រាជធានីភ្នំពេញ ៖ ទីតាំងខុនដូមួយកន្លែងត្រូវកម្លាំងនគរបាលនាយកដ្ឋានសន្តិសុខផ្ទៃក្នុងនៃក្រសួងមហាផ្ទៃឆ្មក់ចូលឆែកឆេរបង្ក្រាបក្រុមជនជាតិកូរ៉េ ដែលជួលស្នាក់នៅលួចលាក់ បើកល្បែងស៊ីសងតាមប្រព័ន្ធអិុនធើរណេត ។ ទោះបីជាយ៉ាងណាគួរឱ្យអស្ចារ្យណាស់ ពេលដែលសមត្ថកិច្ចចុះទៅដល់ ជនជាតិកូរ៉េទាំងនោះទំនងមានគេជូនដំណឹងមុន ក៏រត់គេចខ្លួនអត់មានសល់ម្នាក់ ដោយបន្សល់ទុកតែសម្បកខុនដូ និងកុំព្យូទ័រជាច្រើនគ្រឿង និងបៀរមួយចំនួនប៉ុណ្ណោះ ។
ការឆ្មក់ចូលបង្ក្រាបទីតាំងសង្ស័យនេះត្រូវបានធ្វើឡើងកាលពីវេលាម៉ោង៨និង៣០នាទីព្រឹកថ្ងៃទី២៧ កញ្ញា នៅខុនដូរមួយលេខ២៣ ផ្លូវលេខ៥៧០ សង្កាត់បឹងកក់ទី២ ខណ្ឌទួលគោក ក្រោមការដឹកនាំដោយលោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃ និងមានការចូលរួមពីសមត្ថកិច្ចមូលដ្ឋានផងដែរ ។
តាមព័ត៌មានឱ្យដឹងថា សមត្ថកិច្ចជាច្រើននាក់ដឹកនាំដោយមន្ត្រីតុលាការសាលាដំបូងរាជធានីភ្នំពេញ បានឆ្មក់ចូលឆែកឆេរទីតាំងខុនដូតាំងពីវេលាម៉ោង៨និង៣០នាទីព្រឹករហូតដល់ម៉ោង១២និង១០នាទីថ្ងៃត្រង់ ដែលគេសង្ស័យថាខុនដូនេះត្រូវជនបរទេសជួល និងបានបើកល្បែងស៊ីសងតាមប្រព័ន្ធអិុនធើរណេត ដោយលួចលាក់ ។ ទោះបីជាយ៉ាងណាការបង្ក្រាបទីតាំងលេងល្បែងនេះហាក់ដូចជាមានអាថ៌កំបាំង ព្រោះអ្នកកាសែតមិនត្រូវបានអនុញ្ញាតឱ្យចូល និងមិនត្រូវបានទម្លាយឱ្យដឹងឡើយ ។ លោកឧត្តមសេនីយ៍ទោ ឆៃ ស៊ីណារិទ្ធ ដែលជាមេដឹកនាំបង្ក្រាបហាក់ដូចគេចមុខពីអ្នកកាសែត ដោយឱ្យអ្នកបើករថយន្តរបស់លោក បើករថយន្តចូលទៅដឹកលោកចេញដល់ក្នុងខុនដូតែម្តង ទោះបីឃើញអ្នកកាសែតនៅពាសពេញក៏ដោយ ធ្វើដូចអត់ឃើញ ។
តាមព័ត៌មានឱ្យដឹងថា ការចុះបង្ក្រាបនេះពុំបានឃាត់ខ្លួនជនសង្ស័យណាម្នាក់ទេ ដោយជនជាតិកូរ៉េទាំងនោះដឹងខ្លួនជាមុន ហើយគេចខ្លួនបាត់នៅសល់តែសំបុកទទេស្អាត ដោយទុកកុំព្យូទ័រប្រមាណ៥០គ្រឿង និងបៀរចំនួន៦០កេស ព្រមទាំងឯកសារមួយចំនួនត្រូវបានបំផ្លិចបំផ្លាញផងដែរ តើខ្នងណាមួយទៅហ្ន៎ ថ្លើមពាសមេឃម៉្លេះ?សម្ភារទាំងនេះពុំត្រូវបានសមត្ថកិច្ចដកហូតឡើយ ។
តាមព័ត៌មានឱ្យដឹងថា ខុនដូនេះមាន៦ជាន់ ត្រូវជនជាតិកូរ៉េចំនួន៨នាក់ជួលស្នាក់នៅតាំងពីឆ្នាំ២០១០ ដែលក្នុង១ខែតម្លៃ១ម៉ឺនដុល្លារ ដោយពុំមានអាជ្ញាធរដឹងឮឡើយ ហើយលួចលាក់បើកល្បែងស៊ីសងតាមប្រព័ន្ធអិុនធើរណេត ។ នៅពេលចុះបង្ក្រាប ហើយចាប់បានតែខ្យល់បែបនេះ គេសង្ស័យមានអ្នកផ្តល់ដំណឹងជាមុនផងដែរ ។
មានការកត់សម្គាល់ថា ប្រទេសកម្ពុជាកំពុងត្រូវបានជនបរទេសយកជាទីតាំងប្រព្រឹត្តបទល្មើស និងបើកល្បែងស៊ីសងតាមប្រព័ន្ធអិុនធើរណេត ដែលអ្នកលេងនៅក្រៅប្រទេស ហើយត្រូវបានសមត្ថកិច្ចបង្ក្រាបបានជាបន្តបន្ទាប់ ដែលការបង្ក្រាបបានជោគជ័យមុនៗនោះប្រហែលអត់មានខ្នងការពារ ។
កាលពីពេលកន្លងមកថ្មីៗនេះ ក្រុមជនបរទេសមានជនជាតិឥណ្ឌូណេស៊ី និងចិនបាននាំគ្នារាប់សិបនាក់ មកបង្កើតទីតាំងភ្នាល់ល្បែងតាមអិុនធើរណេតនិងត្រូវបានបង្ក្រាបជាបន្តបន្ទាប់ គឺបង្ក្រាបបានទាំងសាច់ ទាំងសំបុក មិនមែនបង្ក្រាបបានតែសម្បកបែបនេះទេ ។
ក្រុមអ្នកវិភាគនិយាយថា ប្រសិនបើមានការស្រាវជ្រាវ អាចរកឃើញមេខ្យល់ដែលបាន«បោះដៃ»មុន ទើបចាប់បានតែ«ខ្យល់»បែបនេះ ។ អ្នកតាមដាននិយាយថា អ្នកបោះដៃនោះទំនងជាស្ត្រីណាម្នាក់ ៕
ចែករំលែកព័តមាននេះ