ខេត្តស្វាយរៀង ៖យ៉ាងហោចណាស់មានមនុស្សមួយក្រុមបានដាក់ដាយស្បៃមុង និងអួនក្រឡាល្អិតក្នុងប្រឡាយព្រែកទន្លេវ៉ៃគោពេលរដូវត្រីពងកូនចំនួន២កន្លែងនៅភូមិក្បាលស្ពាន សង្កាត់ពោធិ៍តាហោ ក្រុងស្វាយរៀង ធ្វើឱ្យប្រជាពលរដ្ឋមួយចំនួនមានការព្រួយបារម្ភ ពីការបាត់បង់ពូជត្រី និងបង្កង ។ កន្លងមកព្រែកទន្លេវ៉ៃគោនេះស្ទើរតែដាច់ពូជត្រី និងបង្កងធម្មជាតិ ក៏ប៉ុន្តែបានសម្ដេចអគ្គមហាសេនាបតីតេជោហ៊ុន សែន នាំយកពូជត្រី និងបង្កងធម្មជាតិមកលែង ធ្វើឱ្យព្រែកនេះមានពូជត្រី ពូជបង្កងឡើងវិញ ។
ប៉ុន្តែចាប់តាំងពីថ្ងៃទី៥ កញ្ញាមក មានក្រុមមនុស្សដែលអាងខ្នងបានបើកទ្វារទឹករួចដាក់ដាយអួនក្រឡាល្អិត និងអួនស្បៃមុងក្នុងប្រឡាយទឹកយកត្រីតូចធំគ្រប់ប្រភេទធ្វើឱ្យមានការព្រួយបារម្ភពីការបាត់់បង់ពូជត្រីនិងបង្កងទាំងនេះព្រោះគេពុំឃើញមានមន្ត្រីជំនាញ ឬអាជ្ញាធរមានសមត្ថកិច្ចណាអើពើទប់ស្កាត់ឡើយ ។ទាក់ទិននឹងការដាក់ដាយស្បៃមុង និងអួនក្រឡាល្អិតនេះ កោះសន្ដិភាពព្យាយាមរកការបំភ្លឺពីមន្រ្តីជលផលស្វាយរៀងដែរ តែរហូតមកដល់ថ្ងៃទី២៤ កញ្ញា នៅតែមិនអាចរកការបំភ្លឺបាន រីឯលោកអភិបាលក្រុងវិញ ឃើញជិះរថយន្តទៅមើលដែរតែពុំឃើញមានចំណាត់ការទេ ។
ប្រជាពលរដ្ឋនិយាយថា កាលដែលគេហ៊ានប្រើឧបករណ៍ហាមឃាត់បែបនេះមកពីមានខ្នងការពារទើបសុំឱ្យអ្នកសារព័ត៌មានចុះផ្សាយពីព័ត៌មាននេះផងហើយសង្ឃឹមថាមន្រ្តីជលផលពិតជាមានវិធានការមិនខាន ៕
ចែករំលែកព័តមាននេះ