រាជ​​ធានី​ភ្នំពេញ ៖ រសៀលថ្ងៃទី​២៩ កញ្ញា ២០១២​ វេលាម៉ោង២ និង​៣០នាទី នៅលើ​ទីលាន​វិទ្យាល័យបឹង​ត្របែក មាន​ការ​​ប្រកួត បាល់​ទាត់​លក្ខណៈ​មិត្តភាព​ដក​ស្រង់​បទ​ពិសោធន៍​រវាង​ក្រុម​សន្តិ​ភាព​ និងក្រុមយុវជន​សាលាអន្តរជាតិម៉ាស្ទ័រ ដែលការប្រកួត​ក្រុម​ទាំង​២​នេះបានធ្វើការវាយបកគ្នាទៅវិញទៅមក ដោយមានលក្ខណៈតស៊ូនិងស្វិតស្វាញ ក្រោម តំណក់គ្រាប់ភ្លៀងនិងដីរអិល ហើយ​លទ្ធផល គឺ ក្រុមយុវជនសាលាអន្តរជាតិម៉ាស្ទ័រយកឈ្នះលើ ក្រុមសន្តិភាព ៤-១ ។

នៅតង់ទី១ក្រុមយុវជនសាលាអន្តរជាតិ​ម៉ាស្ទ័របានធ្វើការគ្របដណ្តប់លើក្រុមសន្តិភាព យ៉ាងខ្លាំង ប៉ុន្តែខ្សែការពាររបស់​ក្រុម​សន្តិភាព​ក៏ រឹងមាំក្នុងការរារាំងខ្សែប្រយុទ្ធរបស់គូប្រកួតផង ដែរ។ ប៉ុន្តែរហូតដល់នាទី ៣៧ ដោយសារតែខ្សែការពាររបស់ក្រុម​សន្តិភាពភ្លាត់ស្នៀតធ្វើឱ្យខ្សែប្រយុទ្ធគូប្រកួតស៊ុត​បាល់បាន១គ្រាប់ ។ ចំណែកក្រុម​សន្តិភាពបានវាយបកវិញយ៉ាងខ្លាំង ប៉ុន្តែ​មិន​អាចរកគ្រាប់បាល់ស៊ុតបញ្ចូលទីគូ ប្រកួតបាន ធ្វើឱ្យការប្រកួតក្នុងតង់ទី១បញ្ចប់ ដោយលទ្ធផល១-០ ។

ចូលដល់តង់ទី២ក្រុមទាំង២បាន លេងក្នុង បច្ចេកទេសថ្មីដើម្បីយកឈ្នះគ្នាទៅវិញទៅមក ដោយសំរុកចុះឡើងរៀងៗខ្លួន ប៉ុន្តែស៊ុត​មិនចំ គោលដៅ រហូតដល់នាទី៧១និង៧៨ ក្រុមយុវ ជនសាលាអន្តរជាតិម៉ាស្ទ័របានស៊ុតបាល់បញ្ចូល ទី២គ្រាប់បន្ថែម​ទៀតនាំមុខ​ទៅលើក្រុមសន្តិភាព ៣-០ ដោយ​សារការសាមគ្គីនិងការមិនបាក់ ទឹកចិត្ត ក្រុមសន្តិភាពបានខំប្រឹងវាយបកវិញស៊ុត បញ្ចូលទីគូ​ប្រកួតបាន១គ្រាប់​នៅនាទីទី៨៥ ដោយថ្វីជើងកីឡាករ ស្រី សំណាង មានន័យថា លទ្ធផលបណ្តោះអាសន្ន ៣-១ ។

ទោះជាយ៉ាងណាក្រុមយុវជនសាលាអន្តរ ជាតិម៉ាស្ទ័រនៅតែគ្របដណ្តប់ទៅលើក្រុមសន្តិភាព ហើយដោយសារការធ្វេស​ប្រហែស​របស់ក្រុមសន្តិ​ភាព នៅម៉ោងបន្ថែមក្នុងតង់ទី២ក្រុម យុវជនសាលាអន្តរជាតិម៉ាស្ទ័រ បានស៊ុតបញ្ចូល ទីបន្ថែម១គ្រាប់​ទៀតលើក្រុមសន្តិភាព  ។ ស្រប ពេលនោះអាជ្ញាកណ្តាលផ្លុំកញ្ចែបញ្ចប់ការប្រកួតតែម្តង លទ្ធផលគឺក្រុមយុវជនសាលាអន្តរជាតិ ម៉ាស្ទ័រ​យកឈ្នះក្រុមសន្តិភាព ៤-១ ។

សូមបញ្ជាក់ផងដែរថា ក្រុមសន្តិភាព គឺ ជាក្រុមមួយដែលទើបតែបង្កើតឡើងបាន១ខែ ប៉ុណ្ណោះ នេះគឺជាលើក​ទី១ហើយរវាងក្រុម​ទាំង ២ដែលជួបគ្នា ។ ក្រុមសន្តិភាពត្រូវបានក្រុម ហ៊ុនស្រាបៀរកម្ពុជាខ្មែរប៊្រូវើរីជាអ្នកឧបត្ថម្ភ សំលៀកបំពាក់ដល់ក្រុមកីឡាករ ៕