តុលាការថៃសម្រេចដាក់ពន្ធនាគារលោកចាទូផន ព្រំផាន់ រយៈពេល៦ខែ និងពិន័យជាប្រាក់៥ម៉ឺនបាត ពីបទជេរប្រមាថលោកអាប់ភីស៊ីត វេចាជឺវ៉ា ដោយចោទប្រកាន់ពីការចេញបញ្ជាឱ្យសម្លាប់ប្រជាជន ប៉ុន្តែទោសនោះត្រូវព្យួររយៈពេល២ឆ្នាំ ចំណែករឿងក្តីចោទប្រកាន់គេចពីកាតព្វកិច្ចយោធាត្រូវលុបចោល ។កាលពីថ្ងៃទី២៧ កញ្ញា តុលាការថៃបានអានសាលក្រមលើរឿងក្តីដែលលោកអាប់ភីស៊ីត វេចាជីវ៉ា អតីតនាយករដ្ឋមន្ត្រីថៃ និងប្រធានគណបក្សប្រជាធិបតេយ្យជាដើមចោទ ប្តឹងលោកចាទូផន ព្រំផាន់ មេដឹកនាំប្រជាធិបតេយ្យប្រឆាំងនឹងរបបផ្តាច់ការ ជាចុងចោទពីបទជេរប្រមាថអ្នកដទៃដោយការឃោសនា ។
ដើមចោទបានប្តឹងថា កាលពីថ្ងៃទី២៩ មករា ឆ្នាំ២០១០ រហូតដល់ថ្ងៃទី១៥ កុម្ភៈ ឆ្នាំ២០១០ នៅលើវេទិកាចុងចោទបានជេរប្រមាថខ្លួនដោយឧបករណ៍បំពងសំឡេងនៅចំពោះមុខក្រុមអាវក្រហម និងប្រជាជនដែលបានស្តាប់ និងទស្សនាទូរទស្សន៍នៅទូទាំងប្រទេស ។ ចុងចោទបានចោទនាយករដ្ឋមន្ត្រី អាប់ភីស៊ីត ថា ចេញបញ្ជាឱ្យសម្លាប់ប្រជាជន និងគេចវេះពីកាតព្វកិច្ចយោធា ។
លើសពីនេះនៅមានអត្ថន័យផ្សេងៗទៀតសុទ្ធសឹងតែចោទដាក់បន្ទុកឱ្យដើមចោទទទួលការបាត់បង់កេរ្តិ៍ឈ្មោះ ដោយជេរប្រមាថក្នុងន័យស្អប់ខ្ពើមថា «ដើមចោទជាមនុស្សឃោរឃៅ បញ្ជាឱ្យសម្លាប់ប្រជាជន» ។
តុលាការយល់ថា លោកចាទូផន ចោទលោកអាប់ភីស៊ីត ថា គេចពីកាតព្វកិច្ចយោធានោះ គឺឯកសារផ្សេងៗទាក់ទងនឹងរឿងនេះនៅមិនទាន់ច្បាស់លាស់ ។ ចុងចោទរិះគន់ក្នុងន័យសុចរិត ព្រោះដើមចោទជានាយករដ្ឋមន្ត្រី ជាបុគ្គលសាធារណៈរមែងទទួលការរិះគន់ក្នុងលក្ខណៈសមស្រប ។ចំណែកចុងចោទដែលចោទថា ដើមចោទជានាយករដ្ឋមន្ត្រីចេញបញ្ជាបង្ក្រាប និងសម្លាប់ប្រជាជន តុលាការយល់ថា ចុងចោទមានចេតនាដើម្បីធ្វើឱ្យកើតភាពជ្រួលច្របល់មិនបានរិះគន់ក្នុងន័យសុចរិតទេ ។
តុលាការសម្រេចឱ្យលោកចាទូផន ត្រូវជាប់ពន្ធនាគាររយៈពេល៦ខែ ពិន័យជាប្រាក់៥ម៉ឺនបាត ដោយទោសជាប់ពន្ធនាគារត្រូវព្យួររយៈពេល២ឆ្នាំ និងឱ្យចុងចោទផ្សព្វផ្សាយសាលក្រមនៅតាមកាសែតរយៈពេល៧ថ្ងៃ និងជាអ្នកចំណាយប្រាក់ដោយខ្លួនឯង ៕
ចែករំលែកព័តមាននេះ