រាជធានីភ្នំពេញ ៖ ពុទ្ធបរិស័ទចំណុះជើងវត្តពោធិព្រឹក្ស ហៅវត្តខ្ទរ សង្កាត់ព្រែកលៀប ខណ្ឌប្ញស្សីកែវ មានស្នាមផ្តិតមេដៃ១.០០២នាក់ ប្រឆាំងមិនព្រមដោះដូរដី ទីតាំងឈាបនដ្ឋានជាមួយក្រុមហ៊ុនមួយឈ្មោះអេង កាំងឌីវេឡុបមេន ខបភើរេសិន ជាដាច់ខាត ដោយសំអាងថា ដីឈាបនដ្ឋាននេះជាដីរបស់វត្ត ក៏ដូចជាដីរួមរបស់អ្នកភូមិខ្ទរដែរ ។ អ្នកភូមិខ្ទរទាំងជាង១ពាន់នាក់សម្រេចចិត្តថា បើឈាបនដ្ឋាននេះវាប៉ះពាល់ដល់បរិស្ថាន ឬមិនឱ្យបូជាសពទេ ពួកគេសុខចិត្តរុះរើចេញ ឬឈប់ប្រើដើម្បីទុកដីនេះសម្រាប់កសាងសាលារៀន និងសម្រាប់វត្តអារាមទៅថ្ងៃក្រោយទៀត ព្រោះច្រាំងទន្លេចេះតែបន្តបាក់រៀងរាល់ឆ្នាំ ។
តាមឯកសារបានបង្ហាញថា ដីឈាបនដ្ឋានដែលក្រុមហ៊ុនអេង កាំង ចង់បានដោះដូរនេះមានទំហំបណ្តោយ២៧៧ម៉ែត្រ ទទឹង១៣០ម៉ែត្រ ស្មើនឹងជាង៣ហិកតាកន្លះ ។ កន្លងមកក្រុមហ៊ុនអេង កាំង បានទទួលនូវភ័ព្វសំណាងធំមួយគឺបានធ្វើជាម្ចាស់លើដីរបស់សាលាជាតិកសិកម្មព្រែកលៀបរួចទៅហើយ ដែលយើងនៅមិនទាន់ដឹងច្បាស់ពីទំហំដីសាលាជាតិកសិកម្មព្រែកលៀបនេះនៅឡើយទេ ហើយក៏មិនទាន់បានដឹងច្បាស់ថាតើដីសាលាជាតិកសិកម្មព្រែកលៀបដ៏មហាសាលនេះ គេដោះដូរគ្នាដោយរបៀបណានៅឡើយដែរ ព្រោះកំពុងស្រាវជ្រាវបន្ត ដែលយើងផ្សាយជូននៅពេលក្រោយទៀត ។ ដោយដីសាលាជាតិកសិកម្មព្រែកលៀបដែលជាដីត្រូវប៉ាន់នាសម័យនេះ វាស្ថិតនៅជាប់ព្រំប្រទល់ជាមួយដីឈាបនដ្ឋានវត្តខ្ទរ ដែលមានទំហំជាង៣ហិកតាឃើញថាធំមហាសាលផង ជាប់ផ្លូវជាតិលេខ៦ផង ទើបក្រុមហ៊ុនអេង កាំង រត់ការយ៉ាងប្តូរផ្តាច់ចង់បានដីឈាបនដ្ឋាននេះបន្ថែមទៀតឱ្យវាកាន់តែមហាសាលឡើង ។
តាមឯកសារក៏បានបង្ហាញដែរថា ក្រុមហ៊ុនអេង កាំង បានយកដីមួយកន្លែងក្នុងតំបន់ទឹកលិចជ្រៅអត់មានមនុស្សរស់នៅ គឺនៅចំណុចស្ពានទី៥ តាមដងផ្លូវជាតិលេខ៦ ក្នុងសង្កាត់ព្រែកលៀប ដដែល ដោយចុះពីផ្លូវជាតិចម្ងាយជិត១គីឡូម៉ែត្រ ដែលអ្នកភូមិខ្ទរនិយាយថាមានចម្ងាយជាង៥គីឡូម៉ែត្រពីវត្តខ្ទរ ឬពីឈាបនដ្ឋានចាស់ គឺដេញខ្មោចកាន់តែឆ្ងាយទៅៗ… ការដោះដូរនេះ ក្រុមហ៊ុនបានផ្តល់ដីឱ្យតែ២ហិកតាទេ ដោយធានាសាងសង់ឈាបនដ្ឋានថ្មីឱ្យវិញ ។
ក្នុងករណីដោះដូររបៀបយកឆ្នាំងដីដូរយកឆ្នាំងមាសនេះ អ្នកភូមិខ្ទរទាំងមូលប្រាប់កោះសន្តិភាពថា មិនឯកភាពទេ មិនព្រមដូរជាដាច់ខាត ។ តាមលិខិតរបស់អ្នកភូមិខ្ទរលើកឡើងថា «យើងខ្ញុំទាំងអស់គ្នាជាប្រជាពលរដ្ឋគោរពច្បាប់ និងអនុសាសន៍ដ៏ខ្ពង់ខ្ពស់របស់សម្តេចតេជោ ដែលបានថ្លែងថា ដីសាលារៀន មន្ទីរពេទ្យ វត្តអារាម មិនមានអ្នកណាមានសិទ្ធិលក់ ឬក៏ដោះដូរឡើយ »។ ក្នុងលិខិតជាផ្លូវការរបស់ប្រជាពលរដ្ឋភូមិខ្ទររៀបរាប់ទៀតថា យើងខ្ញុំមានបំណងថែរក្សាដីនេះ ដើម្បីសម្រាប់បម្រុងទុកនៅពេលអនាគតសម្រាប់វត្ត ដូចជាសាងសង់សាលារៀនថ្មី ជំនួសឱ្យសាលារៀនចាស់ ដែលចាស់ទ្រុឌទ្រោម និងស្ថិតនៅទីតាំងតូចចង្អៀត ។ ឯបរិមាណសិស្សកើនឡើងរៀងរាល់ឆ្នាំ ។ល។ លិខិតដដែលចែងថា បើឈាបនដ្ឋាននេះប៉ះពាល់ដល់ការអភិវឌ្ឍរបស់ក្រុមហ៊ុន គឺអាចវាយចោលពេលណាក៏បានដែរ កុំតែមកដណ្តើមយកដីឱ្យសោះ ។
អ្នកភូមិខ្ទរមួយក្រុម ដែលធ្លាប់រកស៊ីទិញដីលក់ដី បានប្រាប់កោះសន្តិភាពថា ដីជាប់ផ្លូវជាតិលេខ៦Aក្នុងតំបន់វត្តខ្ទរនេះដូចដីឈាបនដ្ឋានជាដើមមានតម្លៃរាប់លានដុល្លារ ដែលអ្នកណាក៏ចង់បានដែរ ។ ចំណែកដីវាលលិចទឹក ឬដីបឹងដែលក្រុមហ៊ុនអេង កាំង ដោះដូរនោះឆ្ងាយពីផ្លូវជាតិជិត១គីឡូម៉ែត្រ អត់មានហាងឆេងទេ អាចមានតម្លៃរាប់ម៉ឺនដុល្លារប៉ុណ្ណោះ មិនខុសពីយកឆ្នាំងដីដូរយកឆ្នាំងមាសពីអ្នកភូមិខ្ទរឡើយ ។
អ្នកភូមិខ្ទរដដែល ក្នុងថ្ងៃបះបោរកាលពីព្រឹកថ្ងៃទី២១ កញ្ញា បានចោទខ្លាំងៗថា គណៈកម្មការអាចារ្យវត្ត និងចៅអធិការវត្តបានឃុបឃិតគ្នាលក់ដីឱ្យទៅក្រុមហ៊ុនអេង កាំង ដោយអត់មានពិភាក្សាជាមួយអ្នកភូមិសោះ គឺពិភាក្សាត្រូវដងត្រូវផ្លែតែគ្នាឯងប៉ុន្មាននាក់ ។ អ្នកភូមិបានទាមទារសុំឱ្យធ្វើការបោះឆ្នោតរើសគណៈកម្មការអាចារ្យវត្តជាថ្មីឡើងវិញ ព្រមទាំងសុំឱ្យដូរចៅអធិការចេញពីវត្តផងដែរ ព្រោះហ៊ានឃុបឃិតគ្នាលក់ដីវត្ត ក៏ដូចជាដីរបស់អ្នកភូមិខ្ទរទាំងមូលដែរ ។
អ្នកភូមិនិយាយថា បើនៅតែមានការដោះដូរបន្តទៀត មិនព្រមបោះបង់ការដោះដូរទេ បាតុកម្មតវ៉ានៅតែកើតមានដដែល និងកាន់តែរីកធំមិនខាន ។ ពួកគេនិយាយថា ទោះបីថ្នាក់លើយល់ព្រមក៏ដោយ ការយល់ព្រមរបស់ថ្នាក់លើនោះ គឺជឿទៅលើការភូតកុហក ការបោកប្រាស់ តាមលិខិតរបស់ថ្នាក់ក្រោមដែលពុករលួយតែប៉ុណ្ណោះ ។ ចំណែកប្រជាពលរដ្ឋមួយភូមិអត់មានអ្នកណាឯកភាពទេ ឯកភាពតែចៅអធិការ និងអាចារ្យ២ទៅ៣នាក់ប៉ុណ្ណោះ ។
ក្រុមអ្នកសង្កេតការណ៍បាននិយាយថា ក្រុមហ៊ុនអេង កាំង គួរតែដកថយហើយ មិនគួរធ្វើឱ្យសង្គមជួបការលំបាក ដោយសារតែមហិច្ឆតាអត់ព្រំដែនរបស់ខ្លួនឡើយ ។ ព្រោះដីវត្ត ដីមន្ទីរពេទ្យ ដីសាលារៀន សុទ្ធតែត្រូវបានសម្តេចតេជោសំណូមពររួចហើយ ប្រកាសក្តែងៗរួចហើយ ហាមលក់ ឬដោះដូរ ។ ក្រុមអ្នកសង្កេតការណ៍កំពុងតែពិនិត្យទៅលើដីដ៏ធំមហាសាល ដែលជាដីរបស់សាលាជាតិកសិកម្មព្រែកលៀប តើប្រគល់ឱ្យទៅក្រុមហ៊ុនអេង កាំង ដោយរបៀបណា? មានតម្លាភាពដែរឬអត់? សង្ស័យការដោះដូរដីនេះសុទ្ធតែជាបញ្ហាដែលប៉ះពាល់ធ្ងន់ធ្ងរណាស់ដល់សេដ្ឋកិច្ច-សង្គម ។ កោះសន្តិភាពបានព្យាយាមសុំការបំភ្លឺពីក្រុមហ៊ុនអេង កាំង ម្សិលមិញនេះ ប៉ុន្តែមិនអាចទាក់ទងបានតាមទូរស័ព្ទ ៕
ចែករំលែកព័តមាននេះ