ខេត្តកណ្តាល ៖ នៅព្រឹកថ្ងៃទី២៦ កញ្ញា សាលាដំបូងខេត្តបានប្រកាសសាលក្រមផ្តន្ទាទោសអតីតចៅក្រមលោកហួត ហ៊ាង និងក្រឡាបញ្ជីលោកលឹម កុម្ភៈ ឱ្យជាប់ពន្ធនាគារម្នាក់ៗ២ឆ្នាំ ជាប់ចោទពីបទប្រព្រឹត្តអំពើពុករលួយ និងសមគំនិតប្រព្រឹត្តអំពើពុករលួយ ។ ការប្រកាសសាលក្រមនេះ បានធ្វើឡើងជាសាធារណៈចំពោះមុខជនជាប់ចោទដែលជាអតីតចៅក្រមសាលាដំបូងខេត្តកណ្តាល លោកហួត ហ៊ាង ចំណែកក្រឡាបញ្ជីលោកលឹម កុម្ភៈ ដែលរត់គេចខ្លួនគឺប្រកាសកាត់ទោសកំបាំងមុខ ។ ការប្រកាសសាលក្រមនេះ គឺបន្ទាប់ពីសាលាដំបូងខេត្តធ្វើការជំនុំជម្រះកាលពីព្រឹកថ្ងៃទី២១ កញ្ញា ដោយមានលោកចៅក្រមលឹម សុគន្ថា ជាប្រធានក្រុមជំនុំជម្រះ និងចៅក្រមអមលោកធ្ធាំ ប៊ុណា និងលោកឆែ វឌ្ឍនៈ ។
លោកលឹម សុគន្ថា បានប្រកាសសាលក្រមផ្តន្ទាទោសអតីតចៅក្រមស៊ើបសួរសាលាដំបូងខេត្តកណ្តាល លោកហួត ហ៊ាង អាយុ៤២ឆ្នាំ ឱ្យជាប់ពន្ធនាគាររយៈពេល២ឆ្នាំ ប៉ុន្តែត្រូវព្យួរទោស១ឆ្នាំគិតត្រឹមពីថ្ងៃចាប់ខ្លួនគឺថ្ងៃទី២១ ខែមករា ឆ្នាំ២០១២ ។ ចំណែកអតីតក្រឡាបញ្ជី លោកលឹម កុម្ភៈ ដែលរត់គេចខ្លួនបាត់ ក៏ត្រូវបានផ្តន្ទាទោសឱ្យជាប់ពន្ធនាគារ២ឆ្នាំដែរ គិតចាប់ពីថ្ងៃចាប់ខ្លួនបាន ។ តាមច្បាប់ជនជាប់ចោទដែលប្រព្រឹត្តអំពើពុករលួយ ត្រូវមានទោសជាប់ពន្ធនាគារពី៧ទៅ១៥ឆ្នាំ ប៉ុន្តែដោយយោងទៅលើមាត្រាយោងមួយចំនួនតាមការសាកសួរ និងស៊ើបអង្កេតដែលជនជាប់ចោទបានឆ្លើយសារភាពពីទោសកំហុស និងសហការជាមួយអង្គភាពប្រឆាំងអំពើពុករលួយ ក៏ដូចជាមួយតុលាការ ហើយពីមុនៗមកមិនដែលមានរឿងអាស្រូវពាក់ព័ន្ធនឹងទង្វើខុសច្បាប់ ក៏ដូចជាធ្លាប់បម្រើការងារជាមន្ត្រីរាជការច្រើនឆ្នាំមកហើយដែរ ។
ជនជាប់ចោទហួត ហ៊ាង ត្រូវបានកម្លាំងអង្គភាពប្រឆាំងអំពើពុករលួយចាប់ខ្លួនកាលពីរសៀលថ្ងៃទី២១ ខែមករា ឆ្នាំ២០១២ នៅបន្ទប់ធ្វើការរបស់លោកក្នុងសាលាដំបូងខេត្តកណ្តាលជាប់ចោទពីបទប្រព្រឹត្តអំពើពុករលួយ ស៊ីសំណូកប្រាក់ចំនួន៥ពាន់ដុល្លារ ជាថ្នូរមិនចេញដីកាចាប់ខ្លួនក្នុងសំណុំរឿងទំនាស់ដីធ្លីមួយដែលមានអ្នកស្រីលឹម វូច ជាដើមបណ្តឹងទៅអង្គភាពប្រឆាំងអំពើពុករលួយ ។ ក្នុងសំណុំរឿងប្រព្រឹត្តអំពើពុករលួយ និងស៊ីសំណូកប្រាក់ចំនួន៥ពាន់ដុល្លារនេះ ក៏មានពាក់ព័ន្ធជាមួយលោកលឹម កុម្ភៈ ដែលជាក្រឡាបញ្ជីដែរ គឺជាអ្នកចរចាទារលុយ៥ពាន់ដុល្លារនោះពីដើមបណ្តឹង ។ ប៉ុន្តែនៅថ្ងៃប្រគល់លុយនោះ ដើមបណ្តឹងបានទៅប្រគល់ឱ្យលោកហួត ហ៊ាង នៅក្នុងបន្ទប់ដោយផ្ទាល់ដៃ ហើយត្រូវអង្គភាពប្រឆាំងអំពើពុករលួយចាប់ខ្លួនតែម្តង គឺចំពេលដែលលោកក្រឡាបញ្ជីលឹម កុម្ភៈ មិននៅ ហើយលុះបែករឿងឡើង លោកលឹម កុម្ភៈ ក៏បានរត់គេចខ្លួនបាត់ស្រមោលតែម្តង រហូតមកដល់សព្វថ្ងៃនេះ ។ ប៉ុន្តែដោយយោងតាមចម្លើយរបស់លោកហួត ហ៊ាង ឆ្លើយដាក់មានទាក់ទិននឹងលោកលឹម កុម្ភៈ ទើបតុលាការសម្រេចប្រកាសសាលក្រមផ្តន្ទាទោសលោកលឹម កុម្ភៈ ឱ្យជាប់ពន្ធនាគារ២ឆ្នាំ គិតពីត្រឹមថ្ងៃចាប់ខ្លួនបាន ។ ចំណែកលោកហួត ហ៊ាង ក៏ត្រូវផ្តន្ទាទោសឱ្យជាប់ពន្ធនាគារ២ឆ្នាំដែរ តែព្យួរទោស១ឆ្នាំ គឺលោកហួត ហ៊ាង ត្រូវជាប់ពន្ធនាគារតែ៤ខែទៀត ប៉ុណ្ណោះ នឹងរួចទោសវិញហើយ ៕
ចែករំលែកព័តមាននេះ