រាជធានីភ្នំពេញ ៖ មន្ត្រីក្រសួងអប់រំ យុវជន និងកីឡា កាលពីថ្ងៃទី២៥ កញ្ញា ឱ្យដឹងថា ក្រសួងបានរៀបចំការប្រណាំងទូកខ្នាតអន្តរជាតិដើម្បីជ្រើសរើសជើងឯកប្រចាំឆ្នាំ២០១២ នៅក្រុងតាខ្មៅ ខេត្តកណ្តាល ចាប់ពីថ្ងៃទី២៤ ដល់ទី៣០ កញ្ញា ។ ការប្រណាំងទូកខ្នាតអន្តរជាតិនេះមានទូកចំនួន២៤ មកពីខេត្តចំនួន៥ ស្ថិតក្រោមការគ្រប់គ្រងរបស់មន្ទីរអប់រំខេត្តនីមួយៗ និង១មកពីគណៈកម្មាធិការជាតិអូឡាំពិកកម្ពុជា ហើយទូកនីមួយៗមានចំណុះពី១២នាក់ដល់២៤នាក់ ។
មន្ត្រីអគ្គនាយកដ្ឋានកីឡានៃក្រសួងអប់រំ យុវជន និងកីឡា បានថ្លែងប្រាប់កោះសន្តិភាពតាមទូរស័ព្ទថា ក្រសួងអប់រំបានប្រកាសផ្សព្វផ្សាយជាសាធារណៈដល់សាធារណជនទាំងអស់ដែលមានបំណងចូលរួមប្រណាំងទូក សូមដាក់ពាក្យមកក្រសួងអប់រំដើម្បីឱ្យគណៈកម្មការរៀបចំធ្វើការជ្រើសរើស។ មានកីឡាករចំនួនប្រមាណ៧០០នាក់ត្រូវបានជ្រើសរើសឱ្យចូលរួមប្រកួតក្នុងការអុំទូកនេះ ។ ខេត្តដែលបានបញ្ជូនទូកមកចូលរួមប្រកួតមាន ខេត្តកណ្តាល ក្រចេះ កំពង់ឆ្នាំង បាត់ដំបង ព្រៃវែង និងគណៈកម្មាធិការជាតិអូឡាំពិកកម្ពុជា ។
យោងតាមមន្ត្រីក្រសួងអប់រំបានបញ្ជាក់ថា ចំពោះជ័យលាភីលេខ១ទទួលបានមេដាយមាសប្រាក់លើកទឹកចិត្ត៣,៣លានរៀល និងសម្ភារមួយចំនួន, លេខ២ ទទួលបានមេដាយប្រាក់ ប្រាក់លើកទឹកចិត្ត២,២លានរៀល និងសម្ភារមួយចំនួន និងលេខ៣ទទួលបានមេដាយសំរឹទ្ធិ ប្រាក់លើកទឹកចិត្ត១,៧លានរៀល និងសម្ភារមួយចំនួនទៀត ។ ក្នុងការស្នាក់នៅរយៈពេលប្រណាំងនេះ ក្រសួងអប់រំជាអ្នកចំណាយក្នុងការហូបចុកមួយថ្ងៃ៣ពេល ដល់កីឡាករអុំទូកទាំងអស់ និងឱ្យស្នាក់នៅក្នុងសាលាបឋមសិក្សាមួយក្នុងក្រុងតាខ្មៅ ៕
ចែករំលែកព័តមាននេះ