រាជធានីភ្នំពេញ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែង ចំណែក៣នាក់ទៀតក្នុងនោះមានស្រីម្នាក់ផងបានរងរបួសធ្ងន់ និងស្រាល បន្ទាប់ពីពួកគេជិះម៉ូតូមួយគ្រឿងឌុបគ្នាក្នុងល្បឿនលឿនទៅដល់ត្រង់ចំណុចផ្លូវកោងបត់មិនទាន់ជ្រុលចង្កូតទៅបុកខឿនចិញ្ចើមផ្លូវ និងបុកដុំថ្មមួយដុំ បណ្តាលឱ្យដួលបោកទៅលើដីដេករដូករណែល។ សមត្ថកិច្ចបានសន្និដ្ឋានថា អ្នកបើកបរម៉ូតូ និងអ្នកជិះពីក្រោយសុទ្ធតែស្រវឹងស្រាទាំងអស់គ្នា ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៨យប់ថ្ងៃទី២៩ កញ្ញា ២០១២ នៅលើកំណាត់ផ្លូវកៅស៊ូក្នុងតំបន់សេដ្ឋកិច្ច ពិសេសភ្នំពេញ ស្ថិតក្នុងភូមិកំរៀង សង្កាត់កន្ទោក ខណ្ឌពោធិ៍សែនជ័យ ។
ជនរងគ្រោះដែលស្លាប់បាត់បង់ជីវិតឈ្មោះខឿន សៅវណ្ណា អាយុ២៤ឆ្នាំ មានទីលំនៅភូមិព្រៃតាប៉ុក សង្កាត់ឪឡោក ខណ្ឌពោធិ៍សែនជ័យ ។ ឯអ្នកជិះពីក្រោយ៣នាក់ទៀតរងរបួសធ្ងន់ និងស្រាល ក្នុងនោះមានឈ្មោះពៅ រិទ្ធ ភេទប្រុស អាយុជាង២០ឆ្នាំ និងឈ្មោះនួន ធន់ ភេទប្រុស អាយុជាង២០ឆ្នាំ និងម្នាក់ទៀតជាស្ត្រីមិនត្រូវបានគេស្គាល់ឈ្មោះនោះឡើយ ។ ជនរងគ្រោះទាំង៤នាក់នេះបានជិះម៉ូតូមួយគ្រឿងឌុបគ្នាម៉ាកអាយខន ពណ៌សលាយផ្កាឈូក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ