រាជធានីភ្នំពេញ ៖ ព្រឹកថ្ងៃទី២៨ កញ្ញា តុលាការកំពូលបានបើកសវនាការជំនុំជម្រះលើសំណុំរឿងក្តីឧកញ៉ាកុក អាន និងលោកហេង ឈាង-ទេព កុលាប ដែលរឿងក្តីនេះឧកញ៉ាកុក អាន ជាម្ចាស់ដើមបណ្តឹង ។ នៅពេលនេះតុលាការកំពូលបានផ្តល់យុត្តិធម៌ដល់ជនត្រូវចោទហើយ គឺសាលដីកាត្រូវបានប្រកាសនៅវេលាម៉ោង២រសៀលថ្ងៃដដែល សម្រេចឱ្យធ្វើការដោះលែងលោកស្រី ទេព កុលាប ក្នុងថ្ងៃនេះតែម្តង និងតម្រូវបង្វិលសំណុំរឿងទៅសាលាឧទ្ធរណ៍ឱ្យបើកការស៊ើបអង្កេតលើករណីរឿងក្តីលោកហេង ឈាង ជាស្វាមីឡើងវិញ ។
អង្គសវនាការនៅតុលាការកំពូលព្រឹកនោះបានសង្កេតឃើញនិស្សិត បញ្ញវន្ត សាស្ត្រាចារ្យ លោកគ្រូ អ្នកគ្រូ មានទាំងព្រះសង្ឃផង ដែលជានិស្សិតនៃសាកលវិទ្យាល័យភ្នំពេញអន្តរជាតិ និងបុគ្គលិក ហៅកាត់ថា (PPIU) ប្រមាណជាង៥០០នាក់បានទៅចូលរួមស្តាប់ ដោយយកចិត្តទុកដាក់ផងដែរ ក្រោមដំណក់ទឹកភ្លៀង បើទោះបីខ្លះបានចូលស្តាប់ និងខ្លះនៅខាងក្រៅក៏ដោយ ព្រោះបន្ទប់សវនាការតូចចង្អៀត ។
អង្គសវនាការជំនុំជម្រះក្តីនេះមានលោកឃឹមប៉ុន ជាប្រធានក្រុមប្រឹក្សា មេធាវីដើមចោទ និងចុងចោទ មានវត្តមានលោកហេង ឈាង និងលោកស្រីទេព កុលាប ជាម្ចាស់ដើមបណ្តឹងសារទុក្ខ ប៉ុន្តែអត់ឃើញវត្តមានលោកឧកញ៉ាកុក អាន ចូលរួមទេ ។ អង្គសវនាការបានធ្វើឡើងពេញមួយព្រឹក ដោយមានការសាកសួរ ដេញដោល តាមអង្គច្បាប់ត្រឹមត្រូវ រហូតដល់ម៉ោង១២និង៣០នាទីទើបចប់ ហើយបានសម្រាកដោយលោកចៅក្រម៥រូបថយទៅពិចារណា ។ លុះដល់ម៉ោង២រសៀល អង្គសវនាការបានបន្តនីតិវិធីទៀត ដែលជាពេលវេលាប្រកាសសាលដីកា ។
សាលដីកាតុលាការកំពូលបានប្រកាសបន្ទាប់ពីបញ្ចប់នូវការសាកសួរដេញដោល ការសន្និដ្ឋានរបស់មេធាវី សំណូមពរចុងក្រោយ ជនដែលត្រូវចោទ ។ នៅទីចុងក្រោយបំផុត តំណាងមហាអយ្យការមិនបានធ្វើការចោទប្រកាន់លើលោកស្រីទេព កុលាប ទេ ហើយតម្កល់សាលដីកាសាលាឧទ្ធរណ៍ឱ្យចាត់ការឡើងវិញលើសំណុំរឿងលោកហេង ឈាង ។
វេលាម៉ោង២រសៀល ក្រោយពីអង្គសវនាការបើកឡើងវិញ ប្រធានក្រុមប្រឹក្សាជំនុំជម្រះបានប្រកាសសាលដីកាសម្រេច តម្រូវឱ្យដោះលែងលោកស្រីទេព កុលាប នៅពេលប្រកាសសាលដីកានេះតែម្តង និងតម្រូវបង្វិលសំណុំរឿងទៅសាលាឧទ្ធរណ៍ឱ្យបើកការស៊ើបអង្កេតលើករណីលោកហេង ឈាង ឱ្យបានល្អិតល្អន់ឡើងវិញ ។
ពេលអង្គសវនាការត្រូវបានបញ្ចប់ លោកហេង ឈាង ត្រូវបាននាំទៅកាន់ពន្ធនាគារវិញ ចំណែកលោកស្រី ទេព កុលាប ជាភរិយាក៏តម្រូវឱ្យទៅកន្លែងដើមវិញសិនដែរ តែត្រូវដោះលែងថ្ងៃនេះ(ថ្ងៃប្រកាសសាលដីកា)តែម្តង ។
គួរកត់សម្គាល់ថា ពេលចប់អង្គសវនាការ យើងសង្កេតឃើញអស់លោកសាស្ត្រាចារ្យ និស្សិត បញ្ញវន្ត ព្រមទាំងបុគ្គលិក និងព្រះសង្ឃមកពីសាកលវិទ្យាល័យភ្នំពេញអន្តរជាតិ ដែលមានលោកស្រីទេព កុលាប ជាសាកលវិទ្យាធិការ ប្រមាណជាង៥០០នាក់នោះបានស្រែកអបអរសាទរហោ៊កញ្ច្រៀវសម្តែងទឹកចិត្តរីករាយទាំងទឹកភ្នែក ដោយក្តីរំភើបគ្រប់គ្នា ពេលទទួលបានភាពយុត្តិធម៌ពីតុលាការកំពូលតាមបំណងរបស់ពួកគេ ។ ចំណែកកូនប្រុសស្រីបានស្ទុះទៅឱបម្តាយទ្រហ៊ោយំក្នុងក្តីត្រេកអរ និងរំភើបពេក ។ ម្នាក់ៗលើកដៃបួងសួងឡើងលើដឹងគុណដល់ស្ថាប័នតុលាការកំពូល និងស្រែកខ្លាំងៗសម្តែងការដឹងគុណចំពោះការដឹកនាំប្រកបដោយគតិបណ្ឌិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលសម្តេចតែងតែដឹងសុខដឹងទុក្ខដល់ប្រជាពលរដ្ឋរងគ្រោះ ។
ចំណែកលោកស្រីទេព កុលាប លើកដៃសំពះទាំងទឹកភ្នែក សូមសម្តែងការដឹងគុណសម្តេចតេជោ និងលោកជំទាវ ព្រមទាំងដឹងគុណអង្គតុលាការកំពូលដែលបានផ្តល់យុត្តិធម៌ដល់លោកស្រី និងស្វាមី ជាពិសេសដល់រឿងក្តី ៕
ចែករំលែកព័តមាននេះ