ខេត្តតាកែវ ៖ បុរសចំណាស់ម្នាក់បានដេកស្លាប់យ៉ាងអាណោចអាធ័មនៅក្នុងថ្លុកឈាម ហើយត្រូវកូនចៅប្រទះឃើញក៏មានការឆោឡោឡើង និងបានរាយការណ៍ដល់សមត្ថកិច្ចប៉ូលិសប៉ុស្តិ៍ចុះទៅដល់កន្លែងកើតហេតុភ្លាមៗ ខណៈមេឃកំពុងតែភ្លៀងកូនចៅនៅមើលទូរទស្សន៍លើផ្ទះ ហើយបុរសរងគ្រោះដេកលើគ្រែសំយាបខាងត្បូងផ្ទះពេលនោះ ជនដៃដល់មិនស្គាល់មុខបានកាប់ប្រហារគាត់ឱ្យស្លាប់ដេកផ្កាប់មុខនៅលើដី ។
ហេតុការណ៍ឃាតកម្មនេះបានកើតឡើងកាលពីថ្ងៃទី២៩ កញ្ញា ២០១២ វេលាម៉ោងប្រហែល៦និង៤៥នាទីល្ងាច ស្ថិតនៅលើទួលត្រពាំងខ្មឹម ភូមិភ្នំបាទេព ឃុំព្រៃផ្ទោល ស្រុកអង្គរបុរី។ បុរសរងគ្រោះឈ្មោះចាយ ស្រិន អាយុ៨៦ឆ្នាំ ត្រូវជនដៃដល់កាប់ត្រូវចំនួន២កាំបិត ត្រង់.ក១កាំបិត ស្លាបក្រចៀវ១កាំបិត ដេកស្លាប់នៅក្នុងថ្លុកឈាមតែម្តង។
មន្ត្រីប៉ូលិសស្រុកបានឱ្យដឹងថា ពេលនេះសមត្ថកិច្ចប៉ូលិសកំពុងតែស្រាវជ្រាវដោយយកចិត្តទុកដាក់យ៉ាងដុតដៃដុតជើងបំផុត ដើម្បីកំណត់មុខសញ្ញាជនដៃដល់បើតាមការសន្និដ្ឋាននោះករណីនេះអាចជាមនុស្សធ្លាប់ស្គាល់គ្នាយ៉ាងច្បាស់ជាមួយជនរងគ្រោះទើបកាប់សម្លាប់យ៉ាងសាហាវបែបនេះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ