុះនៅតាមមាត់អូរ បញ្ចេញពណ៌ខៀវស្រងាត់…
ខេត្តប៉ៃលិន ៖ បើអ្នកទេសចរជិះម៉ូតូតាមផ្លូវក្រវាត់ព្រំដែន ចាប់ពីភូមិផ្សារព្រំ ឃុំស្ទឹងកាច់ ស្រុកសាលាក្រៅ ឆ្ពោះទៅទិសខាងត្បូង គេនឹងសង្កេតឃើញព្រៃភ្នំ និងព្រៃដែលដុះនៅតាមមាត់អូរ បញ្ចេញពណ៌ខៀវស្រងាត់ គួរឱ្យចង់គយគន់ និងស្រស់ស្រាយក្នុងអារម្មណ៍។
ប្រជាពលរដ្ឋរស់នៅក្បែរព្រំដែន កាលពីពេល ថ្មីៗកន្លងមកឱ្យដឹងថា ទេសភាពព្រៃឈើនៅតាមភ្នំ និងជ្រលងដងអូរបញ្ចេញពណ៌ខៀវខ្ចីស្រស់បំព្រង ទាក់ទាញភ្នែកភ្ញៀវទេសចរដែលនាំគ្នាដើរលេងកម្សាន្តបំបាត់ការអផ្សុក និងភាពធុញថប់ក្នុងអារម្មណ៍ ។ ជាពិសេសកាលពីរដូវភ្ជុំបិណ្ឌកន្លងទៅ ខណៈអ្នកខ្លះទៅលេងទឹកធ្លាក់ភ្នំខៀវ និងរមណីយដ្ឋាន ផ្សេងៗ ប៉ុន្តែមនុស្សមួយចំនួននាំគ្នាបើកម៉ូតូ និងរថយន្តទៅលេងកម្សាន្តនៅតាមផ្លូវដងអូរក្រវាត់ព្រំដែនយ៉ាងសប្បាយរីករាយ ។ លើសពីនេះផ្លូវព្រំដែនដ៏ធំទូលាយ ដែលអាជ្ញាធរ បានកសាងកាលពីពេលថ្មីៗកន្លងទៅ បង្កលក្ខណៈងាយស្រួលដល់អ្នកដែលរស់នៅតំបន់ព្រៃភ្នំ ព្រមទាំងការធ្វើដំណើរ ។
បើតាមសម្តីរបស់ភ្ញៀវទេសចរនៅក្នុងមូលដ្ឋានឱ្យដឹងថា «ការធ្វើផ្លូវក្រវាត់ព្រំដែន ទទួលបានផលចំណេញច្រើន ដោយអាចការពារទឹកដីរបស់យើងឱ្យបានគង់វង្ស ហើយក៏ក្លាយទៅជាកន្លែងធ្វើដំណើរកម្សាន្តទស្សនាទេសភាពព្រៃឈើនៅតាមដងអូរ ដែលមានទឹកហូរ រេញៗ ធ្វើឱ្យមានអារម្មណ៍ស្រស់ថ្លា និងបង្កើនកម្លាំងចិត្ត កម្លាំងកាយបន្ថែមទៀត» ។
ចំណែកប្រជាពលរដ្ឋរស់នៅក្បែរតំបន់ព្រំដែនបានដាំដំណាំជាច្រើនប្រភេទដូចជាពោត ដំឡូងមី ស្វាយ និងតាងែន ហៅមៀនប៉ៃលិនជាដើម ដែលបានផលដឹកយកទៅលក់នៅក្រុងប៉ៃលិនទាន់ពេលវេលា ព្រោះមានផ្លូវក្រាលក្រួសក្រហមដ៏ល្អ ។ លើសពីនេះក៏មានប្រជាពលរដ្ឋដាំដំណាំបន្លែអន្លក់ក្បែរមាត់អូរ ដោយមានទឹកខួបប្រាំងខួបវស្សា បូមយកទៅស្រោច ហើយទទួលផលលក់បានប្រាក់ផ្គត់ផ្គង់ជីវភាពគ្រួសារ ៕
ចែករំលែកព័តមាននេះ