រាជធានីភ្នំពេញ ៖ រថយន្តម៉ាកតូយ៉ូតា តាកូម៉ា មួយគ្រឿងបានបើកបោះពួយក្នុងល្បឿនលឿន ជ្រុលចង្កូតទៅបុកចំពាក់កណ្តាលរថយន្តដឹកស្រាបៀរមួយគ្រឿងទៀតដែលកំពុងបើកឆ្លងផ្លូវពេញទំហឹងលាន់ដូចរន្ទះ រុញផ្ទប់ជាមួយរនាំងដែកពុះចែកផ្លូវ បណ្តាលឱ្យបាក់ដួលអស់៥ផ្ទាំង បន្ទាប់មករថយន្តបង្កហេតុនោះបានបន្ថែមល្បឿនបើករត់គេចខ្លួន ប៉ុន្តែត្រូវកម្លាំងសមត្ថកិច្ចចាប់ឃាត់បានចម្ងាយប្រមាណជាង១គីឡូម៉ែត្រពីកន្លែងកើតហេតុប៉ុណ្ណោះ ។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី២៨ កញ្ញា ២០១២ នៅលើកំណាត់មហាវិថីសហព័ន្ធរុស្ស៊ី ត្រង់ចំណុចផ្លូវចូលវត្តអង្គតាមិញ ស្ថិតក្នុងភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ ។ រថយន្តបង្កម៉ាកតូយ៉ូតា តាកូម៉ា ពណ៌ស បើកដោយបុរសម្នាក់មិនស្គាល់ឈ្មោះ ចំណែករថយន្តមួយគ្រឿងទៀតប្រភេទទេសចរណ៍១២កៅអី ពណ៌ក្រហម ជារថយន្តដឹកស្រាបៀរ និងបើកដោយបុរសមិនស្គាល់ឈ្មោះម្នាក់ ហើយឮថា អ្នកបើកបររថយន្តរូបនេះរងរបួស និងត្រូវបានទៅកាន់មន្ទីរពេទ្យដោយខ្លួនឯង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ