រាជធានីភ្នំពេញ ៖ ម៉ោងជាង៦ល្ងាចទៅហើយមេឃចាប់ផ្តើមងងឹត នៅមុខភូមិគ្រឹះសម្តេចតេជោ មានការភ្ញាក់ផ្អើលឈុលមិនធ្លាប់មាន ដោយសារតែជនស្លៀកពាក់ស៊ីវិលមានអំណាចមួយក្រុម ដេញចាប់ផង បាញ់ផង កណ្តាលរាជធានីធ្វើឱ្យអ្នកភ័យខ្លាច បើករថយន្តរត់រកសម្តេចតេជោ និងអង្គរក្សសម្តេចឱ្យជួយ ។
ប្រភពព័ត៌មានពីប្រភពនានា គួរឱ្យជឿជាក់ត្រូវបានរាយការណ៍ដោយសង្ខេបដូចខាងក្រោមនេះ ៖
លោកស្រី ទេព កុលាប ក្នុងរឿងក្តីជាមួយឧកញ៉ាកុក អាន កាលពីព្រឹកថ្ងៃទី២៨ កញ្ញា ឆ្នាំ២០១២ តុលាការកំពូលបានប្រកាសសាលដីកាលើកលែងការចោទប្រកាន់និងបញ្ជាឱ្យដោះលែងពីពន្ធនាគារជាបន្ទាន់ក្នុងថ្ងៃដដែល ។ ដោយសារមានជំងឺ លោកស្រី ទេព កុលាប ដែលបានសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត បានបន្តព្យាបាលរហូតដល់ល្ងាចថ្ងៃទី១ តុលា ទើបត្រូវបានគ្រូពេទ្យអនុញ្ញាតឱ្យចាកចេញ ។ ការចាកចេញពីមន្ទីរពេទ្យក្នុងបំណងឆ្ពោះទៅកាន់សាកលវិទ្យាល័យភ្នំពេញអន្តរជាតិ ដែលលោកស្រីជាសាកលវិទ្យាធិការ និងជាស្ថាបនិក ដែលនៅទីនោះមានការរៀបចំជាស្រេចដោយមានសាស្ត្រាចារ្យ បុគ្គលិក និងនិស្សិតប្រមាណ២.០០០នាក់រង់ចាំស្វាគមន៍ ដោយក្តីរីករាយ ។
ប្រភពព័ត៌មានច្បាស់ការឱ្យដឹងថា រថយន្ត១២កៅអីធុនទំនើប១គ្រឿង ពណ៌ទឹកប្រាក់ ពាក់ស្លាកលេខភ្នំពេញ២S-៧២០០ នៅក្នុងរថយន្តមានគ្នា៩នាក់ ជាសាច់ញាតិជិតដិតជាស្ត្រីមានទាំងកូន២នាក់ផង បានអមដំណើរលោកស្រី ទេព កុលាប លាចាកចេញពីមន្ទីរពេទ្យ ដែលក្នុងចិត្តម្នាក់ៗពោរពេញដោយក្តីរីករាយ ព្រោះសេរីភាព និងយុត្តិធម៌បានប្រគល់ជូនលោកស្រីវិញ ហើយ គ្មាននឹកឃើញឧបសគ្គណាមួយហ៊ានបំពានទៀតឡើយ ។
ប្រភពដដែលរៀបរាប់ប្រាប់កោះសន្តិភាពថា ការចាកចេញពីមន្ទីរពេទ្យនេះក្នុងបំណងទៅទទួលការស្វាគមន៍ពីនិស្សិត និងសាស្ត្រាចារ្យដែលនៅរង់ចាំមុននិងធ្វើដំណើរឆ្ពោះទៅគេហដ្ឋាន ដែលលោកស្រីបែកជាង១ឆ្នាំកន្លងមកនេះ ។ ពេលរថយន្តវិលកង់លូនចេញផុតពីក្លោងទ្វារមន្ទីរពេទ្យភ្លាម ស្រាប់តែមានជនស្លៀកពាក់ស៊ីវិលមួយក្រុមជិះម៉ូតូពី៤ទៅ៥គ្រឿង និងរថយន្តកាមរី អត់ស្លាកលេខ ខ្លះពាក់ម៉ាស់បិទមុខ ក្នុងភាពក្លាហាន មករារាំងកាក់រថយន្តលោកស្រីឱ្យឈប់ ។ ដោយភាពភ័យខ្លាច និងតក់ស្លុតរហូតធ្លាក់ខ្លួនមានជំងឺមិនទាន់បានផុតរលត់ផង មកជួបប្រទះជនចម្លែកមកយាយីបែបនេះទៀត និងស្ថិតក្នុងស្ថានភាពអាក្រក់បែបនេះរថយន្តរបស់លោកស្រី ដោយតក់ស្លុតពេកឥតហា៊នឈប់ទេ គឺកាន់តែបង្កើនល្បឿនទៅមុខក្នុងបំណងរកគោលដៅកក់ក្តៅណាមួយឱ្យគេជួយ ព្រោះលោកស្រីគិតថាមានគេមកប៉ុនប៉ងយកអាយុជីវិតលោកស្រី ។ ចំណែកជនស៊ីវិលដែលបើកម៉ូតូ៤ទៅ៥គ្រឿង និងរថយន្តកាមរីអត់ស្លាកលេខមួយគ្រឿងបានដេញតាមចាប់ដូចគេដេញតាមចោរប្លន់ ដោយដេញតាមចាប់រហូត ដែលរថយន្តលោកស្រីទេព កុលាប នៅតែបើករត់ឥតឈប់ទេ ក្នុងទឹកដីខណ្ឌចំការមន និងឱ្យបើកសំដៅទៅស្ថានទូតចិន ។ ពេលរថយន្តបើកទៅដល់ផ្លូវម៉ៅសេទុង មុខទូតចិនមិនឃើញមានសមត្ថកិច្ច ក្មួយប្រុសលោកស្រី ក៏បើកបង្ហូសទៅដល់ភ្លើងស្តុបចំការមន ភ្លាមនោះលោកស្រីបានប្រាប់អ្នកបើកបរឱ្យបើកទៅស្ថានទូតថៃដើម្បីរកគេជួយ ។ ពេលដល់ស្ថានទូតថៃទ្វាររបងត្រូវបិទជិត និងមានអ្នកយាមម្នាក់ពីរក៏ឈប់នៅទីនោះ ហើយត្រូវក្រុមជនស៊ីវិលដែលតាមពីក្រោយបានទៅដល់ដែរ ។ លោកស្រីទេព កុលាប បានបង្ខំចិត្តឱ្យក្មួយប្រុសបើកចេញទៅទៀតដោយមិនទុកចិត្តក្រុមនោះ ។ រថយន្តលោកស្រីបើកចេញផុតពីស្ថានទូតថៃបន្តិច ចន្លោះស្ថានទូតជប៉ុនស្រាប់តែមានការផ្ទុះអាវុធចំនួន៣ទៅ៤គ្រាប់គំរាមពីសំណាក់ក្រុមជនស៊ីវិលដែលមានកាំភ្លើងខ្លីផង កាំភ្លើងវែងផង ជាអ្នកដេញតាម ។ ពេលនោះលោកស្រីដឹងថា ពិតជាមានរឿងមិនល្អមែនហើយ ហើយក្រុមនោះនៅតែព្យាយាមតាមពីក្រោយទៀត។ ដោយពេលវេលាកាន់តែព្រលប់ផង រថយន្តលោកស្រីក៏បានបើកដល់វិមានឯករាជ្យក៏បានបញ្ជាឱ្យក្មួយប្រុសបើកទៅឈប់មុខភូមិគ្រឹះសម្ដេចតេជោហ៊ុន សែន តែម្តង ដែលជាទីសុវត្ថិភាព មានអង្គរក្សសម្ដេចច្រើន ពិតជាជួយការពារអាយុជីវិតលោកស្រីបាន ។
គ្រាន់តែរថយន្តឈប់ភ្លាមមុខទ្វាររបងកម្លាំងស៊ីវិលប្រមាណពី៧ទៅ៨នាក់បានស្ទុះទៅមុខរថយន្តបំណងវាយបំបែកកញ្ចក់ទ្វាររថយន្តលោកស្រីដើម្បីនាំមនុស្សចេញ ប៉ុន្តែរថយន្តបានដាក់គន្លឹះជាប់ ។ ភ្លាមនោះដែរអង្គរក្សសម្ដេចតេជោបានចេញមកព្រោងព្រាត ដោយបានសួរនាំទៅកម្លាំងស៊ីវិលទាំងនោះ គេឆ្លើយមកវិញថា ពួកគេជានគរបាលព្រហ្មទណ្ឌកម្រិតស្រាលរបស់លោកទូច ណារ៉ុថ អនុវត្តដីកាឱ្យនាំខ្លួនលោកស្រីទេព កុលាប ទៅតុលាការ ។ ចំណែកក្រុមអង្គរក្សសម្តេចបានយល់ភ្លាមថា លោកស្រីទេព កុលាប ទើបត្រូវបានតុលាការកំពូលប្រកាសសាលដីកាឱ្យដោះលែងលោកស្រីរួចផុតពីការចោទប្រកាន់ហើយ រឿងអីត្រូវប៉ូលិសដេញតាមចាប់ទាំងព្រលប់ទៀត ។
ប្រភពព័ត៌មានបន្តថា ពេលកើតមានហេតុការផ្ទុះអាវុធភ្លាម ភ្ញាក់ផ្អើលមួយចំហៀងក្រុង និងមានការប្រកូកប្រកាសតាមវិទ្យុទាក់ទងផងថា នៅក្នុងរថយន្តលោកស្រីទេព កុលាប មានទាហាននៅក្នុងនោះដែរជាអ្នកបាញ់ ដូច្នេះលោកឧត្តមសេនីយ៍ទោ យ៉ា គឹមអីុ មេបញ្ជាការរងកងរាជអាវុធហេត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានមានបទបញ្ជាឱ្យលោកវរសេនីយ៍ឯក ពូ ដាវី ប្រើប្រាស់កម្លាំងចេញជាបន្ទាន់ ដើម្បីទប់ស្កាត់ការផ្ទុះអាវុធ និងចាប់ជនឯកសណ្ឋានយោធា ។ លោកវរសេនីយ៍ឯក ពូ ដាវី ក៏បានបញ្ជាកម្លាំងកងរាជអាវុធហត្ថខណ្ឌចំការមន និងខណ្ឌដូនពេញ ព្រមទាំងរូបលោកទៅដល់ដែរ ជាដំបូងទៅឃាត់តែអ្នកបើកបររថយន្តលោកស្រី ទេព កុលាប នាំយកទៅសាកសួរនៅទីបញ្ជាការកងរាជអាវុធហត្ថខណ្ឌចំការមន ។ លោក ពូ ដាវី បានប្រាប់កោះសន្តិភាពថា បានជាឃាត់ខ្លួនអ្នកបើកបររថយន្តទៅសួរ ព្រោះក្នុងរថយន្តនោះមានតែអ្នកបើកបរម្នាក់គត់ ជាបុរសវ័យជំទង់ជាងគេ ក្រៅពីនោះកូនលោកស្រី ទេព កុលាប តូចៗ ហើយនិងមានសុទ្ធតែនារី ។
ពេលនាំអ្នកបើកបររថយន្តលោកស្រី ទេព កុលាប ទៅសាកសួរ អ្នកបើកបរឆ្លើយយ៉ាងច្បាស់ថា អ្នកជិះរថយន្តសុទ្ធតែក្មេង និងមនុស្សចាស់ ព្រមទាំងលោកស្រី ទេព កុលាប ជាអ្នកជំងឺ ដូច្នេះគ្មានកម្លាំងប្រដាប់អាវុធទេ ។ អាវុធដែលបានផ្ទុះចំនួន៣គ្រាប់ទៅ៤គ្រាប់មុននេះ គឺជនស៊ីវិលមួយក្រុម ដែលដេញតាមរថយន្តជាអ្នកបាញ់ ហើយឆ្លើយដាក់គេ ។ លោក ពូ ដាវី បន្តថា បន្ទាប់ពីសាកសួរដឹងរឿងថា ក្រុមស៊ីវិល នោះជាមន្ត្រី ឬកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ចុះអនុវត្តដីកាតុលាការ លោកបានប្រគល់អ្នកបើកបរទៅឱ្យសមត្ថកិច្ចអនុវត្តដីកាវិញភ្លាម ។ ហេតុការណ៍នេះបានធ្វើឱ្យមនុស្សអ្នកដំណើរច្រើនកុះករ និងកកស្ទះចរាចរណ៍តាមមើល និងចង់ដឹងនៅពាសពេញតំបន់វិមានឯករាជ្យ ។
ប្រភពព័ត៌មានពីមុខភូមិគ្រឹះសម្តេចតេជោ បានឱ្យដឹងថា ដោយមានការស្តាប់ពីការរៀបរាប់របស់លោកស្រី ទេព កុលាប ទើបភ្លាមៗក្រុមអង្គរក្សសម្តេចតេជោ បាននាំយកទាំងមនុស្សទាំងរថយន្តលោកស្រី កុលាប បើកចូលទៅក្នុងទីបញ្ជាការកងអង្គរក្សដែលស្ថិតនៅខាងក្រោយភូមិគ្រឹះសម្តេចតេជោ ដើម្បីការពារសន្តិសុខដល់លោកស្រី កុលាប ផងដែរ ។
បន្ទាប់ពីកងអង្គរក្សនាំរថយន្តនិងលោកស្រី ទេព កុលាប ចូលផុតទៅ ក្រុមជនស៊ីវិលដែលគេនិយាយថា ជាកម្លាំងនគរបាលព្រហ្មទណ្ឌកម្រិតស្រាលរាជធានីភ្នំពេញ ក៏ចាកចេញពីទីនោះអស់ដែរ ពេលនោះម៉ោងជាង៦ល្ងាចទៅហើយ ។
នៅក្នុងទីបញ្ជាការកងអង្គរក្ស និងជាខុទ្ទកាល័យសម្តេចតេជោផងដែរ មានប្រភពច្បាស់ការណ៍ថា សម្តេចតេជោ និងលោកជំទាវ ព្រមទាំងលោកជំទាវ ហ៊ុន ម៉ាណា បានចេញទៅជួបលោកស្រី ទេព កុលាប ផ្ទាល់ដោយបានសំណេះសំណាលអស់រយៈពេលយ៉ាងយូរ និងបានដឹងរឿងទាំងអស់ ។ ចុងក្រោយសម្តេចបានឱ្យកងអង្គរក្សជូនលោកស្រី ទេព កុលាប និងមនុស្សនៅក្នុងរថយន្តទាំងអស់ ទៅដល់លំនៅឋាន ព្រមទាំងបានណែនាំឱ្យកងអង្គរក្សជួយការពារសន្តិសុខសុវត្ថិភាពក្រុមគ្រួសារលោកស្រីពេញ១យប់នោះទៀតផង។ ចំណែកប៉ូលិសមូលដ្ឋាន មានប៉ូលិសប៉ុស្តិ៍ជាដើម ក៏នៅជួយការពារសន្តិសុខសុវត្ថិភាពលោកស្រី ទេព កុលាប កុំឱ្យគាត់ភ័យព្រួយពេកដែរ ។
ប្រភពព័ត៌មានពីស្នងការដ្ឋានថា នៅស្នងការដ្ឋាននគរបាលរាជធានីភ្នំពេញឯណោះវិញ កងកម្លាំងនគរបាលពី៨ទៅ៩នាក់ ដែលចុះអនុវត្តដីកាសាលាដំបូងរាជធានីយ៉ាងអាក្រក់នេះ រួមទាំងថ្នាក់ប្រធានការិយាល័យ និងអនុប្រធានការិយាល័យម្នាក់ផង ត្រូវបានថ្នាក់លើបញ្ជា និងហាមឃាត់មិនឱ្យចេញទៅណា ក្រៅពីនៅកន្លែងធ្វើការទេ សូម្បីបាយទឹកក៏ត្រូវទិញបាយកញ្ចប់យកទៅហូបចុកដែរ គឺឃាត់ទុកម្តុំ ។
លោកវរសេនីយ៍ទោ សុង លី ប្រធានការិយាល័យនគរបាលព្រហ្មទណ្ឌកម្រិតស្រាលបានទទួលស្គាល់ថា កម្លាំងការិយាល័យរបស់លោកបានចុះទៅធ្វើកិច្ចការដីកាតុលាការមែន ។ ចំណែករូបលោកមិនបានចុះទៅផ្ទាល់ទេ គឺដឹកនាំកម្លាំងដោយអនុប្រធានម្នាក់ទទួលបន្ទុកផ្នែកសួរចម្លើយសំណុំរឿង ។ គួរបញ្ជាក់ថា នៅល្ងាចថ្ងៃនេះមានការផ្លាស់ប្តូរមុខដំណែងលោកស្នងការ ស្នងការរង និងមន្ត្រីមួយចំនួនក្នុងស្នងការដ្ឋានហើយ ។
ប្រភពពីសាលាដំបូងរាជធានីភ្នំពេញវិញបានឱ្យដឹងថា ពិតណាស់ថ្ងៃទី១ តុលា នេះលោក កោ វណ្ឌី ចៅក្រមស៊ើបអង្កេតបានចេញដីកាបង្គាប់ឱ្យនាំខ្លួនលោកស្រី ទេព កុលាប ឱ្យចូលមកឆ្លើយបំភ្លឺលើសំណុំរឿងថ្មីមួយទៀត តាមការចោទប្រកាន់របស់តំណាងអយ្យការគឺ លោកហៀង សុភ័ក្រ ព្រះរាជអាជ្ញារង ។ ប៉ុន្តែសំណុំរឿងថ្មីនេះ មិនមានប្រភពព័ត៌មានណាមួយបញ្ជាក់ថា លោកស្រីទេព កុលាប ជាប់រឿងអ្វីនោះឡើយ គឺគ្រាន់តែហៅទៅសាកសួរប៉ុណ្ណោះ ។ ប៉ុន្តែការកោះហៅទៅសាកសួរនេះ បែរជាធ្វើឡើងគគ្រឹកគគ្រេងខ្លាំងពេក ដែលមនុស្សទើបរួចពីពន្ធនាគារផង មិនទាន់បានទៅដល់ផ្ទះផង បែរជាមកតាមចាប់ទៀត ។ មជ្ឈដ្ឋាននានាច្រើនណាស់និយាយថា បើកុំបានសម្តេចតេជោ និងលោកជំទាវ ប្រកបដោយភាពឈ្លាសវៃ និងប្រកបដោយយុត្តិធម៌នោះម៉្លេះ ជនទាំងឡាយដែលមិនគួររងគ្រោះត្រូវរងគ្រោះធ្ងន់ធ្ងរណាស់ ដោយសារតែស្នាដៃអ្នកមានអំណាចខាងចាប់ ៕
ចែករំលែកព័តមាននេះ