រាជធានីភ្នំពេញ ៖ បុរសម្នាក់បានរងរបួសធ្ងន់បាក់ឆ្អឹងដងកាំបិតដោយសាររថយន្តមិនស្គាល់ម៉ាក មួយគ្រឿងបើកបុកពីក្រោយ ខណៈ កំពុងជិះម៉ូតូម្នាក់ឯង ហើយក្រោយពីបុករួចរថយន្តនោះបានបើករត់បាត់ស្រមោល ឯបុរសរងគ្រោះត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះភ្លាមៗដែរ កាលពីវេលាម៉ោង៩និង៣០នាទីព្រឹកថ្ងៃទី២៨ កញ្ញា នៅលើកំណាត់មហាវិថីសហព័ន្ធរុស្ស៊ី
រាជធានីភ្នំពេញ ៖ បុរសម្នាក់បានរងរបួសធ្ងន់បាក់ឆ្អឹងដងកាំបិតដោយសាររថយន្តមិនស្គាល់ម៉ាក មួយគ្រឿងបើកបុកពីក្រោយ ខណៈ កំពុងជិះម៉ូតូម្នាក់ឯង ហើយក្រោយពីបុករួចរថយន្តនោះបានបើករត់បាត់ស្រមោល ឯបុរសរងគ្រោះត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះភ្លាមៗដែរ កាលពីវេលាម៉ោង៩និង៣០នាទីព្រឹកថ្ងៃទី២៨ កញ្ញា នៅលើកំណាត់មហាវិថីសហព័ន្ធរុស្ស៊ី ស្ថិតក្នុងភូមិតាងួន សង្កាត់កាកាប ខណ្ឌពោធិ៍សែនជ័យ ។
បុរសរងគ្រោះម្នាក់នោះឈ្មោះសុង វុទ្ធី អាយុជាង៣០ឆ្នាំមានទីលំនៅក្នុងខេត្តកំពង់ស្ពឺជិះម៉ូតូ១គ្រឿងម៉ាកហុងដាសេ១២៥ស៊េរីឆ្នាំ២០០៨ពណ៌ខ្មៅ ដោយឡែករថយន្តបង្កមិនត្រូវបានគេស្គាល់ម៉ាកនោះទេ ក្រោយពេលបើកបុកម៉ូតូបានបើករត់គេចបាត់ស្រមោល ។
សាក្សីបានឲ្យដឹងថា នៅមុនពេលកើតហេតុគេបានឃើញរថយន្តបង្កនិងម៉ូតូរងគ្រោះបើកបរក្នុងទិសដៅស្របគ្នាពីកើតទៅលិចដោយម៉ូតូបើកខាងមុខឯរថយន្តបើកពីក្រោយក្នុងល្បឿនលឿន ។ លុះដល់ត្រង់ចំណុចកើតហេតុ ស្រាប់តែរថយន្តនោះបានបុកម៉ូតូពីក្រោយពេញទំហឹងបណ្តាលឲ្យដួលទៅលើថ្នល់ខ្ទាតអ្នកបើកម៉ូតូចូលក្រោមកង់រថយន្តកិនបែកមួកសុវត្ថិភាព ប៉ុន្តែសំណាងល្អមិនបែកក្បាលស្លាប់គ្រាន់តែរងរបួសបាក់ឆ្អឹងដងកាំបិត និងត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះភ្លាមៗដែរ ។ រថយន្តបង្កបានបើករត់គេចបាត់មិនត្រូវបានគេស្គាល់ម៉ាកនោះឡើយ ។
ក្រោយពេលកើតហេតុប៉ូលិសចុះទៅវាស់វែងនាំយកម៉ូតូរបស់ជនរងគ្រោះទៅរក្សាទុកបណ្តោះអាសន្ន និងស្រាវជ្រាវរករថយន្តបង្កនោះដើម្បីឱ្យចូលខ្លួនមកដោះស្រាយគ្នាតាមផ្លូវច្បាប់ ប៉ុន្តែពុំដឹងថារកឃើញ ឬអត់នោះទេ ៕
ចែករំលែកព័តមាននេះ