ADផ្ទាំងផ្សព្វផ្សាយពាណិជ្ជកម្ម

ប៉ូលិសសន្តិសុខផ្ទៃក្នុងចុះឆែកឆេរខុនដូជនជាតិកូរ៉េមួយកន្លែងរកឃើញបទល្មើសលេងល្បែង

12 ឆ្នាំ មុន

២៧ ខែ កញ្ញា ឆ្នាំ ២០១២ ម៉ោង ០២:៣៨

រាជធានីភ្នំពេញ ៖ ប៉ូលិសនាយកដ្ឋានសន្តិសុខផ្ទៃក្នុងនៃក្រសួងមហាផ្ទៃដឹកនាំដោយលោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុងសហការជាមួយប៉ូលិសអន្តរជាតិកូរ៉េចុះឆែកឆេរខុនដូសំបូរជនជាតិកូរ៉េមួយកន្លែងដែលមានទីតាំងលេខ២៣ ផ្លូវលេខ៥៧០ សង្កាត់បឹងកក់២ ខណ្ឌទួលគោក កាលពីវេលាម៉ោង៨និង៣០នាទីព្រឹកថ្ងៃទី២៧ កញ្ញា ២០១២ ដើម្បីស្វែងរកបទល្មើសមួយចំនួន បន្ទាប់ពីសង្ស័យថា ការរស់នៅរបស់ពួកគេមិនប្រក្រតី ។

ប្រតិបត្តិការចុះឆែកឆេរនេះ បើតាមប្រភពពីមន្ត្រីប៉ូលិសខ្សឹបឱ្យដឹងថា សង្ស័យពាក់ព័ន្ធបទល្មើសសេដ្ឋកិច្ច ប៉ុន្តែទីបំផុតរកឃើញថា ពួកជនជាតិកូរ៉េទាំងនោះបានផ្តុំគ្នាលេងល្បែងតាមអីុនធើរណេតតែប៉ុណ្ណោះ ព្រោះមានវត្ថុតាងពាក់ព័ន្ធនឹងការលេងល្បែងជាច្រើនផងដែរ ។ សូមបញ្ជាក់ថា ពេលឆែកឆេរប៉ូលិសរកឃើញកុំព្យូទ័រជាង៥០គ្រឿង បៀ៦០កេស និងឯកសារលេងល្បែងជាច្រើនទៀត ចំណែកជនជាតិកូរ៉េបានគេចខ្លួនបាត់អស់ទៅហើយ ហាក់ដូចជាដឹងខ្លួនមុន ។