រាជធានីភ្នំពេញ ៖ ដើម្បីជំរុញការប្រើប្រាស់ហិរញ្ញវត្ថុ កាន់តែងាយស្រួលនៅក្នុងប្រទេសកម្ពុជា ធនាគារឯកទេសវីង និងធនាគារពាណិជ្ជកម្មក្រៅប្រទេសនៃកម្ពុជា (FTB ) បានពង្រីកកិច្ចសហប្រតិបត្តិការរបស់ខ្លួន ដោយបន្ថែមនូវសេវាកម្មថ្មីៗជាមួយនឹងការសម្រួលកាន់តែល្អ…
រាជធានីភ្នំពេញ ៖ ដើម្បីជំរុញការប្រើប្រាស់ហិរញ្ញវត្ថុ កាន់តែងាយស្រួលនៅក្នុងប្រទេសកម្ពុជា ធនាគារឯកទេសវីង និងធនាគារពាណិជ្ជកម្មក្រៅប្រទេសនៃកម្ពុជា (FTB ) បានពង្រីកកិច្ចសហប្រតិបត្តិការរបស់ខ្លួន ដោយបន្ថែមនូវសេវាកម្មថ្មីៗជាមួយនឹងការសម្រួលកាន់តែល្អ ក្នុងគោលបំណងជួយអតិថិជននៃស្ថាប័នទាំងពីរកាត់បន្ថយចំណាយរាល់ពេលអតិថិជនផ្ទេរប្រាក់ម្ដងៗប្រកបដោយទំនុកចិត្តខ្ពស់ទៅលើសេវាកម្មវីង និងធនាគារ FTB ។
លោក ហ្គី អានវ៉ានិថ អគ្គនាយកប្រតិបត្តិធនាគារពាណិជ្ជក្រៅប្រទេសនៃកម្ពុជា បានឲ្យដឹងថា កិច្ចសហការនេះនឹងធ្វើឱ្យអតិថិជនរបស់វីង និងធនាគារពាណិជ្ជកម្មក្រៅប្រទេសនៃកម្ពុជា កាន់តែមានភាពងាយស្រួលជាងមុន ដោយក្នុងនោះអតិថិជនវីង អាចផ្ទេរប្រាក់ទៅកាន់អតិថិជនដែលប្រើប្រាស់គណនីធនាគារ FTB ហើយអតិថិជនរបស់ FTB ក៏អាចផ្ទេរប្រាក់ទៅគណនីរបស់វីងបានដូចគ្នា ។ ទាំងនេះ គឺជាការពង្រីកខ្លួនកាន់តែធំជាងមុននិងងាយស្រួលជាងមុន សម្រាប់អតិថិជនទាំងពីរស្ថាប័ន ។
ថ្លែងក្នុងសន្និសីទសារព័ត៌មានមួយកាលពីថ្ងៃទី២៤ តុលា ២០១៧ នៅការិយាល័យកណ្ដាលធនាគារឯកទេសវីង តាមបណ្ដោយផ្លូវព្រះមុនីវង្សលោក Jojo Malolos នាយកប្រតិបត្តិធនាគារឯកទេសវីងបានឱ្យដឹងថា៖ «អតិថិជន គឺជាអាទិភាពដ៏ចម្បងរបស់យើង ហើយយើងនៅតែបន្តព្យាយាមផ្តល់ជូនអតិថិជននូវបទពិសោធន៍ថ្មីៗពីវីង» ។
ជាការពិតណាស់បទពិសោធន៍ថ្មីនេះ គឺការប្រើប្រាស់កាបូបលុយចល័តរបស់ពួកយើងដែលអនុញ្ញាតឲ្យអតិថិជនទាំងអស់ងាយស្រួលផ្ញើប្រាក់ទៅកាន់អ្នកដទៃ បញ្ចូលលុយទូរស័ព្ទ ទូទាត់វិក្កយប័ត្រ ទូទាត់តាមអនឡាន ដែលបទពិសាធន៍ទាំងនេះ គឺស្ថិតក្នុងដៃអតិថិជនគ្រប់ទីកន្លែងក្នុងប្រទេសកម្ពុជា។ ធនាគារពាណិជ្ជកម្មក្រៅប្រទេសនៃកម្ពុជា និងវីង ជាធនាគារនាំមុខគេខាងបច្ចេកវិទ្យា ហើយភាពជាដៃគូនេះមានន័យថា អតិថិជនរបស់ពួកយើងនឹងអាចធ្វើឲ្យការប្រើប្រាស់សាច់ប្រាក់កាន់តែងាយស្រួល ។
គួរបញ្ជក់ថា រហូតមកដល់ពេលនេះ វីងមានភ្នាក់ងារប្រតិបត្តិការប្រមាណ៥ពាន់កន្លែងទូទាំងប្រទេស ហើយអតិថិជនប្រមាណ៦០ម៉ឺននាក់របស់វីង អាចបើកគណនីរបស់ ធនាគារ FTB បាន និងអាចដាក់ប្រាក់បាននៅតាមទូអេធីអ៊ឹម ចំនួន៥៥ និងម៉ាស៊ីនឆូតកាត ៩៤ ក្នុងខេត្ត-ក្រុងសំខាន់ៗចំនួន ៥ មានដូចជា ភ្នំពេញ សៀមរាប បាត់ដំបង កំពង់ចាម និងខេត្តព្រះសីហនុ ។ អ្វីដែលពិសេសអតិថិជនដាក់ប្រាក់សន្សំនៅក្នុងគណនីរបស់ធនាគារ FTB អាចទទួលបានអត្រាការប្រាក់ចំនួន 0.75% ក្នុងមួយឆ្នាំសម្រាប់គណនីសន្សំជាដុល្លារ និង1.5% សម្រាប់គណនីសន្សំជាប្រាក់រៀល ៕
ចែករំលែកព័តមាននេះ