ខេត្តកំពត ៖ កសិករម្នាក់ឈ្មោះសុខ ដាំ បានឡើងភ្នំជាមួយនឹងអ្នកភូមិមានផ្ទះក្បែរគ្នាសរុប៤នាក់ដើម្បីទៅរើសផ្លែខោស កាលពីថ្ងៃទី២ តុលា តែពេលអ្នកភូមិទាំងនោះត្រឡប់មកដល់កន្លែងស្នាក់នៅវិញមិនឃើញបុរសនោះទេ ក៏មានការសង្ស័យថាក្រែងគាត់ចុះមកផ្ទះមុន តែពេលទូរស័ព្ទមកសួរប្រពន្ធកូននៅឯផ្ទះ ក៏ដឹងថាបុរសនោះមិនទាន់មកផ្ទះ ទើបមានការសង្ស័យ ហើយក្រុមគ្រួសារក៏បាន ពឹងពាក់អ្នកភូមិឱ្យជួយដើររកក្នុងព្រៃភ្នំ តាំងពីដឹងដំណឹងថាបាត់ ។
តាមបុរសឈ្មោះជុំ ប៊ុន្នី អាយុ៣៩ឆ្នាំ ជាអ្នកភូមិដែលរួមដំណើរទៅព្រៃភ្នំរើសផ្លែខោសជាមួយគ្នានិយាយថា ពេលធ្វើដំណើរដល់កណ្តាលព្រៃភ្នំជួរភ្នំបូកគោ ត្រង់ចំណុចខាងជើងទឹកធ្លាក់ចម្ងាយជាង២គីឡូម៉ែត្រ ក៏បានធ្វើកន្លែងស្នាក់នៅ(កន្លែងស្នាក់របស់អ្នកឡើងភ្នំគេហៅថាជ័យ) ។ ក្នុងការស្នាក់នៅជាមួយគ្នានេះ បុរសឈ្មោះសុខ ដាំ បានត្អូញថា មិនស្រួលខ្លួន ហើយពួកគេទាំង៣នាក់ក៏ឱ្យគាត់នៅចាំ«ជ័យ»សិនចុះ ចាំថ្ងៃត្រង់ពួកគេត្រឡប់មកជ័យវិញចាំគិតគ្នាទៅរកកន្លែងផ្សេងទៀត ។ បុរសឈ្មោះប៊ុន្នី បន្តទៀតថា លុះដល់វេលាម៉ោង១២និង៣០នាទីថ្ងៃត្រង់ថ្ងៃដដែល ពួកខ្លួន៣នាក់ក៏មកដល់កន្លែងស្នាក់វិញ តែមិនឃើញបុរសឈ្មោះដាំ ក៏នាំគ្នាចុះមករកកន្លែងមានសេវាទូរស័ព្ទ ដើម្បីទាក់ទងមកក្រុមគ្រួសារនៅឯផ្ទះក្រែងឈ្មោះដាំចុះមកផ្ទះមុន ព្រោះគាត់មានសុខភាពពុំសូវល្អ ។
ប្រភពដដែលបន្តទៀតថា ក្រោយពេលអ្នកទៅជាមួយគ្នាសួរមកផ្ទះមិនឃើញ ទើបសង្ស័យថា ឈ្មោះដាំ ពិតជាដើរចេញពីកន្លែងស្នាក់រួចវង្វេងនៅក្នុងព្រៃ ហើយពេលនោះពួកគាត់ទាំង៣នាក់ ក៏ត្រឡប់ទៅកន្លែងស្នាក់នៅវិញ ព្រមទាំងដើររកនិងស្រែកហៅពេញព្រៃភ្នំរហូតថ្ងៃលិច ក៏នៅតែមិនឮសូរឆ្លើយតប ។ លុះព្រឹកឡើងក៏នាំគ្នាចុះមកភូមិវិញ ដើម្បីជួយជ្រោមជ្រែងជាមួយក្រុមគ្រួសារ ប្រពន្ធកូន អ្នកបាត់ខ្លួន ដើម្បីពឹងអ្នកស្រុកនៅជិតគ្នាឱ្យទៅជួយដើររកក្រែងឈ្មោះដាំវង្វេងក្នុងព្រៃ ។
ស្ត្រីឈ្មោះឡាយ ឃាន អាយុ៤៧ឆ្នាំ ជាប្រពន្ធបានឱ្យដឹងថា ប្តីគាត់ដែលបាត់ខ្លួន អាយុ៥១ឆ្នាំ មានកូន៣នាក់ (ស្រី២នាក់) និងម្តាយចាស់ជរាម្នាក់ រស់នៅភូមិកែបថ្មី ឃុំបឹងទូក ស្រុកទឹកឈូ ។ ដោយសាររដូវនេះជារដូវផ្លែខោសទុំ អ្នកភូមិតែងបបួលគ្នាទៅរើសផ្លែខោសនៅជួរភ្នំបូកគោ និងភ្នំកំចាយទឹកឈូ ហើយប្តីគាត់ក៏ទៅរើសនឹងគេដែរ ។ ពេលចេញដំណើរទៅនោះ រូបគាត់បានខ្ចប់ម្ហូប អង្ករ ក្នុងនោះប្តីគាត់ដាក់ទាំងស្រាទៅតាមផង ពីព្រោះប្តីគាត់អត់ស្រាមួយថ្ងៃមិនបានទេ ។ ស្ត្រីជាប្រពន្ធបញ្ជាក់ថា ប្តីគាត់អត់ស្រាមួយពេលគឺគាត់ញ័រដៃ ។
ចំណែកអ្នកទៅជាមួយប្រាប់គាត់ថា ពេលទៅដល់ព្រៃភ្នំនោះទាំងអស់គ្នាក៏បានធ្វើកន្លែងស្នាក់នៅ ។ ពេលនោះពួកគេឃើញប្តីគាត់បែបមិនស្រួលខ្លួន ក៏ឱ្យគាត់នៅចាំកន្លែងស្នាក់ ចាំដល់ថ្ងៃត្រង់ទើបពួកគេត្រឡប់មកជុំគ្នាវិញ ដោយទុកស្រាដែលយកទៅភ្នំនោះនៅកន្លែងស្នាក់ដែរ ។ អ្នកភូមិដែលទៅជាមួយគ្នាក៏បានហាមកុំឱ្យគាត់ផឹកស្រាខ្លាចក្រែងស្រវឹងនិយាយផ្តេសផ្តាសក្នុងព្រៃភ្នំ ដែលនេះជាត្រណមសម្រាប់អ្នកដើរក្នុងព្រៃភ្នំ ។ ជាការពិត ប្តីគាត់បើស្រវឹងស្រា គឺមិនជេរអ្វីទាំងអស់ ក្រោយពីឱ្យប្តីគាត់នៅចាំ ពួកគេក៏ចេញទៅ លុះដល់ម៉ោង១២និង៣០នាទីថ្ងៃត្រង់ ពួកអ្នកភូមិត្រឡប់មកវិញ ស្រាប់តែបាត់ប្តីគាត់តែម្តង ហើយគេក៏បានទូរស័ព្ទសួរមកគាត់នៅឯផ្ទះ ទើបដឹងថាប្តីគាត់បាត់ខ្លួននៅក្នុងព្រៃ ។
តាំងពីពេលនោះមក គាត់បានពឹងអ្នកស្រុក និងបងប្អូនឱ្យជួយរកអស់រយៈពេល៧យប់៨ថ្ងៃ ហើយមកដល់ថ្ងៃទី៩ តុលា តែពុំមានដំណឹងអ្វីសោះ ។ ស្ត្រីជាប្រពន្ធឱ្យដឹងទៀតថា កាលពីថ្ងៃទី៨ តុលា មានកម្មករធ្វើការនៅភ្នំបូកគោម្នាក់ដើររើសផ្លែខោស រួចវង្វេងក្នុងព្រៃទៅប៉ះសម្បុកជ្រូកព្រៃនឹកស្មានថាជាមនុស្ស ដេកស្លាប់ក្នុងព្រៃក៏ឱ្យដំណឹងមកគាត់ ។ នៅព្រឹកថ្ងៃទី៩ តុលា គាត់ឱ្យបងប្អូន និងអ្នកដែលឃើញជូនទៅដល់កន្លែងដែលប្រទះឃើញនោះដឹងថាជាសម្បុកជ្រូកព្រៃ ទើបប្រាប់ដំណឹងមកផ្ទះវិញថាជាសម្បុកជ្រូកទេ ។ ពេលនេះមានតែធ្វើបុណ្យជាគម្រប់៧ថ្ងៃជូនប្តីទេ បើគាត់ស្លាប់ក៏ទទួលយកការឧទ្ទិសកុសលនេះចុះ តែបើនៅរស់ក៏សូមបុណ្យកុសលឱ្យរួចផុតពីការវង្វេងក្នុងព្រៃមកផ្ទះវិញ ដើម្បីជួបប្រពន្ធកូន ៕
ចែករំលែកព័តមាននេះ