សាច់បង្កកនិងគ្រឿងក្នុងមាន់ខូចគុណភាពជាង ២តោនដែលឈ្មួញលួ.ចចេញតាមច្រកដូនរ័ត្ន ត្រូវបានដុ.តកម្ទេចចោល
- ភ្នំពេញ
ខេត្តត្បូងឃ្មុំ ៖ ក្រុមឈ្មួញបានប្រើប្រាស់មធ្យោបាយគ្រប់រូបភាពដើម្បីដឹកសត្វមាន់ព្រមទាំងសាច់បង្កកតាមរឺមកម៉ូតូចំនួនពីរគ្រឿងចេញតាមច្រកដូនរ័ត្នជាប់ប្រទេសវៀតណាម ចូលមកកម្ពុជាដើម្បីលក់នៅផ្សារមេមត់នឹងចែកចាយបន្តទៅកាន់ស្រុកស្នួល ខេត្តក្រចេះនិងមួយផ្នែកមកកាន់ក្រុងកំពង់ចាម។ ហើយត្រូវបានកម្លាំងសមត្ថកិច្ចចម្រុះសហការឃាត់ព្រមទាំងដករហូតវត្ថុតាងទាំងនេះដុតកម្ទេចចោលព្រោះជារបស់ខូចគុណភាពធ្វើឲ្យប៉ះពាល់សុខភាពរបស់មនុស្សយ៉ាងធ្ងន់ធ្ងរ។
លោកកែន ច័ន្ទសុជាតិ នាយរងការិយាល័យផលិតកម្មនិងបសុព្យាបាលខេត្តត្បូងឃ្មុំបានឲ្យដឹងអ្នកព្រឹកថ្ងៃទី១១ មិថុនា ឆ្នាំ២០២៦ថា: ដោយទទួលបានព័ត៌មានក្រុមឈ្មួញទុច្ចរិត បានលួចដឹកប្រភេទមាន់រស់ព្រមទាំងសាច់បង្កកតាមមធ្យោបាយផ្សេងៗ ចេញពីច្រកដូនរ័ត្នស្រុកមេមត់ ដើម្បីលក់ចែកចាយក្នុងខេត្តត្បូងឃ្មុំនិងតាមតំបន់មួយចំនួនទៀតគឺដឹកតាមរថយន្តសាំងយ៉ុង។
ក្រោយពីទទួលបានព័ត៌មានបែបនេះកម្លាំងរបស់បសុពេទ្យ បានឃ្លាំមើលក៏ឃើញសកម្មភាពដឹកសត្វមាន់រស់ចេញពីវៀតណាម ចូលមកតាមច្រកដូនរ័ត្ន ហើយត្រូវបានស្ទាក់ចាប់បានរឺមកម៉ូតូចំនួនពីរគ្រឿង ដែលបម្រុងដឹកយកមកចែកចាយនៅផ្សារមេមត់។
នាយរងពេទ្យសត្វរូបនេះបានបន្តឲ្យដឹងទៀតថា ការឃាត់សត្វមាន់រួមទាំងសាច់បង្កកចូលមកកម្ពុជាដោយមិនមានច្បាប់អនុញ្ញាតណាបន្តិចសោះ គឺត្រូវបានឃាត់ដោយធ្វើឡើងកាលពីថ្ងៃទី៩ មិថុនា ។ ហើយសាច់មាន់ដែលដាក់ក្នុងទ្រុង ពេលចាប់ឃាត់ទុកមួយយប់ក៏បានងាប់អស់ពាក់កណ្ដាល ដោយអនុវត្តតាមការណែនាំរបស់ប្រធានមន្ទីរកសិកម្មខេត្តក៏ដូចជារដ្ឋបាលខេត្ត ដើម្បីបង្ការខ្លាចឆ្លងជំងឺពីសត្វមកសត្វនិងពីសត្វមកមនុស្ស(H5N1) ។ ជាមួយនោះកម្លាំងជំនាញរបស់(ក.ប.ប) បានយករថយន្តពិសោធន៍ចល័តមកពិនិត្យមើលសាច់បង្កកឃើញថាខូចគុណភាព បើយើងទទួលទានដោយពុំបានដឹងនឹងធ្វើឲ្យប៉ះពាល់សុខភាព។
ក្រោមកិច្ចសហការមានកម្លាំងសមត្ថកិច្ចចម្រុះក្នុងនោះមានជំនាញពេទ្យសត្វ គយរដ្ឋាករមេមត់អាជ្ញាធរដែនដី បានសម្រេចយកសត្វមាន់និងសាច់បង្កកទៅដុតបំផ្លាញចោលនារសៀលថ្ងៃទី១០មិថុនា ដែលមានចម្ងាយប្រមាណ៥០០ម៉ែត្រ ពីព្រំដែនកម្ពុជា-វៀតណាម។ ក្នុងទិដ្ឋភាពនោះគឺមានការចូលរួមពីលោកឃិន វិជ្ជតា តំណាងអយ្យការអមសាលាដំបូងខេត្តត្បូងឃ្មុំ អាជ្ញាធរដែនដី និងកម្លាំងនគរបាលការពារព្រំដែនប្រចាំច្រកព្រំដែនដូនរ័ត្ន ទំនិញខូចគុណភាពដូចមានខាងក្រោម៖
១-សត្វមាន់ចំនួន ៥២ទ្រុង (១ទ្រុងមាន២០គ.ក) សរុបស្មើនឹង ១០៤០គីឡូក្រាម
២.សាច់ក្រកស្បែកស្រួយ (ប្រហិតលាយម្សៅ) ចំនួន៤៦កេស (១កេស២០គ.ក) សរុបស្មើនឹង ៩២០គីឡូក្រាម
៣.គ្រឿងក្នុងមាន់បង្កក (កោះមាន់) ចំនួន១០កេស (១កេសមាន១០គ.ក) សរុបស្មើនឹង១០០គីឡូក្រាម
៤.ស្លាបមាន់បង្កក ចំនួន១០កេស (១កេស១៥គ.ក) សរូបស្មើនឹង១៥០
បរិមាណទំនិញខូចគុណភាពដែលត្រូវកម្ទេចចោលសរុបចំនួន ២២១០គីឡូក្រាម។
លោកនាយរងការិយាល័យផលិតកម្មនិងបសុពេទ្យខេត្តត្បូងឃ្មុំបញ្ជាក់ថា
ក្រោយពីបានធ្វើសកម្មភាពដុតបំផ្លាញចោលនៅប្រភេទសត្វមាន់និងសាច់បង្កកខូចគុណភាពរហូតមកដល់យប់ថ្ងៃទី១០និងព្រឹកថ្ងៃ១១មិថុនា ឆ្នាំ២០២៦ មិនមានឃើញសកម្មភាពដឹកសត្វមាន់ចូលតាមច្រកដូនរដ្ឋនេះទៀតនោះទេ។ តាមប្រភពខ្លះសាច់បង្កកអាចត្រូវបានឈ្មួញបង្វែងបានចេញពីផ្ទះលេខ២ ចូលមកវៀតណាមរួចចេញមកកម្ពុជាតែត្រង់ចំណុចនេះរូបលោកមិនច្បាស់នោះទេ។ ប្រមាណជាងមួយខែក្រុមឈ្មួញរកស៊ីមាន់កាចៗ បានប្រើកាំភ្លើងស្នប់បាញ់បែកកញ្ចក់រថយន្តរបស់អ្នកសារព័ត៌មានអនឡាញ ដោយមកដល់ពេលនេះរកមុខមិនទាន់ឃើញ ខណៈដែលក្រុមអ្នកសារព័ត៌មានចាំតាមឃ្លាំមើលថតរថយន្តដឹកសត្វមាន់ចេញពីច្រកដូនរ័ត្ន ៕
ចែករំលែកព័តមាននេះ