រាជធានីភ្នំពេញ ៖ ម៉ូតូDH ពណ៌ក្រហមបត់ឆ្វេងត្រូវម៉ូតូវ៉េវ ពណ៌ខ្មៅដែលជិះពីក្រោយ បានបុក ខណៈម៉ូតូទាំង២គ្រឿង បើកចុះពីស្ពានអាកាសក្បាលថ្នល់ បណ្តាលឱ្យរបួសធ្ងន់ម្នាក់ ស្រាលម្នាក់ កាលពីវេលាម៉ោង៣និង៤៥នាទីរំលងអធ្រាត្រថ្ងៃទី២៦ កញ្ញា នៅចំណុចគល់ស្ពានអាកាសក្បាលថ្នល់ផ្នែកខាងជើង តាមមហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន ។
ប្រភពព័ត៌មាននៅកន្លែងកើតហេតុបានឱ្យដឹងថា ម៉ូតូDH ពណ៌ក្រហម និងម៉ូតូវ៉េវពណ៌ខ្មៅបើកក្នុងទិសដៅស្របគ្នាចុះពីលើស្ពានអាកាសក្បាលថ្នល់ពីត្បូងទៅជើង ខណៈមកដល់គល់ស្ពានខាងជើងម៉ូតូDH បត់ឆ្វេង ស្រាប់តែម៉ូតូវ៉េវចាប់ហ្វ្រាំងមិនទាន់ជ្រុលទៅបុកចំកន្ត្រកម៉ូតូបណ្តាលដួលរងរបួសទាំង២នាក់ តែអ្នកបើកម៉ូតូDH របួសធ្ងន់ ឯអ្នកបើកម៉ូតូវ៉េវរបួសស្រាល ។
អ្នកបើកម៉ូតូDH ឈ្មោះចក់ សារិន ភេទប្រុស អាយុ៥០ឆ្នាំ ជាអ្នករត់ម៉ូតូឌុបរងរបួសធ្ងន់ ស្នាក់នៅផ្ទះលេខ៣៧២ ផ្លូវជាតិលេខ២ ក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ ។ ចំណែកអ្នកបើកម៉ូតូវេ៉វឈ្មោះភក្តិ ភេទប្រុស អាយុ១៨ឆ្នាំ ជាកម្មករសត្តឃាតនៅបឹងសាឡាងរងរបួសបែកមុខបែកមាត់តិចតួច បានជិះម៉ូតូទៅដឹកឈាមគោយកទៅឱ្យម៉ូយនៅផ្សារច្បារអំពៅ លុះពេលត្រឡប់មកវិញជួបគ្រោះថ្នាក់ចរាចរណ៍តែម្តង ។
ក្រោយពេលកើតហេតុជនរងគ្រោះទាំង២នាក់ត្រូវបានបញ្ជូនទៅមន្ទីរពេទ្យ ចំណែកម៉ូតូទាំង២គ្រឿងត្រូវសមត្ថកិច្ចយកទៅរក្សាទុកនៅខណ្ឌចំការមនរង់ចាំដោះស្រាយជាក្រោយ ៕
ចែករំលែកព័តមាននេះ