ខេត្តព្រៃវែង ៖ អ្នកស្រី សេង ចំណាន អាយុ៤៥ឆ្នាំ ជាប្រពន្ធរបស់លោកអ៊ូ រតនា មេបញ្ជាការរងកងរាជអាវុធហត្ថស្រុកពាមរក៍ បាននិយាយថា ការស្លាប់របស់ប្តីគាត់កាលពីថ្ងៃទី៣ កញ្ញា កន្លងទៅ គឺបានបង្កប់នូវអាថ៌កំបាំងជាច្រើន ដែលធ្វើឱ្យក្រុមគ្រួសារ និងសាច់ញាតិយល់ឃើញថា អាចជាអំពើឃាតកម្ម ។
អ្នកស្រី សេង ចំណាន បានបញ្ជាក់ថា ការលើកឡើងបែបនេះ គឺដោយសារតែសំអាងទៅលើហេតុផល៣ចំណុច គឺទី១-នៅមុនពេលកើតហេតុប្តីរបស់គាត់ធ្លាប់បានប្រាប់ក្រុមគ្រួសារថា មានគេប៉ងសម្លាប់ខ្លួន២ដងមកហើយតែមិនបានសម្រេចក្រោយមកនៅរសៀលមុនកើតហេតុនោះប្តីរបស់គាត់បានចេញពីផ្ទះទៅធ្វើការជាធម្មតាបាត់មួយយប់ស្រាប់តែព្រឹកឡើងឃើញសមត្ថកិច្ចដឹកសពយកមកឱ្យអ្នកផ្ទះដោយប្រាប់ថា ឆក់ខ្សែភ្លើងស្លាប់ទៅវិញ។
ទី២-ក្រោយពេលប្រទះឃើញសពជនរងគ្រោះភ្លាម សមត្ថកិច្ចមិនបានត្រួតពិនិត្យ និងធ្វើកោសល្យវិច័យលើសព និងទីតាំងកើតហេតុភ្លាមនោះទេ បែរជាលើកសពដឹកយកមកឱ្យក្រុមគ្រួសារទៅវិញ ធ្វើឱ្យខូចទ្រង់ទ្រាយដើមកន្លែងកើតហេតុ និងបាត់ភស្តុតាងមិនអាចវិនិច្ឆ័យរកមូលហេតុនៃការស្លាប់ពិតប្រាកដឃើញ ហើយរំលងអស់១ថ្ងៃ១យប់ទើបសមត្ថកិច្ចជំនាញធ្វើកោសល្យវិច័យចុះទៅត្រួតពិនិត្យកន្លែងកើតហេតុ និងធ្វើការសន្និដ្ឋានជាផ្លូវការអំពីមូលហេតុនៃការស្លាប់នេះ ទាំងដែលទីតាំងកើតហេតុ និងភស្តុតាងមួយចំនួនដែលយកមកធ្វើជាមូលដ្ឋានក្នុងការវិនិច្ឆ័យហេតុការណ៍ត្រូវបានបំផ្លាញទ្រង់ទ្រាយដើមអស់ទៅហើយ ។ និងទី៣-នៅពេលប្រទះឃើញសពភ្លាមៗលើរាងកាយសពមានស្នាមបែកចេញឈាមនៅត្រង់ថ្ងាស និងស្នាមឆូតជាំនៅលើក្បាល ចំណែកត្រង់កំភួនដៃខាងឆ្វេងមានស្នាមជាំ២កន្លែង ប៉ុន្តែក្រៅពីនេះរាងកាយទាំងមូលនៅរក្សាសភាពដើមទាំងអស់គឺពុំមានអាការស្លេកស្លាំង ឬសញ្ញាផ្សេងៗដែលបញ្ជាក់ពីការឆក់ខ្សែភ្លើងនោះទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ